ఏపీ పరిషత్ ఎన్నికల్లో వింత లెక్కలు.. ఓట్ల కంటే చెల్లని ఓట్లే ఎక్కువ! అసలేం జరిగింది?

ఏపీ పరిషత్ ఎన్నికల లెక్కింపు ప్రక్రియలో వెలుగుచూసిన కొన్ని పోస్టల్ బ్యాలెట్ ఫలితాలు చూసి సామాన్య జనం ముక్కున వేలేసుకుంటున్నారు. ఓట్లు వేసిన వారి కంటే చెల్లని ఓట్లే భారీగా పోలై అందరినీ అవాక్కయ్యేలా చేస్తున్నాయి. అసలు ఓటు ఎలా వేయాలో తెలియక ఈ తప్పులు చేశారా లేక మరేదైనా కారణం ఉందా? అధికారులు అసలు ఎన్ని చెల్లని ఓట్లుగా తేల్చారు..?

పరిషత్ ఎన్నికల ఓట్ల లెక్కింపులో భాగంగా అధికారులు తొలుత పోస్టల్ బ్యాలెట్లను లెక్కిస్తారు. అయితే కొన్ని మండలాల్లో వెలువడిన లెక్కలు విస్మయాన్ని కలిగిస్తున్నాయి. అల్లూరి జిల్లా కొయ్యూరు మండలంలో మొత్తం 201 పోస్టల్ బ్యాలెట్ ఓట్లు పోలయ్యాయి. లెక్కింపు పూర్తయ్యాక చూస్తే టీడీపీకి 50, వైసీపీకి 54, స్వతంత్రులకు 11 ఓట్లు వచ్చాయి. కానీ, అందరినీ దిగ్భ్రాంతికి గురిచేస్తూ ఏకంగా 85 ఓట్లు చెల్లనివిగా తేలాయి. అంటే గెలిచే అభ్యర్థికి వచ్చిన ఓట్ల కంటే చెల్లని ఓట్లే ఎక్కువ. ఇదే జిల్లాలోని అనంతగిరి మండలంలో 137 ఓట్లకు గాను.. ఏకంగా 91 ఓట్లు చెల్లకుండా పోయాయి. సగానికి పైగా ఓట్లు తిరస్కరణకు గురవ్వడం తీవ్ర చర్చకు దారితీసింది.

అన్నింటికంటే దారుణమైన పరిస్థితి ఏలూరు జిల్లా కైకలూరు మండలంలో కనిపించింది. ఇక్కడ నమోదైన మొత్తం 66 పోస్టల్ బ్యాలెట్ ఓట్లలో ఏకంగా 64 ఓట్లు చెల్లనివిగా తేలడం గమనార్హం. అంటే కేవలం రెండే రెండు ఓట్లు మాత్రమే చెల్లుబాటు అయ్యాయి, ఆ రెండు ఓట్లు కూడా టీడీపీ అభ్యర్థికే పోలయ్యాయి. 66 మంది విద్యావంతులైన ఉద్యోగులు ఓటేస్తే అందులో 64 ఓట్లు వేస్ట్ కావడం ఏంటని నెటిజన్లు మండిపడుతున్నారు. అయితే తిరుపతి జిల్లా రేణిగుంటలో 144 ఓట్లకు గాను బీజేపీకి 68, వైసీపీకి 55, నోటాకు 5 ఓట్లు రాగా.. అక్కడ 16 ఓట్లు చెల్లకుండా పోయాయి.

పోస్టల్ బ్యాలెట్ ద్వారా ఓటు వేసేటప్పుడు సరైన డిక్లరేషన్ ఫారమ్ జతపరచకపోవడం, గెజిటెడ్ అధికారితో అటెస్టేషన్ సరిగ్గా చేయించకపోవడం లేదా స్వైపింగ్ ఇంక్ మార్క్ స్పష్టంగా లేకపోవడం వల్ల ఈ ఓట్లు చెల్లకుండాపోతాయి. సాధారణంగా ఎన్నికల డ్యూటీలు నిర్వహించే అధికారులే ఈ పోస్టల్ బ్యాలెట్ ఓట్లను వినియోగిస్తారు. అలాంటిది బ్యాలెట్ పేపర్‌పై సరైన అవగాహన లేకపోవడం వల్ల ఇలా జరిగిందా? లేక ఎన్నికల నిబంధనలను నిర్లక్ష్యం చేయడం వల్ల ఇన్ని ఓట్లు తిరస్కరణకు గురయ్యాయా? అనే ప్రశ్నలు ఇప్పుడు వ్యక్తమవుతున్నాయి.

ఏది ఏమైనా పరిషత్ ఎన్నికల పోస్టల్ లెక్కింపులో వెలుగుచూసిన ఈ ఘోరం ఇప్పుడు వైఫల్యాలపై నిలదీసేలా చేస్తోంది. సాధారణ ఓటర్లకు ఓటుపై అవగాహన కల్పించే ఉద్యోగులే తమ ఓటును సరిగ్గా వేసుకోలేక పోవడం విచారకరం. ప్రజాస్వామ్యంలో ప్రతీ ఓటు ఎంతో విలువైనది, అలాంటిది వందల సంఖ్యలో పోస్టల్ బ్యాలెట్లు చెల్లకుండా పోవడంపై ఉన్నతాధికారులు కూడా దృష్టి సారించాల్సిన అవసరం ఉంది. పోస్టల్ బ్యాలెట్లో భారీగా నమోదైన చెలని ఓట్లపై ఇంతకు మీరేం అనుకుంటున్నారో కామెంట్ రూపంలో తెలియజేయండి.