follow us:
స్టార్ హీరో సూర్య, బ్లాక్‌బస్టర్ డైరెక్టర్ జిత్తూ మాధవన్ కాంబినేషన్‌లో వచ్చిన లేటెస్ట్ యాక్షన్ కామెడీ సినిమా ‘సీన్’. ‘రోమాంచమ్’, ‘ఆవేశం’ లాంటి హిట్ సినిమాల తర్వాత జిత్తూ మాధవన్ తెరకెక్కించిన ఈ చిత్రం, నజ్రియా నజీమ్, నెస్లెన్ కీలక పాత్రల్లో నటించిన చిత్రం థియేటర్లలోకి వచ్చింది.
ప్రేమ్ రాజ్ డిపార్ట్‌మెంట్‌లో మోస్ట్ సక్సెస్‌ఫుల్ పోలీస్ ఆఫీసర్. ‘పెర్ఫ్యూమ్ కిల్లర్’ విక్టర్ ను జైలుకు పంపిన ఘనత ఈయనదే. అయితే, అనుకోకుండా తన కంటిచూపు పూర్తిగా తగ్గిపోతుండటంతో ప్రేమ్ రాజ్ తన ఉద్యోగానికి రాజీనామా చేయాలనుకుంటాడు. సరిగ్గా అదే సమయంలో నగరంలో వరుస హత్యలు జరుగుతాయి. నెస్లెన్ అనే సైకో కుర్రాడు తన తల్లితో కలిసి ఈ దారుణాలకు పాల్పడుతుంటాడు. చూపు కోల్పోతున్నా సరే, ఈ కేసును ఎలాగైనా ఛేదించాలని ప్రేమ్ రాజ్ రంగంలోకి దిగుతాడు. అందుకోసం తనకు అసిస్టెంట్‌గా, చూపుగా ‘మాయ’ ను నియమించుకుంటాడు. మెమరీ లాస్ ఉన్న తండ్రి, తాగుడుకు బానిసైన తల్లి సాయంతో, మాయ అండతో ప్రేమ్ రాజ్ ఆ హంతకుడిని ఎలా పట్టుకున్నాడు అనేదే మిగతా సినిమా.
సినిమాకి ప్లస్ పాయింట్స్ చూపులేని పోలీస్ ఆఫీసర్, తెలివైన కిల్లర్ మధ్య సాగే మైండ్ గేమ్స్, కొన్ని పిల్లి-ఎలుక ఆట సీన్లు ఆకట్టుకుంటాయి. హీరోకు చూపు ఉందో లేదో తెలుసుకోవడానికి విలన్ వచ్చే సీన్, ఆ తర్వాత హీరో ఇంటికే హంతకుడు నేరుగా వచ్చే ఇంటర్వెల్, ప్రీ-క్లైమాక్స్ సీన్లు ఉత్కంఠ రేపుతాయి. సూర్య, నజ్రియా, నెస్లెన్ తమ నటనతో సినిమాను నిలబెట్టే ప్రయత్నం చేశారు. సుశీన్ శ్యామ్ బ్యాక్‌గ్రౌండ్ స్కోర్, వినీత్ కెమెరా వర్క్ సినిమా మూడ్‌కు సెట్ అయ్యాయి.
సినిమాకి మైనస్ పాయింట్స్ సినిమా ఓపెనింగ్ బాగున్నా, ఆ తర్వాత కథనం చాలా నెమ్మదిగా సాగుతుంది. కామెడీ కోసం పెట్టిన హీరో తల్లిదండ్రుల క్యారెక్టర్లు నవ్వించకపోగా, ప్రేక్షకులకు చిరాకు తెప్పిస్తాయి. ప్రథమార్ధంలో సూర్య, లాల్ పాత్రల గట్టి గట్టి అరుపులు కాస్త అసహనాన్ని కలిగిస్తాయి. సినిమాలో లవ్, ఎమోషన్స్, కమర్షియల్ ఎలిమెంట్స్ లోపించాయి. క్లైమాక్స్ బాగున్నా, విక్టర్ క్యారెక్టర్‌ను కేవలం సెకండ్ పార్ట్ కోసం వదిలేయడం నిరాశ పరుస్తుంది.
మొత్తానికి చూపులేని పోలీస్ అనే మంచి పాయింట్ తీసుకున్నప్పటికీ, దర్శకుడు దానిని పూర్తి స్థాయిలో ఎంటర్టైనింగ్‌గా మార్చలేకపోయాడు. అక్కడక్కడా కొన్ని సీన్లు, క్లైమాక్స్ మినహా ‘సీన్’ ఆడియన్స్‌ను అంతగా ఆకట్టుకోలేకపోయింది.
