follow us:
సోషల్ మీడియాలో ఎన్నో వార్తలు చూస్తుంటాం.. కానీ, ఈ వార్త వింటే మాత్రం మీ గుండె భారంగా మారుతుంది, కళ్లలో నీళ్లు తిరుగుతాయి. ఒక వ్యక్తి ప్రాణాలతో ఉండి గెలిస్తే ఆ గెలుపు ఇచ్చే ఆనందమే వేరు.. కానీ, అదే గెలిచిన వ్యక్తి మన మధ్య లేకపోతే ఆ శూన్యం ఎంత భయంకరంగా ఉంటుంది? సరిగ్గా ఇలాంటి ఒక కంటతడి పెట్టించే హృదయవిదారక ఘటనే ఏపీలోని తూర్పుగోదావరి జిల్లాలో చోటుచేసుకుంది. పరిషత్ ఎన్నికల ఫలితాల్లో ఓ మహిళా అభ్యర్థి సాధించిన ఘన విజయం అందరినీ ఆశ్చర్యపరిచినా, ఆమె ఈ లోకంలో లేదన్న నిజం మాత్రం స్థానికులను తీవ్ర విషాదంలో ముంచెత్తింది.
తూర్పుగోదావరి జిల్లాలోని దేవరపల్లి మండలం.. ధుమంతునిగూడెం ఎంపీటీసీ స్థానం. జనసేన పార్టీ తరఫున గారపాటి దివ్య బరిలో నిలిచారు. ప్రచార సమయంలో దివ్య ఇంటింటికీ తిరుగుతూ ప్రజలతో మమేకమయ్యారు. స్థానికుల సమస్యలను ఓపికగా వింటూ, అందరి మన్ననలు పొందారు. ఆమెపై ప్రజలకున్న నమ్మకం అంతాఇంతా కాదు. ప్రత్యర్థులతో గట్టి పోటీ ఇస్తూ, ప్రచారంలో జోరు చూపించారు. ఆమె గెలుపు కోసం పార్టీ శ్రేణులు కూడా చాలా కష్టపడ్డాయి. ఎన్నికలు ముగిశాయి, ఇక ఫలితాల కోసం అందరూ ఎంతో ఉత్కంఠగా, ఆశగా ఎదురుచూస్తున్నారు.
ఓట్ల లెక్కింపునకు సరిగ్గా ఒక్కరోజు ఉందనగా.. గారపాటి దివ్య అకస్మాత్తుగా గుండెపోటుతో మృతి చెందారు. రేపు ఫలితాలు వస్తాయనుకుని ఆశగా ఎదురుచూడాల్సిన ఆ ఇంట్లో, అంతులేని రోదనలు మిగిలాయి. ఆమె అకస్మాత్తుగా కన్నుమూయడంతో ఆ ప్రాంతమంతా శోకసంద్రంలోకి వెళ్లిపోయింది. కనీసం తాను ప్రజల కోసం పడిన కష్టానికి ఫలితం దక్కే క్షణాన్ని కూడా ఆమె చూడలేకపోయారనే బాధ స్థానికులను తీవ్రంగా కలచివేసింది. ప్రాణాలతో లేకపోయినా, ఆమెపై ఉన్న అభిమానంతో ప్రజలు ఓట్లు గుమ్మరిస్తారని అప్పుడే గ్రామస్థులు అనుకున్నారు.
ఇక ఇవాళ ఉత్కంఠ నడుమ జరిగిన ఓట్ల లెక్కింపులో బ్యాలెట్లు తెరిచేసరికి ప్రజల తీర్పు స్పష్టమైంది. సమీప వైసీపీ అభ్యర్థిపై గారపాటి దివ్య ఏకంగా 352 ఓట్ల భారీ మెజారిటీతో ఘన విజయం సాధించారు. దివ్య భౌతికంగా మన మధ్య లేకపోయినా, ప్రజలు ఆమెకు వేసిన ప్రతి ఓటు ఆమె నిజాయితీకి, ఆమెపై వారికున్న నమ్మకానికి నిదర్శనంగా నిలిచింది. ఈ గెలుపు వార్త తెలిసిన క్షణంలో కౌంటింగ్ కేంద్రం వద్ద ఉన్న ప్రతీ ఒక్కరి కళ్లూ చెమర్చాయి. ప్రత్యర్థులు సైతం ఆమె మృతికి సంతాపాన్ని ప్రకటింరారు.
ఈ విషాదం ఇంతటితో ఆగలేదు.. గారపాటి దివ్యకు ఇద్దరు పసిపిల్లలు ఉన్నారు. కన్నతల్లి లేని ఆ చిన్నారుల భవిష్యత్తును తలచుకుని గ్రామంలో ప్రతి ఒక్కరూ కన్నీరు పెట్టుకుంటున్నారు. ఒకవైపు జనసేన పార్టీ కార్యకర్తలు ఆమె గెలుపును సంబరంగా చేసుకోవాల్సిన సమయం ఇది, కానీ అభ్యర్థి మరణవార్త ఆ ఆనందాన్ని కాస్తా కన్నీళ్లుగా మార్చేసింది. గెలుపు తెచ్చిన నవ్వుల కంటే, ఆమె మరణం మిగిల్చిన శూన్యమే ఇప్పుడు అందరినీ కలచివేస్తోంది. రాజకీయాల్లో గెలుపు ఓటములు సహజమే కావచ్చు, కానీ ఇలాంటి విజయాలు మాత్రం ఎవరికీ రాకూడదంటూ స్థానికులు ఆవేదన వ్యక్తం చేస్తున్నారు.
