follow us:
భారత సీనియర్ ఫాస్ట్ బౌలర్ మహమ్మద్ షమీ టెస్ట్ క్రికెట్‌కు రిటైర్మెంట్ ప్రకటించాడు. టెస్టుల్లోకి అడుగుపెట్టి సరిగ్గా 13 ఏళ్లు పూర్తయిన రోజైన ఈ నిర్ణయం తీసుకోన్నాడు. అయితే, వన్డేలు, టీ20ల వంటి వైట్ బాల్ ఫార్మాట్లలో, అలాగే ఐపీఎల్‌లో కొనసాగుతానని స్పష్టం చేశాడు. దీనికి సంబంధించి తన ఇన్‌స్టాగ్రామ్‌లో భావోద్వేగ వీడియో, పోస్టును షేర్ చేశాడు.
వైట్ జెర్సీకి వీడ్కోలు పలుకుతున్నాను కానీ, దానితో ముడిపడి ఉన్న జ్ఞాపకాలకు కాదని షమీ వీడియోలు తెలిపాడు. దేశం కోసం ఏదైనా చేయాలనే ఒకే ఒక్క కలతో తన ప్రస్థానం మొదలైందని… తాను ఎదుర్కొన్న ప్రతి గాయం, ప్రతి పోరాటం, ప్రతి వికెట్ తనకు ఎంతో నేర్పాయన్నారు షమీ. టెస్ట్ క్రికెట్ తన జీవితంలో చాలా ప్రత్యేకమైన భాగమని.. ఈరోజు, భారమైన హృదయంతో, మధురమైన జ్ఞాపకాలతో టెస్ట్ క్రికెట్ నుంచి రిటైర్ అవుతున్నానంటూ షమీ తన పోస్టులో తెలిపాడు. ఈ ప్రయాణంలో తనకు అండగా నిలిచిన బీసీసీఐకి, సహచర ఆటగాళ్లకు, కోచ్‌లకు, కుటుంబ సభ్యులకు, అభిమానులకు కృతజ్ఞతలు తెలిపాడు.
2013 నవంబర్ 6న కోల్‌కతాలోని ఈడెన్ గార్డెన్స్‌లో వెస్టిండీస్‌పై అరంగేట్రం చేసిన షమీ, ఆ మ్యాచ్‌లోనే 9 వికెట్లు పడగొట్టి సత్తా చాటాడు. తన కెరీర్‌లో మొత్తం 64 టెస్టులు ఆడి 27.71 సగటుతో 229 వికెట్లు తీశాడు. ఇందులో ఆరు సార్లు ఐదు వికెట్ల ప్రదర్శన ఉంది. టెస్టుల్లో భారత్ తరఫున అత్యధిక వికెట్లు తీసిన ఆరో ఫాస్ట్ బౌలర్‌గా నిలిచాడు.2023లో ఆస్ట్రేలియాతో జరిగిన వరల్డ్ టెస్ట్ ఛాంపియన్‌షిప్ ఫైనల్ షమీకి చివరి టెస్ట్ మ్యాచ్. ఆ తర్వాత గాయాలు, ఫిట్‌నెస్ సమస్యల కారణంగా కొంతకాలంగా జట్టుకు దూరమయ్యాడు. సెలక్టర్లు యువ పేసర్లకు ప్రాధాన్యం ఇస్తుండటంతో, సుదీర్ఘ ఫార్మాట్ భారాన్ని తగ్గించుకుని వైట్ బాల్ క్రికెట్‌పై పూర్తిస్థాయిలో దృష్టి పెట్టాలనే ఉద్దేశంతోనే షమీ ఈ నిర్ణయం తీసుకున్నట్లు తెలుస్తోంది. షమీ రిటైర్మెంట్‌తో భారత పేస్ బౌలింగ్‌లో ఒక ముఖ్యమైన అధ్యాయం ముగిసినప్పటికీ, పరిమిత ఓవర్ల క్రికెట్‌లో అతని ప్రస్థానం కొనసాగనుంది.
మహమ్మద్ షమీ టెస్ట్ క్రికెట్‌కు గుడ్‌బై చెప్పడంపై క్రీడా ప్రపంచం భావోద్వేగానికి గురవుతోంది. టీమిండియాలో అత్యుత్తమ సీమ్ పొజిషన్ ఉన్న బౌలర్‌గా పేరొందిన షమీ నిర్ణయంపై సహచర ఆటగాళ్లు, మాజీ దిగ్గజాలు సోషల్ మీడియా వేదికగా స్పందిస్తున్నారు. భారత రెడ్ బాల్ క్రికెట్‌కు అతను చేసిన సేవలను కొనియాడుతూ అభినందనలు కురిపిస్తున్నారు.షమీ రిటైర్మెంట్‌పై స్పందించిన భారత మాజీ కెప్టెన్ విరాట్ కోహ్లీ.. నువ్వు భారత టెస్ట్ జట్టుకు అందించిన విజయాలు అద్భుతమైనవని, ముఖ్యంగా విదేశీ గడ్డపై నువ్వు వేసిన స్పెల్స్ ఎప్పటికీ గుర్తుండిపోతాయంటూ ట్వీట్ చేశారు. కెప్టెన్ రోహిత్ శర్మ సైతం షమీని ఒక గొప్ప మ్యాచ్ విన్నర్‌గా అభివర్ణించారు. BCCI కూడా షమీకి ప్రత్యేక ధన్యవాదాలు తెలిపింది. భారత పేస్ బౌలింగ్ విభాగాన్ని ప్రపంచంలోనే అత్యుత్తమంగా మార్చడంలో షమీ పాత్ర మరువలేనిదని క్రీడా విశ్లేషకులు అభిప్రాయపడుతున్నారు.
రివర్స్ స్వింగ్ వేయడంలో దిట్ట అయిన షమీ, ఇంగ్లాండ్, సౌతాఫ్రికా, ఆస్ట్రేలియా పర్యటనల్లో భారత్‌కు చారిత్రాత్మక విజయాలు అందించాడు. టెస్ట్ క్రికెట్ భారాన్ని తగ్గించుకున్న షమీ.. ఇకపై వన్డేలు, టీ20లతో పాటు ఐపీఎల్‌పై పూర్తి దృష్టి సారించనున్నాడు. రాబోయే ఐసీసీ వైట్ బాల్ టోర్నీల్లో భారత జట్టుకు తన అనుభవంతో మరిన్ని విజయాలు అందించడమే లక్ష్యంగా పెట్టుకున్నాడు. ఫిట్‌నెస్‌ను కాపాడుకుంటూ పరిమిత ఓవర్ల ఫార్మాట్‌లో మరికొన్నేళ్ల పాటు సత్తా చాటాలని షమీ భావిస్తున్నాడు. ఏది ఏమైనా టెస్ట్ క్రికెట్‌లో మహమ్మద్ షమీ సృష్టించిన ఇంపాక్ట్ సామాన్యమైంది కాదు. వైట్ జెర్సీలో అతని అద్భుతమైన స్పెల్స్ క్రికెట్ అభిమానుల గుండెల్లో ఎప్పటికీ నిలిచిపోతాయి. మరి వైట్ బాల్ క్రికెట్‌లో ఈ స్పీడ్‌స్టర్ ఎలాంటి వండర్స్ క్రియేట్ చేస్తాడో చూడాలి.
