follow us:
పాకిస్థాన్ క్రికెట్‌లో మరోసారి ఊహించని తుఫాన్! టీ20 జట్టు కెప్టెన్సీ నుంచి సల్మాన్ అలీ ఆఘాను అర్ధాంతరంగా తప్పించడమే కాదు… ఏకంగా జట్టు నుంచే పక్కన పెట్టేశారు! దానికి తోడు సీనియర్ బ్యాటర్ బాబర్ అజామ్‌కు కూడా T20 జట్టులో చోటు దక్కలేదు! మరి పాకిస్థాన్ కొత్త టీ20 కెప్టెన్ ఎవరు? PCB తీసుకున్న ఈ సంచలన నిర్ణయాల వెనుక ఉన్న అసలు కారణాలేంటి? పూర్తి వివరాలు చూస్తే…
గత కొంతకాలంగా పాకిస్థాన్ టీ20 జట్టు ప్రదర్శన తీవ్ర నిరాశాజనకంగా సాగుతోంది. సల్మాన్ నాయకత్వంలో గతేడాది ఆసియా కప్ ఫైనల్లో భారత్ చేతిలో ఘోర ఓటమి చవిచూసింది. అంతేకాకుండా, 2026 టీ20 ప్రపంచకప్‌లో కూడా సెమీఫైనల్‌కు చేరకుండానే నిష్క్రమించింది. ఈ వరుస వైఫల్యాలతో పీసీబీ (PCB) సెలెక్టర్లు కఠిన నిర్ణయం తీసుకున్నారు. రాబోయే శ్రీలంక టీ20 సిరీస్ నుంచి సల్మాన్ అలీ ఆఘాను పూర్తిగా పక్కన పెట్టేశారు.
సల్మాన్ స్థానంలో ఓపెనింగ్ బ్యాటర్ సాహిబ్‌జాదా ఫర్హాన్‌కు కెప్టెన్సీ బాధ్యతలు అప్పగించారు. ఫర్హాన్‌కు ఈ పదవి దక్కడం వెనుక బలమైన కారణాలు ఉన్నాయి! ఇటీవల జరిగిన ఆసియా క్రీడల్లో పాకిస్థాన్ జట్టును సమర్థవంతంగా నడిపించి రజత పతకం అందించాడు. అంతేకాదు, 2026 టీ20 వరల్డ్ కప్‌లో అత్యధిక పరుగులు చేసిన బ్యాటర్‌గా కూడా రికార్డు సృష్టించాడు. అతని అద్భుతమైన ఫామ్, లీడర్‌షిప్ స్కిల్స్‌ను చూసే పీసీబీ ఈ కీలక నిర్ణయం తీసుకుంది.
కేవలం కెప్టెన్ మార్పుతోనే ఆగలేదు… జట్టులో యువ రక్తాన్ని నింపేందుకు సెలెక్టర్లు భారీ మార్పులు చేశారు. సీనియర్ ఆటగాడు బాబర్ అజామ్‌తో పాటు స్టార్ పేసర్ షహీన్ షా అఫ్రిదిని టీ20 జట్టుకు ఎంపిక చేయలేదు.అయితే, ఆసియా క్రీడల ఫైనల్లో భారత్‌పై 96 పరుగుల ఊచకోత కోసిన హసన్ నవాజ్ తన స్థానాన్ని నిలబెట్టుకున్నాడు. వీరితో పాటు అబ్దుల్ సమద్, మాజ్ సదాఖత్, అరాఫత్ మిన్హాస్, సుఫియాన్ మొకీమ్‌లకు అవకాశం దక్కింది. పేస్ బౌలింగ్ విభాగంలో నసీమ్ షా తిరిగి రాగా, ఇటీవల ఇంగ్లాండ్ టెస్టులో మెరిసిన స్పిన్నర్/ఆల్‌రౌండర్ రజావుల్లా తొలిసారి వైట్‌బాల్ క్రికెట్‌లోకి అడుగుపెడుతున్నాడు.
శ్రీలంకతో జరిగే 3 మ్యాచ్‌ల టీ20 సిరీస్ రావల్పిండి వేదికగా శుక్రవారం నుంచి ప్రారంభం కానుంది. ఆ తర్వాత అక్టోబర్ 18 నుంచి ఇంగ్లాండ్, శ్రీలంకలతో కలిసి పాకిస్థాన్ వన్డే ట్రై-సిరీస్ ఆడనుంది. విశేషమేమిటంటే… ఈ వన్డే ట్రై-సిరీస్‌కు షహీన్ అఫ్రిది కెప్టెన్‌గా వ్యవహరిస్తుండగా, టీ20ల నుంచి తప్పించిన సల్మాన్ అలీ ఆఘా వన్డే జట్టులో మాత్రం తన స్థానాన్ని కాపాడుకున్నాడు.
