హైదరాబాద్ శివారు ఆదిభట్లలోని ప్రముఖ ఐటీ దిగ్గజం టాటా కన్సల్టెన్సీ సర్వీసెస్ క్యాంపస్ వద్ద గురువారం అనూహ్యంగా హైటెన్షన్ వాతావరణం నెలకొంది. ఎప్పుడూ ప్రశాంతంగా ఉండే ఆ ఐటీ కారిడార్ ఒక్కసారిగా శరణు ఘోషలు, నిరసన నినాదాలతో హోరెత్తిపోయింది. అయ్యప్ప స్వామి దీక్షలో ఉన్న ఒక సాఫ్ట్వేర్ ఉద్యోగిని కంపెనీ లోపలికి రానివ్వకుండా గేటు వద్దే అడ్డుకోవడం పెద్ద వివాదానికి దారితీసింది. అసలు టీసీఎస్ క్యాంపస్ గేటు వద్ద ఏం జరిగింది? డ్రెస్ కోడ్ రూల్స్ పేరుతో యాజమాన్యం ఎందుకు అభ్యంతరం చెప్పింది?
రంగారెడ్డి జిల్లా ఆదిభట్లలోని టీసీఎస్ కార్యాలయంలో మనీష్ అనే టెక్కీ గత రెండేళ్లుగా విధులు నిర్వహిస్తున్నారు. అయితే, ఇటీవల అయ్యప్ప దీక్ష స్వీకరించిన మనీష్, సంప్రదాయబద్ధంగా నల్లటి దీక్షా వస్త్రాలు ధరించి గురువారం డ్యూటీకి హాజరయ్యేందుకు ఆఫీసుకు వచ్చారు. కానీ క్యాంపస్ మెయిన్ గేటు వద్ద ఉన్న సెక్యూరిటీ సిబ్బంది ఆయన్ను అక్కడే నిలిపివేశారు. కంపెనీ డ్రెస్ కోడ్ నిబంధనలకు విరుద్ధంగా ఉన్నారన్న కారణంతో మనీష్ను లోపలికి అనుమతించేది లేదని స్పష్టం చేయడంతో వివాదం మొదలైంది.
సెక్యూరిటీ సిబ్బంది వ్యవహరించిన తీరుపై బాధిత ఉద్యోగి మనీష్ తీవ్ర ఆవేదన వ్యక్తం చేశారు. తాను అయ్యప్ప దీక్ష తీసుకుంటున్న విషయాన్ని రెండు నెలల క్రితమే కంపెనీ మేనేజ్మెంట్కు స్పష్టంగా తెలియజేశానని ఆయన పేర్కొన్నారు. అయినప్పటికీ, ఇప్పుడు డ్రెస్ కోడ్ పాటించలేదంటూ గేటు వద్దే అడ్డుకోవడం దారుణమని వాపోయారు. ఆఫీసులో డ్రెస్ కోడ్ నిబంధనలు పాటించని ఇతర ఉద్యోగులను మాత్రం యథావిధిగా విధులకు అనుమతిస్తున్నారని, కేవలం అయ్యప్ప దీక్షలో ఉన్నందుకే తనను కావాలని టార్గెట్ చేసి అవమానిస్తున్నారని మనీష్ ఆరోపించారు.
ఒక అయ్యప్ప మాలధారి పట్ల ఐటీ కంపెనీ వ్యవహరించిన తీరు బయటకు పొక్కడంతో స్థానికంగా కలకలం రేగింది. సమాచారం అందుకున్న పెద్ద సంఖ్యలో అయ్యప్ప భక్తులు, హిందూ సంఘాల ప్రతినిధులు ఆదిభట్ల టీసీఎస్ క్యాంపస్ వద్దకు చేరుకుని ఆందోళనకు దిగారు. కంపెనీ యాజమాన్య వైఖరికి నిరసనగా మెయిన్ గేటు ఎదుట బైఠాయించి పెద్ద ఎత్తున నినాదాలు చేశారు. దీక్షలో ఉన్న ఉద్యోగికి క్షమాపణ చెప్పి, తక్షణమే విధులకు అనుమతించాలని వారు డిమాండ్ చేయడంతో అక్కడ తీవ్ర ఉద్రిక్తత నెలకొంది.
పరిస్థితి చేయిదాటిపోకుండా ఆదిభట్ల పోలీసులు వెంటనే రంగంలోకి దిగి ఆందోళనకారులతో చర్చించి పరిస్థితిని అదుపులోకి తెచ్చారు. టెక్కీ మనీష్ చేసిన ఆరోపణల నేపథ్యంలోనే భక్తులు నిరసనకు దిగినట్లు పోలీసులు ప్రాథమికంగా నిర్ధారించారు. ఈ ఘటనపై ఇప్పటివరకు తమకు ఎలాంటి అధికారిక ఫిర్యాదు అందలేదని, ప్రస్తుతం క్యాంపస్ వద్ద పరిస్థితి పూర్తిగా ప్రశాంతంగా ఉందని పోలీసులు స్పష్టం చేశారు. అయితే, ఈ వివాదంపై అసలు వాస్తవాలను పరిశీలిస్తున్నామని అధికారులు వెల్లడించారు.
