పసిడి ప్రియులకు అదిరిపోయే శుభవార్త
హైదరాబాద్లో భారీగా పడిపోయిన గోల్డ్ రేట్లు
బంగారం కొనుగోలుదారులకు, ముఖ్యంగా పెళ్లిళ్ల సీజన్లో నగల కోసం ఎదురుచూస్తున్న సామాన్య, మధ్యతరగతి కుటుంబాలకు అదిరిపోయే శుభవార్త! గత కొంతకాలంగా ఆకాశాన్నంటుతూ సామాన్యులకు అందనంత ఎత్తుకు చేరిన పసిడి ధరలకు ఒక్కసారిగా బ్రేక్ పడింది. బ్రేక్ పడటం కాదు.. ఏకంగా కుప్పకూలాయి! హైదరాబాద్ బులియన్ మార్కెట్లో ఇవాళ గోల్డ్, సిల్వర్ రేట్లు ఊహించని రీతిలో పడిపోయాయి. అసలు ఒక్కరోజులోనే 24 క్యారెట్ల, 22 క్యారెట్ల బంగారం ధరలు ఎంత తగ్గాయి? కిలో వెండి ఏ స్థాయికి దిగివచ్చింది? అసలు మార్కెట్లో ఈ స్థాయి కుదుపు రావడానికి కారణాలేంటి? కొనుగోలుదారులు గుర్తుంచుకోవాల్సిన ముఖ్యమైన అంశాలేంటి? పూర్తి వివరాలు ఈ ప్రత్యేక కథనంలో చూద్దాం.
బంగారం షాపు వైపు చూడాలంటేనే భయపడిపోయే పరిస్థితి నుంచి, కాస్త ఊపిరి పీల్చుకునే సమయం వచ్చింది. హైదరాబాద్ బులియన్ మార్కెట్లో ఇవాళ బంగారం ధరలు భారీగా తగ్గుముఖం పట్టాయి. ముఖ్యంగా పెట్టుబడుల కోసం ఉపయోగించే 24 క్యారెట్ల స్వచ్ఛమైన 10 గ్రాముల బంగారం ధరపై ఒక్కరోజులోనే ఏకంగా 5 వేల 120 రూపాయలు తగ్గింది. నిన్నటి వరకు లక్షా 30 వేల మార్కు పైనే ఉన్న తులం బంగారం, ఇవాళ భారీ తగ్గుదలతో లక్షా 25 వేల 570 రూపాయలకు చేరుకోవడం మార్కెట్లో హాట్ టాపిక్గా మారింది.
ఇక సామాన్యులు ఆభరణాల తయారీకి ఎక్కువగా వాడే 22 క్యారెట్ల 10 గ్రాముల పసిడిపై కూడా భారీ ఊరట లభించింది. దీనిపై ఏకంగా 4 వేల 700 రూపాయల తగ్గుదల నమోదైంది. దీంతో ప్రస్తుతం 10 గ్రాముల 22 క్యారెట్ల బంగారం ధర లక్షా 15 వేల 100 రూపాయల వద్ద కొనసాగుతోంది.
బంగారం దారిలోనే వెండి కూడా పయనిస్తోంది. కిలో వెండి ధర ఒక్కరోజులోనే 5 వేల రూపాయలు పడిపోయింది. ప్రస్తుతం హైదరాబాద్ మార్కెట్లో కిలో వెండి ధర లక్షా 75 వేల రూపాయలు పలుకుతోంది. సాధారణంగా అంతర్జాతీయ మార్కెట్లో జరిగే పరిణామాలు మన దేశీయ బులియన్ మార్కెట్పై నేరుగా ప్రభావం చూపుతాయి. అంతర్జాతీయంగా అమెరికా డాలర్ విలువ బలపడటం, అలాగే గరిష్ట స్థాయిల వద్ద పెద్ద ఎత్తున ఇన్వెస్టర్లు లాభాల స్వీకరణకు మొగ్గు చూపడం వల్ల బంగారం, వెండికి డిమాండ్ తగ్గిందని మార్కెట్ నిపుణులు చెబుతున్నారు. అంతేకాకుండా, అంతర్జాతీయ ఆర్థిక గణాంకాలు సానుకూలంగా రావడంతో మదుపరులు సురక్షిత పెట్టుబడి అయిన బంగారం నుంచి తమ పెట్టుబడులను స్టాక్ మార్కెట్ల వైపు మళ్లించడం కూడా ఈ భారీ పతనానికి ఒక ప్రధాన కారణంగా విశ్లేషిస్తున్నారు.
అయితే, ఇక్కడ బంగారం కొనాలనుకునేవారు ఒక ముఖ్యమైన విషయాన్ని తప్పకుండా గుర్తుంచుకోవాలి. బులియన్ మార్కెట్లో ప్రకటించిన ఈ ధరలు కేవలం ప్రాథమిక ధరలు మాత్రమే. మీరు షాపుకు వెళ్లి నగలు కొనుగోలు చేసేటప్పుడు ఈ ధరలపై అదనంగా 3 శాతం జీఎస్టీ చెల్లించాల్సి ఉంటుంది. అంతేకాకుండా, మీరు ఎంచుకునే ఆభరణం డిజైన్ను బట్టి తరుగు, మజూరీ ఛార్జీలు అదనంగా తోడవుతాయి. ఇక దేశంలోని ఇతర నగరాలు, ప్రాంతాలను బట్టి స్థానిక పన్నుల ఆధారంగా ఈ ధరల్లో స్వల్ప తేడాలు ఉండే అవకాశం ఉంది.
ఒక్కరోజులోనే 24 క్యారెట్ల బంగారంపై 5 వేలకు పైగా, 22 క్యారెట్లపై 4 వేల 700, అటు వెండిపై 5 వేల రూపాయల తగ్గుదల నమోదవ్వడం కొనుగోలుదారులకు నిజంగానే మంచి అవకాశం అని చెప్పొచ్చు. అయితే, మార్కెట్ నిపుణుల అంచనా ప్రకారం.. ఈ తగ్గుదల తాత్కాలికమా లేక రానున్న రోజుల్లో ధరలు మరింత దిగివస్తాయా అనేది పూర్తిగా అంతర్జాతీయ మార్కెట్ కదలికలపై ఆధారపడి ఉంటుంది. కాబట్టి బంగారం లేదా వెండి కొనుగోలు చేయాలనుకునేవారు తొందరపడకుండా, కొనుగోలుకు ముందు మీ స్థానిక జ్యువెలరీ షాపుల్లో తాజా ధరలు, జీఎస్టీ, ఇతర ఛార్జీల వివరాలను పూర్తిగా సరిచూసుకోవడం ఉత్తమం.
