ఉద్యోగులకు, ముఖ్యంగా పదవీ విరమణ చేయబోతున్న వారికి EPFO అద్భుతమైన శుభవార్తను అందించాయి. ఇకపై రిటైర్మెంట్ తర్వాత తమ ప్రావిడెంట్ ఫండ్ మొత్తాన్ని ఒకేసారి తీసుకోవాల్సిన అవసరం లేకుండా, అవసరానికి అనుగుణంగా విడతల వారీగా పొందే కొత్త సదుపాయానికి ఈపీఎఫ్ఓ ఆమోదం తెలిపింది. సిస్టమాటిక్ విత్డ్రాయల్ ప్లాన్.. అంటే SWP విధానాన్ని అమలు చేసేందుకు సెంట్రల్ బోర్డ్ ఆఫ్ ట్రస్టీస్ కీలక నిర్ణయం తీసుకుంది.
ఈ కొత్త సిస్టమాటిక్ విత్డ్రాయల్ ప్లాన్ద్వారా ఉద్యోగులు తమ పీఎఫ్ పొదుపు మొత్తాన్ని తమ ప్రాధాన్యత మేరకు నెలవారీగా గానీ, త్రైమాసికంగా గానీ, లేదా అర్ధ వార్షిక వాయిదాలలో గానీ తీసుకునే వెసులుబాటు కలుగుతుంది. దీనివల్ల పదవీ విరమణ తర్వాత ప్రతి నెలా క్రమం తప్పకుండా ఒక స్థిరమైన ఆదాయం లభిస్తుంది. అంతేకాకుండా, ఈపీఎఫ్ఓ ఖాతాలో మిగిలి ఉన్న నిధిపై వడ్డీ రాబడి యథావిధిగా కొనసాగుతుంది. ఫలితంగా సాధారణ పింఛను ప్రయోజనాలకు ఈ పీఎఫ్ వడ్డీ అదనపు ఆదాయంగా తోడవుతుంది.
ఇప్పటివరకు ఉద్యోగులు రిటైర్మెంట్ తర్వాత తమ పీఎఫ్ మొత్తాన్ని పూర్తిగా విత్డ్రా చేసుకుని, ఆ సొమ్మును ఎక్కడ పెట్టుబడి పెట్టాలా అని మార్కెట్లో వెతుక్కోవాల్సి వచ్చేది. కానీ ఎస్డబ్ల్యూపీ ద్వారా ఆ రిస్క్ తప్పుతుంది. ఇందులో ఉద్యోగులకు మూడు రకాల ఎంపికలను ఈపీఎఫ్ఓ అందుబాటులోకి తెచ్చింది. పీఎఫ్ మొత్తాన్ని క్రమం తప్పకుండా నిర్ణీత వాయిదాల రూపంలో తీసుకోవడం. ప్రారంభంలో కొంత మొత్తాన్ని ఏకమొత్తంగా తీసుకుని, మిగిలిన బ్యాలెన్స్ను విడతల వారీగా పొందడం.
మూడో ఆప్షన్ అసలు మొత్తాన్ని అలాగే ఉంచి, దానిపై వచ్చే కేవలం వడ్డీని మాత్రమే విత్డ్రాయల్ చేసుకోవడం. ఈ సౌకర్యం పూర్తిగా ఆప్షనల్ మాత్రమేనని, విత్డ్రాయల్ ప్లాన్ను కచ్చితంగా ఎంచుకోవాలనే నిబంధన గానీ, ఒత్తిడి గానీ ఏమీ ఉండదని ఈపీఎఫ్ఓ స్పష్టం చేసింది.
ఈ విధానం కేవలం ఉద్యోగులకే కాకుండా, అర్హులైన వారి కుటుంబ సభ్యులు లేదా లబ్ధిదారులకు కూడా విస్తరించే అవకాశం ఉండటం విశేషం. దీనివల్ల ఉద్యోగి తదనంతరం కూడా కుటుంబానికి మరింత ఆర్థిక భద్రత, సౌలభ్యం చేకూరుతాయి. పదవీ విరమణ తర్వాత స్థిరమైన ఆదాయాన్ని అందించడం, రీఇన్వెస్ట్మెంట్ రిస్క్లను తగ్గించడం, పీఎఫ్ ఫండ్ స్థిరత్వాన్ని బలోపేతం చేయడంతో పాటు.. గిగ్ మరియు ప్లాట్ఫామ్ వర్కర్లకు సామాజిక భద్రతను విస్తరించడం ఈ సంస్కరణ ప్రధాన లక్ష్యాలుగా ఉన్నాయి. ప్రారంభ దశలో 55 ఏళ్లు పైబడి, రూ. 5 లక్షలకు మించి పీఎఫ్ నిల్వలు కలిగిన సుమారు 6.32 లక్షల మంది ఈపీఎఫ్ సభ్యులకు ఈ ప్రతిపాదిత ఎస్డబ్ల్యూపీ విధానం ద్వారా ప్రధానంగా లబ్ధి చేకూరుతుందని కార్మిక మంత్రిత్వ శాఖ అంచనా వేస్తోంది.
మొత్తంగా చూస్తే, రిటైర్మెంట్ తర్వాత చేతికి వచ్చిన డబ్బును ఎక్కడ ఇన్వెస్ట్ చేయాలి, భద్రత ఉంటుందా లేదా అనే ఆందోళన లేకుండా.. ఈపీఎఫ్ఓలోనే ఉంచుతూ భద్రతతో పాటు మెరుగైన వడ్డీ పొందే అవకాశాన్ని ఈ కొత్త ప్లాన్ కల్పిస్తోంది. ఈపీఎఫ్ఓ తీసుకున్న ఈ నిర్ణయంపై ఉద్యోగ సంఘాల నుంచి కూడా హర్షం వ్యక్తమవుతోంది.
