మల్లన్న కారును ఢీకొట్టిన లారీ.. తృటిలో తప్పిన పెను ప్రమాదం.. చిన్నారికి తీవ్ర గాయాలు!

ఎమ్మెల్సీ తీన్మార్ మల్లన్నకు చెందిన కారును లారీ ఢీ కొట్టింది. వెనుక నుంచి దూసుకొచ్చిన ఒక లారీ.. మల్లన్న కాన్వాయ్‌లోని ఫార్చునర్ కారును అత్యంత బలంగా ఢీకొట్టడంతో ఆ కారు నుజ్జునుజ్జయింది. అదృష్టవశాత్తూ, సరిగ్గా అదే సమయంలో మల్లన్న ఆ కారులో లేకపోవడంతో ఒక పెను ప్రాణాపాయం తృటిలో తప్పింది. కానీ, ఈ ప్రమాదంలో మరో కారు కూడా ధ్వంసమై, అందులోని ఒక కుటుంబం తీవ్ర గాయాలపాలైంది.

యాదాద్రి భువనగిరి జిల్లా మోత్కూరు మండలం అనాజిపురం గ్రామం వద్ద శుక్రవారం ఈ ఘోర ప్రమాదం జరిగింది. మోత్కూరు నుంచి అనాజిపురం మీదుగా తిరుమలగిరి వైపు తీన్మార్ మల్లన్న పాదయాత్ర ఎంతో ఉత్సాహంగా సాగుతోంది. సరిగ్గా అదే క్రమంలో, చౌటుప్పల్ మండలం జై కేసారానికి చెందిన ఒక లారీ వెనుక నుంచి అతివేగంగా దూసుకొచ్చింది. ఆ లారీ నేరుగా మల్లన్న కాన్వాయ్‌లో ఉన్న TS 30 L 444 నంబర్ గల ఫార్చునర్ కారును బలంగా ఢీకొట్టింది. లారీ ఢీకొట్టిన తీవ్రత ఏ స్థాయిలో ఉందంటే, మల్లన్నకు చెందిన ఆ ఫార్చునర్ కారు వెనుక భాగం పూర్తిగా ధ్వంసమైంది.

లారీ బలంగా ఢీకొట్టడంతో మల్లన్న ఫార్చునర్ కారు ఒక్కసారిగా అదుపుతప్పింది. వేగంగా దూసుకెళ్లి, ఎదురుగా వస్తున్న మరో కారును బలంగా ఢీకొట్టింది. ఈ ప్రమాదంలో రెండు కార్లు తీవ్రంగా దెబ్బతిన్నాయి. ఇక ఎదురుగా వచ్చిన కారులో ప్రయాణిస్తున్న తిరుమలగిరికి చెందిన మేడబోయిన శ్రీనాథ్, ఆయన భార్య చందనతో పాటు వారి రెండేళ్ల కుమారుడికి తీవ్ర గాయాలయ్యాయి. అలాగే ఆ కారు డ్రైవర్ సురేష్‌కు, తీన్మార్ మల్లన్న ఫార్చునర్ కారులో ఉన్న మరో ఇద్దరికి కూడా గాయాలైనట్లు తెలుస్తోంది. ముఖ్యంగా ఈ ప్రమాదంలో గాయపడిన భార్యాభర్తలు శ్రీనాథ్, చందనల పరిస్థితి విషమంగా ఉన్నట్లు సమాచారం.

అయితే, ప్రమాదం జరిగిన సమయంలో మల్లన్న కారులో కాకుండా, కాలినడకన పాదయాత్రలో ముందుకు సాగుతుండటంతో తృటిలో పెను ప్రమాదం నుంచి క్షేమంగా బయటపడ్డారు. ఇక ప్రమాదం జరిగిన వెంటనే పాదయాత్రలో ఉన్న కార్యకర్తలు, స్థానికులు స్పందించి సహాయక చర్యలు చేపట్టారు. తీవ్రంగా గాయపడిన దంపతులు, చిన్నారిని వెంటనే 108 అంబులెన్స్‌లో నార్కట్‌పల్లి కామినేని హాస్పిటల్‌కు తరలించారు. కారు డ్రైవర్ సురేష్‌ను మరో వాహనంలో ఆస్పత్రికి పంపించి అత్యవసర వైద్యం అందిస్తున్నారు.

ప్రశాంతంగా సాగుతున్న పాదయాత్రలో వెనుక నుంచి లారీ వచ్చి నేరుగా మల్లన్న కారునే ఢీకొట్టడంపై ఇప్పుడు పలు అనుమానాలు వ్యక్తమవుతున్నాయి. ఇది కేవలం లారీ డ్రైవర్ నిర్లక్ష్యం వల్ల జరిగిన రోడ్డు ప్రమాదమా లేక దీని వెనుక ఏదైనా కుట్ర ఉందా అనే చర్చ మొదలైంది. సమాచారం అందుకున్న పోలీసులు వెంటనే ఘటనా స్థలానికి చేరుకుని ట్రాఫిక్‌ను క్లియర్ చేశారు. ప్రమాదానికి గల అసలు కారణాలపై అన్ని కోణాల్లో వివరాలు సేకరిస్తూ దర్యాప్తు ముమ్మరం చేశారు.