మాజీ మంత్రి శత్రుచర్ల విజయరామరాజు కన్నుమూత.. ఉత్తరాంధ్రలో విషాదం!

ఉత్తరాంధ్ర సీనియర్ రాజకీయ నాయకుడు, మాజీ మంత్రి శత్రుచర్ల విజయరామరాజు కన్నుమూశారు. అనారోగ్య సమస్యలతో విశాఖపట్నంలోని అపోలో ఆసుపత్రిలో ట్రీట్‌మెంట్ తీసుకుంటూ గురువారం మధ్యాహ్నం ఆయన తుదిశ్వాస విడిచారు. ఈ వార్త తెలియగానే పార్వతీపురం మన్యం జిల్లా సహా యావత్ ఉత్తరాంధ్ర రాజకీయ వర్గాల్లో తీవ్ర విషాదం అలముకుంది. విజయరామరాజు మరణవార్త తెలియడంతో ఆయన అభిమానులు, సన్నిహితులు శోక సంద్రంలో మునిగిపోయారు.

1948 ఆగస్టు 4వ తేదీన పార్వతీపురం మన్యం జిల్లా జియ్యమ్మవలస మండలం చినమేరంగి సంస్థాన కుటుంబంలో శత్రుచర్ల విజయరామరాజు జన్మించారు. రాయల్ ఫ్యామిలీ బ్యాక్‌గ్రౌండ్ ఉన్నప్పటికీ, ఆయన ఎప్పుడూ ప్రజలకు అందుబాటులో ఉంటూ తనదైన స్టైల్‌తో ప్రత్యేక గుర్తింపు తెచ్చుకున్నారు. 1978లో జరిగిన ఆంధ్రప్రదేశ్ అసెంబ్లీ ఎన్నికల్లో నాగూరు నియోజకవర్గం నుంచి జనతా పార్టీ అభ్యర్థిగా పోటీ చేసి తొలిసారిగా ఎమ్మెల్యేగా గెలుపొందారు. ఆ తర్వాత కాంగ్రెస్ పార్టీలో చేరి 1983, 1985 ఎన్నికల్లో వరుస విజయాలను తన ఖాతాలో వేసుకుని, ఉత్తరాంధ్ర రాజకీయాల్లో తిరుగులేని లీడర్‌గా తన పట్టును నిరూపించుకున్నారు.

రాష్ట్ర రాజకీయాల్లో తన సత్తా చాటిన విజయరామరాజు, ఆ తర్వాత జాతీయ రాజకీయాల వైపు అడుగులు వేశారు. 1989లో కాంగ్రెస్ పార్టీ తరఫున పార్వతీపురం లోక్‌సభ నియోజకవర్గం నుంచి పోటీ చేసి మొదటిసారి ఎంపీగా పార్లమెంట్‌లో అడుగుపెట్టారు. 1991 ఎన్నికల్లోనూ అదే స్థానం నుంచి మరోసారి విజయం సాధించారు. అనంతరం రాజకీయ సమీకరణాల నేపథ్యంలో తెలుగుదేశం పార్టీలో చేరిన ఆయన, 1998 లోక్‌సభ ఎన్నికల్లో టీడీపీ తరఫున పార్వతీపురం నుంచి మూడోసారి ఎంపీగా గెలిచి హ్యాట్రిక్ సాధించారు. ఇలా అటు అసెంబ్లీలోనూ, ఇటు లోక్‌సభలోనూ గిరిజన, ఉత్తరాంధ్ర ప్రాంతాల గొంతుకను బలంగా వినిపించారు.

పార్లమెంట్ సభ్యుడిగా పనిచేసిన తర్వాత మళ్ళీ రాష్ట్ర రాజకీయాల్లో యాక్టివ్ అయ్యారు శత్రుచర్ల. 1999లో నాగూరు నుంచి, ఆ తర్వాత 2004లో పార్వతీపురం అసెంబ్లీ నియోజకవర్గం నుంచి ఎమ్మెల్యేగా ఎన్నికయ్యారు. దివంగత ముఖ్యమంత్రి వైఎస్ రాజశేఖరరెడ్డి కేబినెట్‌లో అటవీ, పర్యావరణం, సైన్స్ అండ్ టెక్నాలజీ శాఖల మంత్రిగా కీలక బాధ్యతలు నిర్వర్తించారు. అనంతరం ముఖ్యమంత్రి కె. రోశయ్య మంత్రివర్గంలో రవాణా శాఖ మంత్రిగా పనిచేసి తన అడ్మినిస్ట్రేటివ్ స్కిల్స్‌తో రాష్ట్ర రాజకీయాల్లో ప్రత్యేక ప్రాధాన్యతను సంపాదించుకున్నారు.

2014 మార్చిలో చంద్రబాబు సమక్షంలో శత్రుచర్ల విజయరామరాజు తిరిగి తెలుగుదేశం గూటికి చేరారు. ఆయన సుదీర్ఘ రాజకీయ అనుభవాన్ని గుర్తించిన పార్టీ, 2017 మార్చిలో శ్రీకాకుళం స్థానిక సంస్థల నియోజకవర్గం నుంచి MLCగా అవకాశం కల్పించగా, ఆయన ఏకగ్రీవంగా ఎన్నికయ్యారు. 2023 వరకు ఎమ్మెల్సీగా కొనసాగుతూ ప్రజాసేవలో తన అనుభవాన్ని పంచారు. దాదాపు నాలుగున్నర దశాబ్దాల పాటు ఏ పదవిలో ఉన్నా ప్రజల మనిషిగా నిలిచిన ‘మన్యం పులి’ మృతి పట్ల పలువురు రాజకీయ ప్రముఖులు, అభిమానులు తీవ్ర సంతాపం వ్యక్తం చేస్తున్నారు.