follow us:
ప్రముఖ పుణ్యక్షేత్రం శ్రీకాళహస్తి ఆలయంలో భారీ అగ్ని ప్రమాదం చోటుచేసుకుంది. లడ్డూ తయారీ కేంద్రంలో ఒక్కసారిగా సిలిండర్ పేలడంతో భారీ ఎత్తున మంటలు అంటుకుని దట్టమైన పొగ కమ్మేసింది. ఆ క్షణంలో ఏం జరుగుతుందో తెలియక సిబ్బంది, భక్తులు భయంతో పరుగులు తీశారు. ఇక వెంటనే అప్రమత్తమైన అధికారులు అగ్నిమాపక సిబ్బందికి సమాచారమివ్వడంతో స్పాట్ చేరుకుని మంటలు అదుపులోకి తీసుకొచ్చారు.
గురువారం మధ్యాహ్నం సమయంలో శ్రీకాళహస్తీశ్వర స్వామి ఆలయ ప్రాంగణంలోని లడ్డూలు తయారీ కేంద్రంలో ఈ అగ్ని ప్రమాదం చోటు చేసుకుంది. లడ్డూ తయారీ కేంద్రంలో ఉన్న గ్యాస్ సిలిండర్ ఒక్కసారిగా పేలడంతో భారీ ఎత్తున మంటలు చెలరేగాయి. ఈ బ్లాస్ట్ సౌండ్ చాలా తీవ్రంగా రావడంతో ఆలయ పరిసరాల్లో ఒక్కసారిగా భయాందోళనలు నెలకొన్నాయి. మంటలు ఎగిసిపడటంతో పాటు ఆలయ ప్రాంగణమంతా దట్టమైన పొగలు కమ్మేశాయి. ప్రమాదం జరిగిన సమయంలో లడ్డూ తయారీ కేంద్రంలో సిబ్బంది, ఉద్యోగులు తమ డ్యూటీలో నిమగ్నమై ఉన్నారు. మంటలను గమనించిన వెంటనే ప్రాణభయంతో వారంతా బయటకు పరుగులు తీశారు.
ఈ విషయం తెలుసుకున్న వెంటనే అగ్నిమాపక సిబ్బంది, ఆలయ అధికారులు అలర్ట్ అయ్యారు. ఏమాత్రం ఆలస్యం చేయకుండా ఫైర్ ఇంజన్లతో ఘటనా స్థలానికి చేరుకున్న రెస్క్యూ టీమ్, ఆలయ సిబ్బందితో కలిసి మంటలను అదుపులోకి తెచ్చే ప్రయత్నం చేశారు. తీవ్రంగా శ్రమించి మంటలను ఆర్పివేయడంతో పెను ప్రమాదం తప్పింది. అయితే, సిలిండర్ పేలుడు ధాటికి పొగలు దట్టంగా కమ్మేయడంతో లోపల పనిచేస్తున్న సిబ్బందిలో ఎవరికైనా గాయాలయ్యాయా లేదా అనే విషయంపై ఇంకా స్పష్టత రాలేదు. ప్రస్తుతం అధికారులు ఆ వివరాలను సేకరించే పనిలో ఉన్నారు.
నిజానికి శ్రీకాళహస్తి ఆలయ ప్రాంగణంలోనే ఈ లడ్డూ ప్రసాదం తయారీ కేంద్రం ఉంటుంది. ఇక్కడ ప్రతిరోజూ లక్షకు పైగా లడ్డూలను ఎంతో నిష్టతో తయారు చేస్తుంటారు. శివయ్యను దర్శనం చేసుకున్న తర్వాత భక్తులంతా ఎంతో భక్తిశ్రద్ధలతో ఈ లడ్డూ ప్రసాదాన్ని స్వీకరిస్తారు. అయితే, లడ్డూల తయారీ కోసం ఈ తయారీ కేంద్రంలో ఎప్పుడూ పెద్ద మొత్తంలో స్వచ్ఛమైన నెయ్యి, ఇతర సుగంధ ద్రవ్యాలు స్టాక్ ఉంటాయి. ప్రమాదం జరిగిన సమయంలో పొయ్యిల మీద వేడి వేడి నెయ్యి మరుగుతూ ఉంది. సరిగ్గా అదే టైమ్‌లో గ్యాస్ సిలిండర్ పేలడం వల్ల మంటలు ఇంత వేగంగా వ్యాపించాయి.
ఒక్కసారిగా భారీ పేలుడు శబ్దం రావడం, ఆకాశంలోకి పొగలు ఎగసిపడటంతో లడ్డూ పోటుకు సమీపంలో దర్శనం కోసం వేచి ఉన్న భక్తులు కూడా తీవ్ర భయాందోళనలకు గురై అక్కడి నుంచి పరుగులు తీశారు. ప్రస్తుతం పరిస్థితి అదుపులోకి రావడంతో ఆలయ అధికారులు భక్తులకు, స్థానికులకు కీలక విజ్ఞప్తి చేశారు. ఈ ఘటనపై ఎవరూ ఎలాంటి ఆందోళన చెందాల్సిన అవసరం లేదని, పుకార్లను నమ్మవద్దని స్పష్టం చేశారు. ఆలయ ప్రాంగణంలో జరుగుతున్న సహాయక చర్యలకు, క్లీనింగ్ ప్రాసెస్‌కు భక్తులంతా సహకరించాలని కోరారు.
