follow us:
రాజధాని నగరం హైదరాబాద్‌పై ఒక నిశ్శబ్ద మహమ్మారి పడగ విప్పుతోందా? అంటే అవుననే సమాధానాలు వినిపిస్తున్నాయి. గత 7 నెలల డేటాను పరిశీలిస్తే బయటపడిన నిజాలు వెన్నులో వణుకు పుట్టించేలా చేస్తున్నాయి. నగరంలోని ప్రముఖ ప్రభుత్వ, ప్రైవేటు హాస్పిటళ్లలో నమోదైన క్యాన్సర్ కేసుల సంఖ్య ఏకంగా 35 వేలకు చేరుకుంది. చాప కింద నీరులా విస్తరిస్తున్న ఈ ప్రాణాంతక వ్యాధిని అరికట్టేందుకు తెలంగాణ ప్రభుత్వం కీలక నిర్ణయం తీసుకుంది. అసలు ఏయే క్యాన్సర్లు ఏ స్థాయిలో పెరుగుతున్నాయి? ప్రభుత్వం తీసుకొచ్చిన కొత్త రూల్స్ ఏమిటి?
రాజధానిలోని నిమ్స్ , ఎంఎన్‌జే , బసవతారకం, కిమ్స్ , అపోలో, యశోద, మెడికవర్, ఏఐజీ వంటి ప్రముఖ ఆసుపత్రుల గణాంకాలను పరిశీలిస్తే పరిస్థితి తీవ్రత అర్థమవుతోంది. ఈ క్రమంలో ప్రతి క్యాన్సర్ కేసును పక్కాగా రికార్డ్ చేసేందుకు ప్రభుత్వం ‘క్యాన్సర్ రిజిస్ట్రీ’ విధానాన్ని అమల్లోకి తెచ్చింది. మోహదీ నవాజ్ జంగ్ ప్రభుత్వ క్యాన్సర్ ఆసుపత్రిని సెంటర్ ఆఫ్ ఎక్సలెన్స్‌గా నిర్ధారించారు. నగరంలోని అన్ని ఆసుపత్రులు, అల్ట్రాసౌండ్ కేంద్రాలు, డయాగ్నొస్టిక్ సెంటర్లు నిర్ధారణ అయిన 30 రోజుల్లోగా పోర్టల్‌లో డేటాను తప్పనిసరిగా నమోదు చేయాలని ప్రభుత్వం ఆదేశించింది.
అధికారిక డేటా ప్రకారం.. మహిళల్లో ఎక్కువగా రొమ్ము, సర్వైకల్ క్యాన్సర్లు పెరుగుతుండగా, హెడ్ అండ్ నెక్ క్యాన్సర్లు తదుపరి స్థానాల్లో ఉన్నాయి. మహిళల్లో అవగాహన లోపం, ఎవరేం అనుకుంటారోనన్న భయం వల్ల ప్రారంభ దశలోనే బయటకు చెప్పుకోలేక వ్యాధిని కొనితెచ్చుకుంటున్నారు. మరోవైపు నోటి క్యాన్సర్లు విపరీతంగా పెరుగుతున్నట్లు డేటా చెప్తోంది. పొగతాగడం, గుట్కా, జర్దా నమలడం వల్ల నోటిలో వచ్చే చిన్న చిన్న పుండ్లను సాధారణమైనవిగా భావించి నిర్లక్ష్యం చేయడం వల్ల పరిస్థితి చివరకు చేయిదాటిపోతోంది.
ప్రస్తుతం అందుబాటులోకి వచ్చిన డేటా ప్రకారం అత్యంత ఆందోళనకరమైన విషయం ఏమిటంటే.. దాదాపు 60 నుంచి 70 శాతం కేసులు వ్యాధి తీవ్రత ముదిరిన తర్వాతే వైద్యుల వద్దకు వస్తున్నాయి. తొలి దశలోనే గుర్తించి సరైన ట్రీట్‌మెంట్ తీసుకుంటే క్యాన్సర్‌ను పూర్తిగా నయం చేసే అవకాశాలు ఉన్నప్పటికీ, ప్రజల్లో ఉన్న అవగాహన లోపమే శాపంగా మారుతోందని ప్రభుత్వ వర్గాలు వెల్లడిస్తున్నాయి. వ్యాధి ఏ స్థాయిలో ఉందో తెలుసుకోవడం వల్ల రోగులకు మెరుగైన వైద్యం అందించేందుకు ఈ డిజిటల్ డేటా ఎంతగానో ఉపయోగపడుతుందని నిపుణులు స్పష్టం చేస్తున్నారు.
ఏ ఏ ప్రాంతాల నుంచి ఎక్కువ కేసులు వస్తున్నాయి, ఏ రకమైన క్యాన్సర్లు వ్యాపిస్తున్నాయో తెలుసుకోవడం ద్వారా నియంత్రణ చర్యలపై అధికారులకు స్పష్టత రానుంది. నివారణ చర్యల కోసం పాలసీల రూపకల్పన, నిధుల కేటాయింపు, ప్రత్యేక అవగాహన కార్యక్రమాలు చేపట్టడానికి ఈ డేటా కీలకం కానుంది. చిన్న లక్షణాన్ని కూడా నిర్లక్ష్యం చేయకుండా వెంటనే స్క్రీనింగ్ చేయించుకోవాలని వైద్యులు కోరుతున్నారు. మీ ఆరోగ్యం పట్ల అప్రమత్తంగా ఉండాలంటూ వైద్యులు సూచిస్తున్నారు.
