రైల్వే ప్రయాణికులకు గుడ్ న్యూస్..! 18 రైళ్లలో కీలక మార్పులు.. టికెట్ ధరలు తగ్గనున్నాయా?

ప్రతిరోజూ రైళ్లలో ప్రయాణించే లక్షలాది మంది జేబులపై పడుతున్న అదనపు భారాన్ని తగ్గించేందుకు రైల్వే శాఖ ఒక సంచలన నిర్ణయం తీసుకుంది. 2027 జనవరి 1వ తేదీ నుంచి ఏకంగా 18 రైళ్ల రూపురేఖలు మారిపోబోతున్నాయి. ఉత్తర రైల్వే పరిధిలోని 18 రైళ్లకు సూపర్‌ఫాస్ట్ హోదాను తొలగించి, సాధారణ ఎక్స్‌ప్రెస్ రైళ్లుగా మార్చనుంది. దీంతో టికెట్ల ధరలు కూడా తగ్గనున్నాయి. అసలు రైల్వే శాఖ ఎందుకు ఈ నిర్ణయం తీసుకోవాల్సి వచ్చింది? ఏ ఏ రైళ్లకు సూపర్‌ఫాస్ట్ హోదా రద్దవుతోంది?

నార్త్ రైల్వే పరిధిలో నడుస్తున్న 18 కీలకమైన రైళ్లకు సంబంధించి రైల్వే బోర్డు ఒక కీలక నిర్ణయాన్ని ప్రకటించింది. 2027 జనవరి 1 నుంచి ఈ 18 రైళ్లకు ఉన్న ‘సూపర్‌ఫాస్ట్’ హోదాను పూర్తిగా తొలగించి, వాటిని సాధారణ ఎక్స్‌ప్రెస్ రైళ్లుగా వర్గీకరించనున్నారు. సాధారణంగా సూపర్‌ఫాస్ట్ హోదా కలిగిన రైళ్లు నిర్ణీత సగటు వేగంతో ప్రయాణించాల్సి ఉంటుంది. కానీ, సాంకేతిక కారణాలు, మార్గ మధ్యంలో ఎదురవుతున్న జాప్యం వల్ల ఈ రైళ్లు నిర్దేశిత స్పీడ్‌ను అందుకోలేకపోతున్నాయి. అందుకే వీటి హోదాను మారుస్తున్నట్లు రైల్వే వర్గాలు స్పష్టం చేశాయి.

రైల్వే శాఖ తీసుకున్న ఈ నిర్ణయం వల్ల ప్రయాణికులకు ప్రత్యక్షంగా ఆర్థికంగా పెద్ద లబ్ధి చేకూరనుంది. సాధారణంగా సూపర్‌ఫాస్ట్ రైళ్లలో ప్రయాణించే ప్రతి ఒక్కరి నుంచి రైల్వే శాఖ ‘సూపర్‌ఫాస్ట్ సర్‌ఛార్జ్’ పేరుతో అదనపు రుసుము వసూలు చేస్తుంది. అయితే ఇప్పుడు ఈ 18 రైళ్లను సాధారణ ఎక్స్‌ప్రెస్ రైళ్లుగా మార్చడం వల్ల ప్రయాణికులపై ఈ సర్‌ఛార్జ్ భారం పూర్తిగా తొలగిపోనుంది. ఫలితంగా ఈ రైళ్లలో టికెట్ ధరలు తగ్గి, ప్రయాణం మరింత ఆదా కానుంది.

వర్గీకరణ మారడమే కాకుండా ఈ రైళ్ల గుర్తింపులో కూడా మార్పులు చోటుచేసుకోనున్నాయి. ఉత్తర రైల్వేలోని ఈ 18 రైళ్లతో పాటు, నార్త రైల్వే పరిధిలోని కొన్ని రైళ్లకు కూడా కొత్తగా రైలు నంబర్లు కేటాయించనున్నారు. 2027 జనవరి 1 నుంచి అమల్లోకి రానున్న ఈ కొత్త వ్యవస్థ కారణంగా ప్రయాణికులు పాత నంబర్లతో టికెట్లు బుక్ చేసుకునేటప్పుడు లేదా రైళ్ల సమయాలు చూసేటప్పుడు కన్ఫ్యూజ్ అయ్యే అవకాశం ఉంది.

ఈ నేపథ్యంలో రైల్వే శాఖ ప్రయాణికులకు ఓ కీలక సూచన చేసింది. 2027 జనవరి 1 లేదా ఆ తర్వాత ప్రయాణించే ప్యాసింజర్లు ముందస్తుగా రైలు నంబర్లు, మారిన టికెట్ ఛార్జీలు, తాజా టైమ్‌టేబుల్‌ను భారతీయ రైల్వే అధికారిక వెబ్‌సైట్ లేదా ఐఆర్‌సిటిసి యాప్ ద్వారా సరిచూసుకోవాలని కోరింది. ప్రయాణంలో ఎలాంటి ఇబ్బందులు తలెత్తకుండా ఉండటానికి ఈ జాగ్రత్తలు తప్పనిసరి. రైల్వే శాఖ తీసుకున్న ఈ నిర్ణయంపై మీ అభిప్రాయాన్ని కామెంట్ రూపంలో తెలియజేయండి.