follow us:
హైదరాబాద్ లో నెంబర్ ప్లేట్ లేకుండా, చెవుల్లో హియర్ ఫోన్స్ పెట్టుకుని బైక్ నడుపుతున్నారా.. అయితే ఇలాంటి వారిపై ఓ కన్నేసింది పోలీస్ శాఖ. సీపీ సజ్జనార్ ఆధ్వర్యంలో చేపట్టిన ‘ఆపరేషన్ కవచ్ తనిఖీల్లో ఇప్పటికీ అనేక మందిని అరెస్ట్ చేశారు. అసలు హైదరాబాద్ నగరంలో ఈ ఆకస్మిక తనిఖీలు ఎందుకు చేపట్టారు? ‘ఆపరేషన్ కవచ్’ అసలు ఉద్దేశం ఏమిటి? ఎవరెవరిని టార్గెట్ చేసి ఈ మెగా డ్రైవ్ నిర్వహించారు?
భాగ్యనగరంలో శాంతిభద్రతల పరిరక్షణ కోసం, అలాగే ఎలాంటి అసాధారణ సంఘటనలు జరగకుండా ముందస్తుగా నేరాలను అణచివేయడానికి హైదరాబాద్ పోలీసులు సరికొత్త వ్యూహాన్ని అమలు చేశారు. ఇందులో భాగంగానే నగరవ్యాప్తంగా ‘ఆపరేషన్ కవచ్’ ను విజయవంతంగా నిర్వహించామని హైదరాబాద్ పోలీస్ కమిషనర్ సజ్జనర్ స్వయంగా వెల్లడించారు. నగరంలోని సుమారు వందకు పైగా ప్రాంతాలను, సమస్యాత్మక జోన్లను టార్గెట్ చేసుకుని ఏకకాలంలో ఈ తనిఖీలు చేపట్టినట్లు ఆయన స్పష్టం చేశారు. నేరాల నియంత్రణే లక్ష్యంగా పోలీసులు ఈ ప్లాన్‌ను అమలు చేయడం ప్రాధాన్యత సంతరించుకుంది.
ఈ ఆపరేషన్ కేవలం పోలీస్ స్టేషన్లకే పరిమితం కాలేదు. స్వయంగా పోలీసు బాస్‌లు రోడ్లపైకి వచ్చి గ్రౌండ్ లెవెల్‌లో పర్యవేక్షించడం విశేషం. పాతబస్తీ నుంచి శంషాబాద్ వరకు ఉన్న వివిధ ప్రాంతాలలో డీసీపీలు , ఏసీపీలు , వందలాది మంది పోలీసు సిబ్బందితో కలిసి సీపీ సజ్జనర్ స్వయంగా రంగంలోకి దిగి తనిఖీలను పర్యవేక్షించారు. రాత్రి వేళల్లో ప్రధాన జంక్షన్లలో అనుమానాస్పదంగా తిరుగుతున్న వ్యక్తులను ఆపి తనిఖీ చేశారు. వాహనాల డాక్యుమెంట్లను పరిశీలించడంతో పాటు, ప్రజలకు ఎలాంటి ఇబ్బందులు కలగకుండా ఈ ఆపరేషన్‌ను పక్కాగా అమలు చేశారు.
ఈ స్పెషల్ డ్రైవ్‌లో నిబంధనలకు విరుద్ధంగా వాహనాలు నడుపుతున్న యువకులు, రౌడీషీటర్లపై పోలీసులు గట్టిగా స్పందించారు. ముఖ్యంగా ఎలాంటి నంబర్ ప్లేట్లు లేని బైక్‌లను నడుపుతున్న వారిని, చెవుల్లో ఇయర్‌ఫోన్స్ పెట్టుకుని డ్రైవింగ్ చేస్తూ ప్రాణాల మీదకు తెచ్చుకుంటున్న వారిని గుర్తించి అదుపులోకి తీసుకున్నారు. నంబర్ ప్లేట్ లేకపోవడం వల్ల నేరాలకు పాల్పడి సులభంగా తప్పించుకోవచ్చని భావిస్తున్న అసాంఘిక శక్తుల భరతం పట్టడమే ఈ తనిఖీల ముఖ్య ఉద్దేశం. ప్రతి బైక్‌కు నంబర్ ప్లేట్ విధిగా ఉండాలని, ట్రాఫిక్ రూల్స్ ఉల్లంఘిస్తే ఉపేక్షించేది లేదని సీపీ గట్టిగా హెచ్చరించారు.
రోడ్డు భద్రతను, నగర శాంతిభద్రతలను విస్మరిస్తే ఎంతటివారైనా సరే తీవ్ర పరిణామాలు ఎదుర్కోవాల్సి ఉంటుందని పోలీసులు మరోసారి స్పష్టం చేశారు. భవిష్యత్తులో కూడా ఇలాంటి ఆకస్మిక ‘ఆపరేషన్ కవచ్’ డ్రైవ్‌లు కొనసాగుతాయని, వాహనదారులు అన్ని నిబంధనలను ఖచ్చితంగా పాటించాలని అధికారులు కోరుతున్నారు. నగర ప్రజల రక్షణే ధ్యేయంగా పోలీసులు చేపట్టిన ఈ భారీ ఆపరేషన్ ఇప్పుడు సర్వత్రా చర్చనీయాంశమైంది.
