ఏపీకి మరో తుపాను గండం.. బంగాళాఖాతంలో అల్పపీడనం.. ఈ జిల్లాలకు వర్ష సూచన ఉందా?

ఒకవైపు ఎన్నికల పోరుతో రాష్ట్రం అట్టుడుకుతుంటే, మరోవైపు వరుస తుపానుల గండం ఏపీ తీర ప్రాంత ప్రజలను తీవ్ర భయాందోళనకు గురిచేస్తోంది. ఇప్పటికే అర్నబ్, మురసు తుఫాను కారణంగా రూ. 5000 కోట్ల నష్టం వాటిల్లినట్లుగా అధికారులు అంచనా వేశారు. అయితే ఇప్పుడు బంగాళాఖాతంలో మరో కొత్త తుపాను ముప్పు పొంచి ఉందనే హెచ్చరికలు ఏపీ ప్రజలకు వెన్నులో వణుకు పుట్టించేలా చేస్తుంది. నవంబర్ రెండో వారంలో రాబోతున్న ఆ కొత్త తుపాను నిజంగానే ఏపీని తాకనుందా? అసలేం జరగబోతోంది..?

వాతావరణ శాఖ విడుదల చేసిన ఒక హెచ్చరిక రాష్ట్ర ప్రజలను కలవరపెడుతోంది. నవంబర్ రెండో వారం అంటే.. 9 నుంచి 16 తేదీల మధ్య బంగాళాఖాతంలో కొత్తగా మరో అల్పపీడనం ఏర్పడే అవకాశం ఉందంటూ వాతావరణ శాఖ అధికారులు అంచనా వేస్తున్నారు. సముద్రంలో ఏర్పడే ఆవర్తనం బలపడి తుపానుగా మారే అవకాశాలు కొంత మేరకు ఉన్నట్లు అనుమానిస్తున్నారు. అయితే ప్రపంచ వాతావరణ సంస్థ నిబంధనల ప్రకారం రాబోచే తుఫానుకు ఇరాన్ దేశం ‘అక్వాన్’ అనే పేరును సూచించారు. ఇకపోతే, ఇది ప్రస్తుతం వాతావరణ నమూనాల అంచనా మాత్రమేనని, తుపాను ముప్పు పూర్తిగా ఖరారు కాలేదని, ప్రజలు ఎలాంటి వదంతులను నమ్మి ఆందోళన చెందవద్దని అధికార వర్గాలు స్పష్టం చేస్తున్నాయి. అయినప్పటికీ, ముందస్తు జాగ్రత్త చర్యల్లో భాగంగా యంత్రాంగం అప్రమత్తమైంది.

ఒకవేళ ఈ అల్పపీడనం బలపడితే, దీని ప్రభావం బంగ్లాదేశ్ సరిహద్దుల నుండి ఉమ్మడి గోదావరి జిల్లాలు, కాకినాడ, దక్షిణ కోస్తా తీరం వరకు విస్తరించే అవకాశం ఉందని అంచనా వేస్తున్నారు. ఇప్పటికే ఆంధ్రప్రదేశ్‌ను ‘అర్నాబ్’, ‘మురుసు’ వంటి వరుస తుపానులు ఎంతగా అతలాకుతలం చేశాయో మనందరికీ తెలుసు. ఈ రెండు తుపాన్ల తీవ్ర ధాటికి ఏపీ దాదాపు రూ. 5,000 కోట్ల మేర భారీ ఆర్థిక నష్టాన్ని చవిచూడాల్సి వచ్చింది. ముఖ్యంగా కాకినాడ, అంబేడ్కర్ కోనసీమ జిల్లాల్లో వేల ఎకరాల పంటలు నీటమునిగి, ఆస్తులు ధ్వంసమయ్యాయి. ఆ బాధితులకు సంబంధించిన పునరావాస, సహాయక చర్యలు ఇంకా గ్రౌండ్ లెవెల్‌లో కొనసాగుతూనే ఉన్నాయి. ఇలాంటి పరిస్థితుల్లో మళ్లీ తుపాను వార్తలు రావడంతో రైతన్నలు, తీర ప్రాంత ప్రజలు తీవ్ర దిగ్భ్రాంతికి గురవుతున్నారు.

మొత్తానికి చూస్తే భవిష్యత్తులో రాగల వాతావరణ మార్పులను ఎదుర్కొనేందుకు ప్రభుత్వం సిద్ధమవుతోంది. మత్స్యకారులు ఎవరూ సముద్రంలోకి వేటకు వెళ్లవద్దని, రైతులు తమ వ్యవసాయ ఉత్పత్తులను రక్షించుకోవడానికి తగిన జాగ్రత్తలు తీసుకోవాలని హెచ్చరికలు జారీ అవుతున్నాయి. ప్రకృతి వైపరీత్యాలను మనం ఆపలేకపోయినా, ముందస్తు జాగ్రత్తలతో ప్రాణ నష్టాన్ని పూర్తిగా నివారించవచ్చని.. ప్రజలంతా అప్రమత్తంగా ఉండాలంటూ అధికారులు కీలక సూచనలు చేస్తున్నారు.