follow us:
దేశ రాజధాని ఢిల్లీ పాత నగరంలో ఇప్పుడు వరుస భవన ప్రమాదాలు తీవ్ర కలకలం రేపుతున్నాయి. ముఖ్యంగా అత్యంత రద్దీగా ఉండే చావ్రీ బజార్, చారిత్రక ప్రాంతమైన చాందినీ చౌక్‌లలో వరుసగా ప్రమాదాలు చోటుచేసుకోవడం స్థానికులను, షాపర్లను తీవ్ర భయాందోళనకు గురిచేసింది. చావ్రీ బజార్‌లో నిర్మాణాత్మకంగా ఉన్న ఒక మూడంతస్తుల భవనం నిన్న ఉదయం ఒక్కసారిగా కుప్పకూలడంతో ఇద్దరు ప్రాణాలు కోల్పోగా, శిథిలాల కింద మరికొందరు చిక్కుకున్నట్లు తెలుస్తోంది. మరోవైపు 160 సంవత్సరాల చరిత్ర కలిగిన టౌన్‌హాల్ భవనం కూడా కూలిపోయింది.
పాత ఢిల్లీలోని చావ్రీ బజార్ మెట్రో స్టేషన్ సమీపంలో ఉన్న గలీ సితారా ప్రాంతంలో ఉదయం సుమారు 9.50 గంటల సమయంలో నిర్మాణాత్మకంగా ఉన్న మూడంతస్తుల భవనం ఒకేసారి నేలమట్టమైంది. స్లాబ్ వేస్తున్న సమయంలో ఈ ప్రమాదం జరిగిందని తెలుస్తోంది. పెద్ద శబ్దంతో భవనం కూలిపోవడంతో చుట్టుపక్కల ప్రజలు భూకంపం వచ్చిందేమోనని తీవ్ర భయంతో బయటకు పరుగులు తీశారు. సమాచారం అందుకున్న వెంటనే ఆరు ఫైర్ యూనిట్లు, రెస్క్యూ వాహనాలతో పాటు పోలీసు బలగాలు అక్కడికి చేరుకుని శిథిలాల కింద చిక్కుకున్న వారిని బయటకు తీసి ముమ్మర సహాయక చర్యలు చేపట్టారు.
చావ్రీ బజార్ ఘటనకు ముందే, చాందినీ చౌక్‌లో ఉన్న 160 ఏళ్లకు పైగా చరిత్ర కలిగిన చారిత్రక ‘టౌన్‌హాల్’ భవనంలో కొంత భాగం కూడా కూలిపోవడం అధికారులను దిగ్భ్రాంతికి గురిచేసింది. ఢిల్లీ మున్సిపల్ కార్పొరేషన్ ఆధీనంలో ఉన్న ఈ గ్రేడ్-1 హెరిటేజ్ కట్టడంలో కారిడార్లు, పైకప్పు, ప్రవేశ ద్వారం వద్ద ఉన్న గోడలు దెబ్బతిన్నాయి. దశాబ్ద కాలంగా హెరిటేజ్ నిపుణులు ఈ పాత కట్టడాల పరిరక్షణపై హెచ్చరిస్తున్నప్పటికీ, సరైన నిర్వహణ లేకపోవడం వల్లే ఈ చారిత్రక భవనాలు శిథిలావస్థకు చేరుకుని ప్రమాదాలకు కారణమవుతున్నాయని విమర్శలు వినిపిస్తున్నాయి.
పాత ఢిల్లీ ప్రాంతాల్లో 80 నుండి 100 సంవత్సరాల నాటి పాత భవనాలు అనేకం ఉన్నాయి. వాటిలో నిర్దేశిత ప్రమాణాలు పాటించకుండా గోదాములుగా, అక్రమ నిర్మాణాలుగా మార్చడం ప్రధాన ముప్పుగా మారింది. గలీ సితారా భవన ప్రమాదంపై కేసు నమోదు చేసిన పోలీసులు, అక్రమ నిర్మాణంపై గతంలో వచ్చిన ఫిర్యాదులను, కాంట్రాక్టర్ నిర్లక్ష్యాన్ని విచారిస్తున్నారు. కాంట్రాక్టర్‌పై ఎఫ్‌ఐఆర్‌తో పాటు బాధ్యులైన ఇంజనీర్లపై చర్యలకు ఆదేశాలు జారీ అయ్యాయి. పాత భవనాల పటిష్టతపై మున్సిపల్ కార్పొరేషన్ సరైన తనిఖీలు చేపట్టపోవడమే ఈ వరుస ప్రమాదాలకు కారణమని స్థానికులు ఆరోపిస్తున్నారు.
పండుగల సీజన్ కావడంతో చాందినీ చౌక్, చావ్రీ బజార్ వంటి మార్కెట్లలో వేల సంఖ్యలో షాపర్లు, ప్రజలు తిరుగుతుంటారు. ఇలాంటి రద్దీ ప్రాంతాల్లో నిబంధనలకు విరుద్ధంగా జరిగే నిర్మాణాలు, పాత భవనాల పట్ల అధికారులు తక్షణమే కఠిన చర్యలు తీసుకోవాల స్థానికులు కోరుతున్నారు.
