follow us:
ఖమ్మం జిల్లా సత్తుపల్లి మండలంలో భారీ వర్షాల నేపథ్యంలో వాగులు, చెరువులు పొంగిపొర్లుతున్నాయి. బేతుపల్లి పెద్ద చెరువులో ఒక్కసారిగా వరద ఉధృతి పెరిగింది. దీంతో చేపల వేటకు వెళ్లిన 8 మంది జాలర్లు చిక్కుకున్నారు. అందులో ఐదుగురిని అధికారులు సురక్షితంగా కాపాడారు. మిగిలిన ముగ్గురిని కాపాడే ప్రయత్నంలో 11 మంది SDRF సిబ్బంది ప్రమాదవశాత్తు గల్లంతయ్యారు. అయితే అందులో ఐదుగురు SDRF సిబ్బంది నిన్న సురక్షితంగా బయటపడగా..మరో ఆరుగురు కూడా క్షేమంగా బయటపడినట్లు అధికారులు తెలిపారు.
కొన్ని రోజులుగా కురుస్తున్న భారీ వర్షాల కారణంగా సత్తుపల్లి మండలంలోని బేతుపల్లి పెద్ద చెరువు ఉధృతంగా ప్రవహిస్తూ అలుగు పారుతోంది. ఈ క్రమంలో, చెరువులోని చేపలు బయటకు కొట్టుకుపోకుండా అడ్డుకునేందుకు వలలు వేసేందుకు ఐదుగురు జాలర్లు చెరువులోకి వెళ్లారు. అయితే నీటి ఉధృతి ఒక్కసారిగా తీవ్రం కావడంతో వారు వరద ప్రవాహం మధ్యలో చిక్కుకుపోయారు. వారిని కాపాడటానికి తెప్పలపై వెళ్లిన మరికొందరితో కలిపి మొత్తం ఎనిమిది మంది నీటిలో చిక్కుకున్నారు. సమాచారం అందుకున్న స్థానిక అగ్నిమాపక బృందం వెంటనే స్పందించి పడవలపై వెళ్లి ముగ్గురిని సురక్షితంగా ఒడ్డుకు చేర్చింది. మిగిలిన ఐదుగురు మత్స్యకారులు చెరువు మధ్యలోనే ఓ మట్టి దిబ్బపై ఉండిపోయారు.
మట్టిదిబ్బపై చిక్కుకున్న ఆ ఐదుగురు మత్స్యకారులను రక్షించేందుకు రాత్రి 7.30 గంటల సమయంలో ఒక భారీ రెస్క్యూ ఆపరేషన్ ప్రారంభమైంది. కొత్తగూడెం బెటాలియన్‌కు చెందిన ఆరుగురు పోలీసులు, నలుగురు అగ్నిమాపక సిబ్బందితో కూడిన 10 మంది ఎస్‌డీఆర్‌ఎఫ్ టీం.. ఒక స్థానికుడిని వెంటబెట్టుకుని రెండు సేఫ్టీ బోట్లలో చెరువులోకి బయలుదేరింది. కానీ దురదృష్టవశాత్తూ, చెరువు అలుగు పారుతున్న చోట వరద ఉధృతి ఊహించని విధంగా ఉండటంతో ఆ రెండు బోట్లు ఒక్కసారిగా తిరగబడ్డాయి. దీంతో పడవల్లో ఉన్న 11 మందీ ఆ చీకట్లో ఉధృతమైన వరద నీటిలోకి కొట్టుకుపోయారు. ఆపన్నులను రక్షించాల్సిన దళమే ప్రమాదంలో పడటంతో ఒక్కసారిగా జిల్లా యంత్రాంగం ఉలిక్కిపడింది.రంగంలోకి దిగిన విజయవాడ ఎన్‌డీఆర్‌ఎఫ్ బృందం.. ఆ మట్టిదిబ్బ వద్దకు చేరుకుని, ఐదుగురు మత్స్యకారులను సురక్షితంగా ఒడ్డుకు తీసుకువచ్చింది. మత్స్యకారులు ప్రాణాలతో బయటపడినప్పటికీ.. వారిని రక్షించడానికి వెళ్లిన సిబ్బంది ఆచూకీ లభించకపోవడం తీవ్ర ఆందోళన రేకెత్తించింది.
రాత్రి ప్రతికూల వాతావరణం, దట్టమైన చీకటి ఉన్నప్పటికీ కలెక్టర్ దివాకర టీఎస్, స్థానిక ఎమ్మెల్యే మట్టా రాగమయి ఘటనా స్థలంలోనే ఉండి సహాయక చర్యలను స్వయంగా పర్యవేక్షించారు. వరదలో కొట్టుకుపోయిన సిబ్బందిలో కొందరు తమతో ఫోన్‌లో మాట్లాడారని జిల్లా అగ్నిమాపక అధికారి అజయ్ కుమార్ తెలిపారు. ఆ కమ్యూనికేషన్ ఆధారంగా రాత్రి 2.15 గంటలకు ఒకరిని, తెల్లవారుజామున 3.00 గంటల ప్రాంతంలో మరో నలుగురిని.. మొత్తం ఐదుగురు సిబ్బందిని రెస్క్యూ టీమ్స్ సురక్షితంగా బయటకు తీసుకువచ్చాయి. మరో ఆరుగురు సిబ్బంది కూడా క్షేమంగానే ఉన్నారని అధికారులు తెలిపారు.
