follow us:
నేటితరం యువత, వారి రిలేషన్‌షిప్స్ పై ఉత్తరప్రదేశ్ గవర్నర్ ఆనందిబెన్ పటేల్ ఇంట్రెస్టింగ్ కామెంట్స్ చేశారు. లక్నోలోని ఓ ప్రైవేట్ కాలేజ్ స్నాతకోత్సవంలో పాల్గొన్న ఆమె, యువత తమ బంధాలను ఎంత సీరియస్‌గా తీసుకోవాలనే దానిపై హితవు పలికారు. గర్ల్‌ఫ్రెండ్ ఉండటంలో ఎలాంటి తప్పు లేదని చెబుతూనే, ఆ తర్వాత ఇచ్చే మాటపై నిలబడాలని స్పష్టం చేశారు. ఆమె చేసిన ఈ కామెంట్స్ ఇప్పుడు సోషల్ మీడియాలో వైరల్ అవుతున్నాయి.
లక్నో కళాశాల 7వ స్నాతకోత్సవానికి చీఫ్ గెస్ట్ గా హాజరైన ఆనందిబెన్ పటేల్ మాట్లాడుతూ.. యువకులు ఎవరినైనా ఇష్టపడి రిలేషన్‌లోకి వెళ్లాక వారిని మధ్యలోనే వదిలేయకూడదని, పెళ్లి చేసుకుంటానని మాటిస్తే ఆ వాగ్దానాన్ని కచ్చితంగా నిలబెట్టుకోవాలని స్పష్టం చేశారు. అలాగే వివాహం చేసుకోవడానికి ముందే యువత తమ సొంత కాళ్లపై నిలబడాలని, ఫైనాన్షియల్‌గా సెటిల్ అయ్యాకే కుటుంబ బాధ్యతలు స్వీకరించాలని హితవు పలికారు. అటు అమ్మాయిలు కూడా కెరీర్‌తో పాటు మంచి తల్లిగా మారడానికి ప్రాధాన్యత ఇవ్వాలని, చదువు, ఉద్యోగాలతో పాటు గృహ బాధ్యతలను సమర్థవంతంగా నిర్వహించాలని సూచించారు.
ఈ సమావేశంలో సమాజంలో జరుగుతున్న కొన్ని చేదు నిజాలపై గవర్నర్ తీవ్ర ఆందోళన వ్యక్తం చేశారు. కేవలం 13 నుంచి 14 సంవత్సరాల చిన్న వయసులోనే బాలికలు గర్భవతులై తల్లులవుతుండటం, ఆ తర్వాత వారి భాగస్వాములు వారిని వదిలేసి వెళ్లిపోవడం వంటి దారుణ ఘటనలు తనను తీవ్రంగా కలచివేస్తున్నాయని ఆవేదన వ్యక్తం చేశారు. ఇలాంటి సామాజిక రుగ్మతలను నివారించడానికి ప్రభుత్వాలు ఎన్నో రకాల చర్యలు తీసుకుంటున్నప్పటికీ, కేవలం చట్టాలే కాకుండా సమాజం కూడా తన బాధ్యతను గుర్తించాలని పిలుపునిచ్చారు. భవిష్యత్తు గురించి ఎవరికైనా మాట ఇచ్చే ముందు యువత తమ నిర్ణయాల తీవ్రతను గ్రహించాలని తెలిపారు.
పెళ్లి అనేది కేవలం ఇద్దరు వ్యక్తుల మధ్య జరిగే ఒక తాత్కాలిక బంధం కాదని, అది రెండు కుటుంబాల పెద్దల బాధ్యతలతో కూడిన సుదీర్ఘమైన నిబద్ధత అని గవర్నర్ అన్నారు. ఒక కుటుంబాన్ని పోషించే స్థోమత, మానసిక పరిపక్వత ఉన్నాయని నిర్ధారించుకున్న తర్వాతే వివాహ వ్యవస్థలోకి అడుగుపెట్టాలని స్పష్టం చేశారు. అట్రాక్షన్ తో జీవితాలను పాడుచేసుకోవద్దని హితవు పలికారు. మహిళలు కుటుంబ బాధ్యతలను, కెరీర్‌ను బ్యాలెన్స్ చేస్తూ ముందుకు సాగాలని తన గత అనుభవాలను ఈ సందర్భంగా ఆనందిబెన్ పటేల్ గుర్తు చేసుకున్నారు.
ప్రసంగం చివర్లో తాను గతంలో గుజరాత్‌లో మంత్రిగా, ఆ తర్వాత సీఎంగా పనిచేసిన రోజులను గవర్నర్ ఆనందిబెన్ పటేల్ నెమరువేసుకున్నారు. పేద కుటుంబాల పిల్లల్లో పోషకాహార లోపాన్ని నివారించేందుకు అంగన్‌వాడీ కేంద్రాల ద్వారా శెనగలు, బెల్లం అందించే వినూత్న కార్యక్రమాన్ని తాను ఆ రోజుల్లో ప్రారంభించానని గుర్తుచేశారు. సామాజిక సంక్షేమం కోసం ఇలాంటి వినూత్న ఆలోచనలు ఎంతగానో ఉపయోగపడతాయని అభిప్రాయపడ్డారు. యువత మరియు పెళ్లిపై యూపీ గవర్నర్ చేసిన ఈ వ్యాఖ్యలపై మీ అభిప్రాయాన్ని కామెంట్ చేయండి.
