రష్యాలో ఘోర విమాన ప్రమాదం చోటు చేసుకుంది. ఆకాశంలో ఉండగానే విమానంలో మంటలు చెలరేగి కుప్పకూలింది. ఈ ప్రమాద సమయంలో ఫ్లైట్ లో ఉన్న 17 మంది ప్రాణాలు కోల్పోయారు. అందులో ఉన్న ఏ ఒక్క సిబ్బంది కూడా ప్రాణాలతో మిగలలేదు. ఈ ప్రమాదానికి సంబంధించిన విజువల్స్ ప్రస్తుతం సోషల్ మీడియాలో వైరల్ గా మారుతున్నాయి.
రష్యాలోని కెమెరోవో రీజియన్లో ఉన్న యగునోవో గ్రామం సమీపంలో ఈ ఘోర విమాన ప్రమాదం సంభవించింది. రష్యా వైమానిక దళానికి చెందిన ‘అంటోనోవ్ ఏఎన్-12’ మిలిటరీ ట్రాన్స్పోర్ట్ ఎయిర్క్రాఫ్ట్ మంగళవారం నొవొసిబిర్స్క్ నుంచి క్రాస్నోయార్స్క్లోని కాన్స్క్ ప్రాంతానికి విడి భాగాలను తరలిస్తోంది. అయితే మార్గమధ్యంలోనే ఈ విమానం కుప్పకూలిపోయింది. కెమెరోవో ప్రాంత గవర్నర్ ఇల్యా సెరెడ్యూక్ ఈ విషాద వార్తను అధికారికంగా ధ్రువీకరించారు. ప్రమాద తీవ్రత చాలా ఎక్కువగా ఉండటంతో విమానంలో ప్రయాణిస్తున్న 17 మంది సిబ్బంది అక్కడికక్కడే మృతి చెందారని రష్యన్ మీడియా వర్గాలు స్పష్టం చేశాయి.
ఈ ప్రమాదాన్ని కళ్లారా చూసిన స్థానికులు చెబుతున్న విషయాలు ఒళ్లు గగుర్పొడిచేలా ఉన్నాయి. విమానం నేలను ఢీకొట్టడానికి ముందే, ఆకాశంలో ఉండగానే దాని నుంచి దట్టమైన పొగలు, భారీ మంటలు రావడాన్ని ప్రత్యక్ష సాక్షులు గమనించారు. ప్రమాదాన్ని ముందే పసిగట్టిన పైలట్లు వెంటనే కంట్రోల్ రూమ్కు డిస్ట్రెస్ సిగ్నల్ పంపించి, ఎమర్జెన్సీ ల్యాండింగ్ చేయడానికి తీవ్రంగా శ్రమించారు. అన్నింటికంటే ముఖ్యంగా, మంటల్లో చిక్కుకున్న ఆ విమానం సమీపంలోని జనావాసాలపై పడితే మరింత పెద్ద ప్రాణనష్టం జరుగుతుందని భావించిన సిబ్బంది, తమ ప్రాణాలను సైతం లెక్కచేయకుండా విమానాన్ని ఊరికి దూరంగా మళ్లించడానికి చివరి క్షణం వరకు పోరాడారు.
సమాచారం అందిన వెంటనే రెస్క్యూ టీమ్స్, అగ్నిమాపక దళాలు ఘటనా స్థలానికి చేరుకుని సహాయక చర్యలు చేపట్టాయి. కానీ అప్పటికే విమానం పూర్తిగా దగ్ధమైపోయింది. ప్రస్తుతం ఈ దుర్ఘటనపై రష్యా రక్షణ శాఖ ఉన్నత స్థాయి విచారణకు ఆదేశించింది. విమానంలోని నాలుగు ఇంజిన్లలో ఒకదానిలో ఫ్యూయల్ లీక్ కావడం వల్లే ఆకాశంలో మంటలు అంటుకొని ఉండవచ్చని నిపుణులు అంచనా వేస్తున్నారు. దీనితో పాటు హైడ్రాలిక్ ఫెయిల్యూర్ లేదా ఇతర సాంకేతిక లోపాలు ఏమైనా ఉన్నాయా అనే కోణంలో కూడా బ్లాక్ బాక్స్ డేటా ఆధారంగా అధికారులు లోతుగా పరిశీలిస్తున్నారు.
ఇక్కడ మనం ప్రమాదానికి గురైన ‘అంటోనోవ్ ఏఎన్-12’ విమానం గురించి కూడా తప్పకుండా చెప్పుకోవాలి. ఇది ఇప్పటి విమానం కాదు.. 1950వ దశకంలో నాటి సోవియట్ యూనియన్ రూపొందించిన నాలుగు ఇంజిన్ల టర్బోప్రాప్ రవాణా విమానం. దశాబ్దాలుగా రష్యా సైన్యంలో భారీ సరుకు రవాణా కోసం, క్లిష్టమైన మిషన్ల కోసం వీటిని విస్తృతంగా వినియోగిస్తున్నారు. అయితే కాలం చెల్లిన పాత విమానాల నిర్వహణపై ఇప్పుడు మరోసారి ప్రపంచవ్యాప్తంగా చర్చ మొదలైంది.
