తమిళనాడు సర్కార్ సంచలన నిర్ణయం తీసుకుంది. తమ న్యాయమైన డిమాండ్ల సాధన కోసం గతంలో నిరసనలు చేపట్టిన రైతులు, ఉపాధ్యాయులకు భారీ ఊరట కలిగించింది. 2021 మే నుంచి 2026 ఏప్రిల్ మధ్య కాలంలో రైతులు, ఉపాధ్యాయులు తమ హక్కులు, జీవనోపాధి, ఇతర న్యాయమైన డిమాండ్ల కోసం శాంతియుత ఆందోళనలకు సంబంధించి నమోదైన కేసులను ఉపసంహరించుకోనుంది. తమిళనాడు అసెంబ్లీలో ఇచ్చిన హామీకి అనుగుణంగా సీఎం విజయ్ ప్రభుత్వం చర్యలు చేపట్టింది.
గత కొన్ని సంవత్సరాలుగా తమిళనాడులో ఎన్నో ప్రజా ఉద్యమాలు నడిచాయి. తిరువణ్ణామలై జిల్లాలో సిప్కాట్ పారిశ్రామిక వాడ ఏర్పాటుకు వ్యతిరేకంగా రైతులు పోరాటం చేశారు. అలాగే, పరందూర్ విమానాశ్రయ ప్రతిపాదనను వ్యతిరేకిస్తూ వేలాది మంది రైతులు రోడ్డెక్కి తమ నిరసనలను తెలిపారు. కేవలం రైతులే కాదు.. తమ న్యాయమైన డిమాండ్ల సాధన కోసం ఉపాధ్యాయులు సైతం అనేక శాంతియుత ఆందోళనలు చేపట్టారు. అయితే అప్పటి ప్రభుత్వాలు వారిపై కేసు నమోదు చేశారు.. అయితే అప్పటి నుంచి కోర్టుల చుట్టూ తిరుగుతూ ఆ రైతులు, ఉపాధ్యాయులు పడిన నరకం అంతా ఇంతా కాదు.
అయితే, ఎన్నికల వేళ ప్రజలకు ఇచ్చిన ప్రతి మాటకు కట్టుబడి ఉంటానని నిరూపించారు ముఖ్యమంత్రి విజయ్. అసెంబ్లీలో తాను ఇచ్చిన హామీకి అనుగుణంగా ప్రభుత్వం తరఫున ఒక సంచలన నిర్ణయం తీసుకున్నారు. ఈ నిర్ణయంతో ఏకంగా 92 వేల మందికి పైగా రైతులు, ఉపాధ్యాయులపై గతంలో నమోదైన అన్ని క్రిమినల్ కేసులు, శాంతిభద్రతల కేసులను ఉపసంహరించుకుంటున్నట్లు ప్రకటించారు! ఒకే ఒక సంతకంతో దాదాపు లక్ష కుటుంబాలకు ఊరటనిచ్చిన ఈ నిర్ణయం ఇప్పుడు దేశవ్యాప్తంగా రాజకీయ వర్గాల్లో హాట్ టాపిక్గా మారింది. పెండింగ్లో ఉన్న ఈ కేసులను చట్టపరంగా పూర్తిగా తొలగించేందుకు సంబంధిత న్యాయస్థానాల్లో అవసరమైన ప్రక్రియలను వేగవంతం చేయాలని అధికారులను ఆదేశించారు.
మరోపక్క సీఎం విజయ్ తీసుకున్న ఈ నిర్ణయాన్ని అందరూ ప్రశంసిస్తున్నారు. ప్రజాస్వామ్యంలో ప్రజల హక్కులను కాలరాయకూడదని, ప్రభుత్వానికి మరియు ప్రజలకు మధ్య నమ్మకం ఎప్పుడూ బలపడేలా ఉండాలని ఆయన స్పష్టం చేశారు. ఒక నాయకుడు అంటే ప్రజల కష్టాలను అర్థం చేసుకునేవాడే అసలైన నాయకుడని ఈ నిర్ణయం ద్వారా విజయ్ నిరూపించారు. కష్టకాలంలో తమ వెన్నంటి ఉండి, అక్రమ కేసుల భారం నుంచి విముక్తి కల్పించిన ప్రభుత్వ తీరును చూసి తమిళనాడు రైతులు, ఉపాధ్యాయులు హర్షం వ్యక్తం చేస్తున్నారు. ప్రభుత్వ నిర్ణయం పట్ల సర్వత్రా ప్రశంసల జల్లు కురుస్తోంది.
