follow us:
హైదరాబాద్ నగర శివార్లలో అగ్నిప్రమాదం కలకలం రేపింది. దుండిగల్ పోలీస్ స్టేషన్ పరిధిలోని బౌరంపేటలో ఉన్న ప్రైవేట్ ట్రావెల్స్ బస్సుల పార్కింగ్ యార్డ్‌లో ఒక్కసారిగా మంటలు చెలరేగాయి. తెల్లవారుజామున అందరూ గాఢనిద్రలో ఉన్న సమయంలో ఈ ఘటన చోటుచేసుకోవడంతో స్థానికంగా తీవ్ర భయాందోళనలు నెలకొన్నాయి.ఈ ప్రమాదంలో ఏకంగా ఐదు ప్రైవేట్ ట్రావెల్స్ బస్సులు అగ్నికి ఆహుతయ్యాయి.
బౌరంపేట బొడ్రాయి సమీపంలో ప్రైవేట్ ట్రావెల్స్ బస్సులను నిలిపే పార్కింగ్ యార్డ్‌లో ఈ అగ్నిప్రమాదం సంభవించింది. రోజువారీ ట్రిప్పులు ముగించుకున్న తర్వాత డ్రైవర్లు ఈ బస్సులను ఇక్కడ పార్క్ చేస్తుంటారు. ఆదివారం తెల్లవారుజామున సుమారు ఒంటి గంట సమయంలో ఈ యార్డ్‌లో నిలిపి ఉంచిన ఒక బస్సులో అకస్మాత్తుగా మంటలు చెలరేగాయి. యార్డ్‌లో బస్సులన్నీ ఒకదానికొకటి అత్యంత సమీపంలో, పక్కపక్కనే పార్క్ చేసి ఉండటంతో ప్రమాద తీవ్రత ఒక్కసారిగా పెరిగిపోయింది. క్షణాల్లోనే మంటలు పక్కనే ఉన్న ఇతర బస్సులకు కూడా వేగంగా వ్యాపించాయి. బస్సుల్లోని సీట్లు, కర్టెన్లు, డీజిల్ ట్యాంకులు ఉండటంతో మంటలు ఎగసిపడ్డాయి. దట్టమైన పొగలు ఆ ప్రాంతమంతా కమ్ముకోవడంతో స్థానికులు భయంతో ఇళ్లలోంచి బయటకు పరుగులు తీశారు.
ఈ భారీ అగ్నిప్రమాదంలో మొత్తం ఐదు ప్రైవేట్ ట్రావెల్స్ బస్సులు మంటల్లో చిక్కుకున్నాయి. వీటిలో మూడు బస్సులు పూర్తిగా కాలి బూడిదైయ్యాయి. పక్కనే ఉన్న మరో రెండు బస్సులకు కూడా మంటలు అంటుకుని, అవి తీవ్రంగా కాలిపోయాయి. ఈ ఘటనలో ట్రావెల్స్ యాజమాన్యాలకు భారీ ఆస్తి నష్టం వాటిల్లినట్లు ప్రాథమికంగా అంచనా వేస్తున్నారు. మంటలను గమనించిన స్థానికులు యార్డ్ సిబ్బంది వెంటనే అగ్నిమాపక శాఖకు, పోలీసులకు సమాచారం అందించారు. సమాచారం అందుకున్న వెంటనే ఫైర్ సిబ్బంది అప్రమత్తమై, ఫైర్ ఇంజన్లతో ఘటనా స్థలానికి చేరుకున్నారు. మంటలు మరింతగా వ్యాపించి, యార్డ్‌లో ఉన్న మిగతా వాహనాలకు అంటుకోకుండా అగ్నిమాపక సిబ్బంది తీవ్రంగా శ్రమించారు. సుమారు గంటల పాటు శ్రమించి ఎట్టకేలకు మంటలను పూర్తిగా అదుపులోకి తీసుకొచ్చారు. అదృష్టవశాత్తూ తెల్లవారుజామున బస్సుల్లో ప్రయాణికులు ఎవరూ లేకపోవడంతో ప్రాణనష్టం తప్పింది.
మరోవైపు, దుండిగల్ పోలీసులు కూడా ఘటనా స్థలానికి చేరుకుని పరిస్థితిని సమీక్షించారు. ప్రాథమికంగా షార్ట్ సర్క్యూట్ కారణంగానే తొలి బస్సులో మంటలు చెలరేగి ఉండవచ్చని అగ్నిమాపక సిబ్బంది అనుమానిస్తున్నారు. అయితే, ఈ ప్రమాదానికి షార్ట్ సర్క్యూటే కారణమా? లేక బస్సులో ఏదైనా సాంకేతిక లోపం ఉందా? లేదా ఎవరైనా కావాలనే నిప్పు పెట్టారా? అనే అన్ని కోణాల్లో పోలీసులు లోతుగా దర్యాప్తు చేస్తున్నారు. సమీపంలోని సీసీటీవీ ఫుటేజీలను కూడా పోలీసులు పరిశీలిస్తున్నారు. ఈ ఘటనపై దుండిగల్ పోలీసులు కేసు నమోదు చేసి విచారణ జరుపుతున్నారు.
