follow us:
పరిషత్ ఎన్నికల ఓట్ల లెక్కింపు సమయంలో ఊహించని చిత్ర, విచిత్ర సంఘటనలు వెలుగు చూశాయి. అయితే, ఓట్లు లెక్కించాల్సిన బ్యాలెట్ బాక్స్ లో అధికారులకు మైండ్ బ్లాక్ అయ్యే దృశ్యం కనిపిస్తే ఎలా ఉంటుంది? సరిగ్గా అలాంటి ఒక ఆసక్తికరమైన, ఆలోచింపజేసే ఘటనే పల్నాడు జిల్లా నరసరావుపేటలో చోటుచేసుకుంది. ఓట్ల లెక్కింపు హాలులో బ్యాలెట్ బాక్స్ తెరిచిన సిబ్బందికి ఓట్లతో పాటు కొన్ని లేఖలు, కరపత్రాలు కనిపించడంతో ఒక్కసారిగా అవాక్కయ్యారు.
పల్నాడు జిల్లా నరసరావుపేటలోని ప్రముఖ ఏఎం రెడ్డి ఇంజినీరింగ్ కాలేజీలో పరిషత్ ఎన్నికల ఓట్ల లెక్కింపు ప్రక్రియ ఎంతో ఉత్కంఠగా కొనసాగింది. ఇందులో భాగంగా సత్తెనపల్లి మండలం, కంకాణలపల్లి జడ్పీటీసీ, ఎంపీటీసీ స్థానాలకు సంబంధించిన బ్యాలెట్ బాక్సులను అధికారులు సీల్ తీసి లెక్కింపు ప్రారంభించారు. ఓట్లను విడదీస్తున్న సమయంలో బ్యాలెట్ పత్రాలతో పాటు ప్రత్యేకంగా అచ్చయిన కొన్ని కరపత్రాలు ప్రత్యక్షమయ్యాయి. మొదట్లో ఏవో ప్రచార పత్రాలు అనుకున్నప్పటికీ, వాటిని చదివిన కౌంటింగ్ స్టాఫ్ అక్కడున్న ఉన్నతాధికారుల దృష్టికి తీసుకువెళ్లారు.
కంకాణలపల్లి గ్రామానికి వెళ్లే ప్రధాన రహదారిలో ఉన్న రైల్వే గేటు వద్ద ప్రస్తుతం ఒక అండర్ పాస్ రైల్వే బ్రిడ్జి నిర్మాణం జరుగుతోంది. అయితే ఈ నిర్మాణాన్ని “యు” ఆకారంలో డిజైన్ చేయడం వల్ల రాకపోకలకు తీవ్ర ఇబ్బందులు ఎదురవుతాయని గ్రామస్థులు ఆందోళన వ్యక్తం చేస్తున్నారు. ఆ వర్షకాలంలో నీరు చేరడం, పెద్ద వాహనాలు తిరగలేకపోవడం వంటి సమస్యలు వస్తాయని వారు పేర్కొన్నారు. అందుకే “యు” ఆకారపు బ్రిడ్జికి బదులుగా, ప్రధాన రహదారికి నేరుగా అనుసంధానం అయ్యేలా స్ట్రెయిట్ బ్రిడ్జిని నిర్మించాలని కోరుతూ గ్రామస్థులంతా కలిసి ఆ కరపత్రాలను బ్యాలెట్ బాక్సుల్లో వేశారు.
గ్రామస్థులు కేవలం సమస్యను వివరించడమే కాకుండా, తమ ఆవేదనను నేరుగా రాష్ట్ర ఉన్నతాధికారులకు, ప్రజాప్రతినిధులకు చేరవేయాలనే ఉద్దేశంతో ఈ వినూత్న ప్రయత్నం చేశారు. ఈ సమస్యపై సీఎం చంద్రబాబు , ఉప ముఖ్యమంత్రి పవన్ కల్యాణ్, అలాగే విద్యాశాఖ మంత్రి నారా లోకేశ్ తక్షణమే స్పందించాలని వారు తమ లేఖల ద్వారా విజ్ఞప్తి చేశారు. ఎన్నికల కౌంటింగ్ కవరేజ్ మీడియా ద్వారా ప్రతిఒక్కరికీ చేరుతుంది కాబట్టి, తమ గ్రామానికి జరిగే అన్యాయాన్ని ప్రభుత్వ దృష్టికి తీసుకెళ్లేందుకే ఈ ప్లాన్ చేశామని స్థానికులు చెబుతున్నారు.
సాధారణంగా బ్యాలెట్ బాక్సుల్లో పొలిటికల్ పార్టీలపై కోపాలు, విమర్శలు లేదా డబ్బులు కనిపించడం చూస్తుంటాం. కానీ ఇలా ఒక మౌలిక వసతుల సమస్యను ప్రభుత్వం దృష్టికి తీసుకెళ్లేందుకు ఎన్నికల ప్రక్రియను వాడుకోవడం నిజంగా ఒక వినూత్న ఆలోచన అని విశ్లేషకులు అభిప్రాయపడుతున్నారు. కౌంటింగ్ సెంటర్ లో ప్రత్యక్షమైన ఈ కరపత్రాల వార్త ఇప్పుడు సోషల్ మీడియ లో బాగా వైరల్ అవుతోంది. మరి ఈ విజ్ఞప్తిపై సీఎం చంద్రబాబు, డిప్యూటీ సీఎం పవన్ కల్యాణ్ ఎలా స్పందిస్తారో, ఆ రైల్వే అండర్ పాస్ డిజైన్‌ను మారుస్తారో లేదో చూడాలి.
