follow us:
అనంతపురం జిల్లా రాప్తాడులో ఉన్మాది దాడిలో తీవ్రంగా గాయపడిన బాలిక ఆరోగ్య పరిస్థితి మెరుగుపడుతుంది. బాలికకు బెంగళూరులోని ప్రైవేట్ ఆసుపత్రిలో వైద్యులు నిర్వహించిన కీలకమైన ఆర్థోపెడిక్ సర్జరీ విజయవంతమైంది. ఈ విషయాన్ని విద్యాశాఖ మంత్రి నారా లోకేశ్ స్వయంగా ‘ఎక్స్’ వేదికగా వెల్లడించారు. ప్రభుత్వం బాలికకు పూర్తి ఉచితంగా అత్యుత్తమ వైద్యం అందిస్తోందని, బాధితురాలి కుటుంబానికి అన్ని విధాలా అండగా ఉంటామని మంత్రి భరోసా ఇచ్చారు.
బెంగళూరులోని కార్పొరేట్ ఆసుపత్రిలో ప్రత్యేక వైద్య బృందం ఈ ఆపరేషన్ నిర్వహించిందని మంత్రి లోకేశ్ తెలిపారు. సుదీర్ఘంగా సాగిన ఈ ఆర్థోపెడిక్ సర్జరీ సక్సెస్ అయిందని వైద్యులు ధృవీకరించారు. సర్జరీ జరుగుతున్న సమయంలోనే ప్లాస్టిక్ సర్జరీ నిపుణుల బృందం కూడా ఆపరేషన్ థియేటర్‌కు వెళ్లి బాలిక శరీర భాగాల పరిస్థితిని, గాయాల తీవ్రతను నిశితంగా సమీక్షించింది. సర్జరీ ముగిసిన అనంతరం బాలికను పీడియాట్రిక్ ఇంటెన్సివ్ కేర్ యూనిట్‌కు తరలించి నిరంతరం పర్యవేక్షిస్తున్నారు. ప్రస్తుతం బాలిక ఆరోగ్యం స్థిరంగా ఉందని, క్షేమంగా ఉందని మంత్రి లోకేశ్ తన పోస్టులో తెలిపారు.
రాప్తాడుకు చెందిన హేమంత్ అనే ఉన్మాది, చిన్నారిపై అత్యంత కిరాతకంగా దాడికి తెగబడిన విషయం తెలిసిందే. ఈ దాడిలో బాలిక శరీర భాగాలకు తీవ్ర గాయాలయ్యాయి. ఎముకలు విరగడంతో పాటు తీవ్ర రక్తస్రావమై పరిస్థితి విషమించింది. ఘటన జరిగిన వెంటనే స్పందించిన ఏపీ ప్రభుత్వం.. బాలికను మెరుగైన చికిత్స కోసం తక్షణమే బెంగళూరుకు తరలించింది. ముఖ్యమంత్రి కార్యాలయం సహా మంత్రి నారా లోకేశ్ స్వయంగా ఈ కేసును పర్యవేక్షిస్తున్నారు. బాలికకు అయ్యే వైద్య ఖర్చులను పూర్తిగా ప్రభుత్వమే భరిస్తోంది. సాధ్యమైనంత ఉత్తమ వైద్య సంరక్షణ అందించేలా, బెంగళూరులోని వైద్య బృందంతో మంత్రి కార్యాలయం నిరంతరం టచ్‌లో ఉంటోందని లోకేశ్ స్పష్టం చేశారు.
చిన్నారి ప్రాణాలను కాపాడేందుకు ప్రభుత్వం తీసుకున్న తక్షణ నిర్ణయాలు, వైద్యుల అంకితభావం వల్ల ఈ రోజు మొదటి కీలక ఘట్టం విజయవంతంగా పూర్తయింది. ప్లాస్టిక్ సర్జరీ బృందం కూడా నిరంతరం పర్యవేక్షిస్తుండటంతో చిన్నారి త్వరలోనే కోలుకుంటుందని వైద్యులు ఆశాభావం వ్యక్తం చేస్తున్నారు.
రాప్తాడులో చిన్నారిపై జరిగిన ఈ అమానుష దాడి సమాజాన్ని తీవ్రంగా కలచివేసింది. ఈ నేపథ్యంలో ప్రభుత్వం త్వరితగతిన స్పందించి, బాలికకు అత్యుత్తమ వైద్యం అందించడంపై సర్వత్రా హర్షం వ్యక్తమవుతోంది. అటు వైద్య ఖర్చులు భరించడమే కాకుండా, చిన్నారి మానసికంగా, శారీరకంగా పూర్తిగా కోలుకునే వరకు ప్రభుత్వం తోడుగా ఉంటుందని మంత్రి నారా లోకేశ్ ప్రకటించడం ఆ కుటుంబానికి పెద్ద ఉపశమనం కలిగించింది. ఇలాంటి ఘటనలు పునరావృతం కాకుండా ఉండేందుకు, మహిళలు బాలికల రక్షణకు ప్రభుత్వం తీసుకుంటున్న కఠిన నిర్ణయాలను ఈ సందర్భంగా అధికారులు గుర్తు చేస్తున్నారు.ఈ కిరాతక దాడికి పాల్పడిన ఉన్మాది హేమంత్‌పై ఇప్పటికే పోలీసులు కఠిన సెక్షన్ల కింద కేసు నమోదు చేశారు. బాధితురాలికి త్వరితగతిన న్యాయం జరిగేలా ఫాస్ట్ ట్రాక్ కోర్టు ద్వారా విచారణ జరిపించి, నిందితుడికి కోర్టు ద్వారా గుణపాఠం చెప్పేలా కఠిన శిక్ష పడేలా చేస్తామని ప్రభుత్వం స్పష్టం చేస్తోంది
