follow us:
మురసు తుఫాను ఎఫెక్ట్ తో ఏపీలో మరోసారి మోస్తారు నుంచి భారీ వర్షాలు కురుస్తున్నాయి. పలు ప్రాంతాల్లో కుండబోత వర్షాలు కురుస్తుండడంతో లోతట్టు ప్రాంతాలు తీవ్ర అవస్థలు పడుతున్నారు. ఈ తీవ్రతను గమనించిన సీఎం చంద్రబాబు బాధిత జిల్లాల ప్రజలకు తక్షణ సాయం అందించేలా, ప్రాణ ఆస్తి నష్టాలను అరికట్టేలా అధికారులను ఆరా తీస్తున్నారు. జిల్లాల వారీగా కురిసిన వర్షపాతం, గాలుల తీవ్రత, గ్రౌండ్ లెవెల్ పరిస్థితులపై సీఎం వివరంగా తెలుసుకున్నారు. ఈ క్రమంలోనే రానున్న మరో నాలుగు రోజుల పాటు రాష్ట్రంలో వర్షాలు కురస్తాయని అధికారులు తెలిపారు.
ముఖ్యంగా వర్షాల ప్రభావం తీవ్రంగా ఉన్న ప్రకాశం, బాపట్ల, పల్నాడు, కృష్ణా, ఏలూరు, పశ్చిమగోదావరి జిల్లాల పరిస్థితిపై సీఎం చంద్రబాబు ప్రత్యేక దృష్టి సారించారు. సోమవారం రాత్రి నుంచి మంగళవారం ఉదయం వరకు రాష్ట్రవ్యాప్తంగా సగటున 20.38 సెంటీమీటర్ల మేర అత్యధిక వర్షపాతం నమోదైనట్లు అధికారులు సీఎంకు నివేదించారు. గ్రామాలు, నగరాల్లో చెట్లు, విద్యుత్ స్తంభాలు నేలకొరిగి రాకపోకలకు తీవ్ర అంతరాయం ఏర్పడింది. లోతట్టు ప్రాంతాలు జలమయం కావడంతో అక్కడి ప్రజలను తక్షణమే పునరావాస కేంద్రాలకు తరలించాలని, ఎవరికీ ఎలాంటి అసౌకర్యం కలగకుండా ఆహారం, మంచినీరు అందించాలని సీఎం ఆదేశించారు.
ఈ వర్షాల వల్ల లోతట్టు ప్రాంతాల్లో ఇబ్బందులు ఎదురవుతున్నప్పటికీ, రాష్ట్రంలో వేధిస్తున్న తీవ్ర వర్షపాతం లోటు భారీగా తగ్గిందని సీఎం చంద్రబాబు వెల్లడించారు. గతంలో 53 శాతంగా ఉన్న వానలోటు ఈ ఒక్క వర్షానికే ఏకంగా 28 శాతానికి తగ్గిపోయిందని ఆయన తెలిపారు. అయితే సంబరపడే లోపే.. రానున్న నాలుగు రోజుల పాటు రాష్ట్రంలో భారీ నుంచి అతి భారీ వర్షాలు కొనసాగే అవకాశం ఉందని వాతావరణ శాఖ అధికారులు స్పష్టం చేశారు. బంగాళాఖాతంలో వీస్తున్న గాలుల ప్రభావం తగ్గకపోవడంతో ఏ క్షణమైనా ఎదురయ్యే ఎలాంటి అత్యవసర పరిస్థితులకైనా యంత్రాంగం సిద్ధంగా ఉండాలని సీఎం హెచ్చరించారు.
వర్ష ప్రభావం ఎక్కువగా ఉన్న జిల్లాల కలెక్టర్లు, ఎస్పీలు, విపత్తు నిర్వహణ బృందాలతో సీఎం చంద్రబాబు నిరంతరం టెలికాన్ఫరెన్స్ జరుపుతున్నారు. ప్రతి జిల్లాలోనూ 24/7 కంట్రోల్ రూమ్‌లను అందుబాటులో ఉంచాలని, డ్రైనేజీలు, వాగులు పొంగిపొర్లకుండా ముందస్తు చర్యలు తీసుకోవాలని ఆదేశించారు. రహదారులపై విరిగిపడిన చెట్లను తొలగించి రవాణా, విద్యుత్ పునరుద్ధరణ పనులను వేగవంతం చేయాలన్నారు. అలాగే రైతుల పంట నష్టాన్ని సమగ్రంగా అంచనా వేసి తగిన పరిహారం అందించి ఆదుకోవాలని అధికారులను ఆదేశించారు.
తుఫాన్ తీవ్రత తగ్గే వరకు కృష్ణా, గోదావరి, ప్రకాశం, తీర ప్రాంత ప్రజలు అనవసరంగా ఇళ్ల నుంచి బయటకు రాకూడదని అధికారులు విజ్ఞప్తి చేస్తున్నారు. కాలువలు, పాత భవనాలు, కరెంట్ స్తంభాల వద్దకు వెళ్లకూడదని హెచ్చరిస్తున్నారు. ప్రభుత్వం అన్ని విధాలా అండగా ఉందని సీఎం చంద్రబాబు హామీ ఇచ్చారు.
