ఏపీలో మోగిన ఎలక్షన్ సైరన్.. స్థానికల ఎన్నికలకు నోటిఫికేషన్

ఏపీలో స్థానిక సంస్థల ఎన్నికల షెడ్యూల్ విడుదలైంది. రాష్ట్ర ఎన్నికల కమిషనర్ అనిల్ చంద్ర పునేఠా షెడ్యూల్‌ను విడుదల చేశారు. నగర పంచాయతీలు, మున్సిపాలిటీలు, కార్పొరేషన్లకు ఎన్నికలను నిర్వహించేందుకు నోటిఫికేషన్‌‌‌ విడుదల చేశారు. 13 మున్సిపల్‌ కార్పొరేషన్లు, 77 మున్సిపాలిటీలు, 10 నగర పంచాయతీలకు ఎన్నికలు జరగనున్నాయి. రాష్ట్ర వ్యాప్తంగా 100 అర్బన్ లోకల్‌ బాడీస్‌ ఎన్నికలకు షెడ్యూల్ ప్రకటించారు. ఆంధ్రప్రదేశ్‌లో రాజకీయ సమరానికి సర్వం సిద్ధమైంది. రాష్ట్రంలో అత్యంత ప్రతిష్ఠాత్మకమైన స్థానిక సంస్థల ఎన్నికల నగారా మోగింది. కొన్ని నెలలుగా ఉత్కంఠ రేపుతున్న లోకల్ బాడీ ఎన్నికల పూర్తి షెడ్యూల్‌ను రాష్ట్ర ఎన్నికల కమిషనర్ అనిల్ చంద్ర పునేఠా విజయవాడలో కొద్దిసేపటి క్రితమే అధికారికంగా విడుదల చేశారు. మొత్తం మూడు ప్రధాన విడతల్లో, డిసెంబర్ మొదటి వారం వరకు ఈ ఎన్నికల జాతర సాగనుంది. నేటి నుంచే రాష్ట్రవ్యాప్తంగా ఎన్నికల కోడ్ అమలులోకి వస్తున్నట్లు ఎస్‌ఈసీ స్పష్టం చేసింది.

మొదటి విడతగా పట్టణ స్థానిక సంస్థలైన మున్సిపాలిటీలు, కార్పొరేషన్లకు ఎన్నికలు జరగనున్నాయి. దీనికి సంబంధించిన నోటిఫికేషన్ నేడే జారీ కాగా.. ఈ నెల 16 నుంచి 18 వరకు నామినేషన్లను స్వీకరిస్తారు. అక్టోబర్ 21న నామినేషన్ల ఉపసంహరణ గడువు ముగుస్తుంది. ఈనెల 28న మున్సిపాలిటీలు, కార్పొరేషన్‌లకు ఎన్నికలు జరగనుండగా.. 30న ఫలితాలు వెల్లడికానున్నాయి. మూడు దశల్లో స్థానిక సంస్థల ఎన్నికలను నిర్వహించేందుకు ఎన్నికల సంఘం ఏర్పాట్లు చేసింది. ఇక గ్రామీణ ప్రాంతాల్లో పట్టుకోసం జరిగే ఎంపీటీసీలకు , జెడ్పీటీసీ ఎన్నికలను రెండో విడతలో నిర్వహించనున్నారు. దీనికి సంబంధించిన నోటిఫికేషన్ ఈ నెల 19న విడుదల కానుంది. నవంబర్ 3న ఎంపీటీసీ, జెడ్పీటీసీ స్థానాలకు పోలింగ్ నిర్వహిస్తారు. అనంతరం నవంబర్ 5న కౌంటింగ్ చేపట్టి విజేతలను ప్రకటిస్తారు.

ఇక చివరిగా గ్రామాల్లో పంచాయతీ ఎన్నికలు జరగనున్నాయి. అందరూ ఎంతగానో ఎదురుచూస్తున్న గ్రామ పంచాయతీ ఎన్నికలను ఎస్‌ఈసీ మొత్తం మూడు దశల్లో నిర్వహించేలా ప్లాన్ చేశారు. విశేషమేమిటంటే పంచాయతీ ఎన్నికల్లో పోలింగ్ ముగిసిన వెంటనే, అదే రోజు రాత్రికి ఫలితాలను కూడా వెల్లడిస్తారు. నవంబర్ 26న తొలి దశ పంచాయతీ ఎన్నికలు జరగనున్నాయి. నవంబర్ 29న రెండో దశ ఎన్నికలు నిర్వహిస్తారు. ఇక డిసెంబర్ 2న జరిగే మూడో దశ పంచాయతీ ఎన్నికలతో ఏపీలో స్థానిక పోరు ముగియనుంది. కూటమి ప్రభుత్వం అధికారంలోకి వచ్చిన తర్వాత జరుగుతున్న మొదటి స్థానిక సంస్థల ఎన్నికలు కావడంతో.. అటు అధికార పక్షం, ఇటు ప్రతిపక్షం ఈ ఎన్నికలను అత్యంత ప్రతిష్ఠాత్మకంగా తీసుకుంటున్నాయి.

ఎన్నికలు ప్రశాంత వాతావరణంలో జరిగేలా చూసేందుకు సమస్యాత్మక, అతి సమస్యాత్మక ప్రాంతాల్లో అదనపు బలగాలను మోహరిస్తున్నట్లు ఎస్‌ఈసీ ప్రకటించింది.
సోషల్ మీడియాలో తప్పుడు ప్రచారాలు, శాంతిభద్రతలకు విఘాతం కలిగించే పోస్టులపై ప్రత్యేక సైబర్ సెల్ నిఘా పెట్టింది. రాష్ట్రవ్యాప్తంగా మహిళా ఓటర్ల సంఖ్య పెరిగిన నేపథ్యంలో, పోలింగ్ కేంద్రాల వద్ద వారికి ఎలాంటి ఇబ్బందులు కలగకుండా ప్రత్యేక వసతులు కల్పిస్తున్నారు. మున్సిపాలిటీలు, కార్పొరేషన్ల ఎన్నికల కోసం ఇప్పటికే ఈవీఎంల మొదటి విడత తనిఖీలు పూర్తయ్యాయని అధికారులు వెల్లడించారు. గ్రామ పంచాయతీ ఎన్నికలను మాత్రం సాంప్రదాయ పద్ధతిలోనే, అంటే బ్యాలెట్ పేపర్ల ద్వారానే నిర్వహించనున్నారు.

అధికార కూటమిలోని టీడీపీ, జనసేన, బీజేపీ పార్టీలు క్షేత్రస్థాయిలో సీట్ల సర్దుబాట్లపై ఇప్పటికే ప్రత్యేక కమిటీలను రంగంలోకి దించాయి.
వైఎస్సార్ కాంగ్రెస్ పార్టీ ఈ ఎన్నికలను తమకు లభించిన భారీ అవకాశంగా భావిస్తూ, క్యాడర్‌లో ఉత్సాహం నింపేందుకు సిద్ధమవుతోంది. షెడ్యూల్ విడుదలైన నిమిషాల వ్యవధిలోనే పల్లెల్లో సర్పంచ్ స్థానాలపై అప్పుడే బెట్టింగుల రాయుళ్లు రంగంలోకి దిగినట్లు తెలుస్తోంది. అభ్యర్థుల ఎన్నికల ఖర్చులపై రాష్ట్ర ఎన్నికల సంఘం గట్టి నిఘా ఉంచింది; పరిమితి దాటితే కఠిన చర్యలు తప్పవని హెచ్చరించింది. సచివాలయ సిబ్బందికి విధులు: ఎన్నికల నిర్వహణలో గ్రామ, వార్డు సచివాలయ సిబ్బంది సేవలను కూడా పెద్ద ఎత్తున వినియోగించుకునేలా కలెక్టర్లు చర్యలు చేపట్టారు