follow us:
కలియుగ ప్రత్యక్ష దైవం తిరుమల శ్రీ వేంకటేశ్వరస్వామి వారిని ప్రత్యక్షంగా దర్శించుకునే భాగ్యం అందరికీ దొరక్కపోవచ్చు. కానీ, కోట్లాది మంది భక్తుల ఇళ్లలో, పూజా మందిరాల్లో కొలువై ఉన్న శ్రీవారి చిత్రపటం వెనుక ఒక గొప్ప కళాకారుడి తపస్సు ఉంది. ఆ అద్భుత రూపాన్ని తన కుంచెతో ఆవిష్కరించిన ప్రముఖ చిత్రకారుడు శ్రీనివాసన్ ఇకలేరు. 86 ఏళ్ల వయసులో వృద్ధాప్య కారణాలతో తమిళనాడులోని తన స్వగృహంలో ఆయన తుదిశ్వాస విడిచారు. 1970లో తిరుమల గర్భగుడిలో స్వామివారి ఎదురుగా కూర్చుని ఆయన స్వామి వారి చిత్రాన్ని గీశారు. ఇక ఆ చిత్రం వెనుక ఉన్న ఆసక్తికరమైన కథేంటి? ఫోటోలు ఉన్నా కూడా పెయింటింగ్ ఎందుకు వేయించారు? అసలు ఆ చిత్రాన్ని ఎలా గీశారో ఇప్పుడు తెలుసుకుందాం .
తిరుమల శ్రీనివాసుడితో పాటు పలు దేవతామూర్తుల చిత్రాలకు ప్రాణం పోసిన ప్రముఖ చిత్రకారుడు శ్రీనివాసన్ కన్నుమూశారు. తమిళనాడులోని తూత్తుకుడి జిల్లా కోవిల్పట్టికి చెందిన ఆయన, పదో తరగతి వరకు చదువుకుని, ఆపై ప్రముఖ చిత్రకారుడు కొండయ్యరాజు వద్ద చిత్రకళలో మెళకువలు నేర్చుకున్నారు. గురువు వద్ద నేర్చుకున్న విద్యతో ఎన్నో అద్భుతమైన దైవ చిత్రాలను గీశారు. గురువారం నాడు వృద్ధాప్య సమస్యలతో ఆయన తుదిశ్వాస విడవడంతో కళాలోకంలో, భక్తుల్లో విషాదం నెలకొంది.
శ్రీనివాసన్ జీవితంలో 1970వ సంవత్సరం ఒక మరపురాని మైలురాయి. ఆ ఏడాది తిరుమల తిరుపతి దేవస్థానం ప్రత్యేక ఆహ్వానం మేరకు ఆయన తిరుమలకు విచ్చేశారు. ఆలయ నియమాల ప్రకారం గర్భగుడిలోకి ప్రవేశించి, సాక్షాత్తు ఆ ఏడుకొండలవాడి మూలవిరాట్టు ఎదురుగా కూర్చుని స్వామివారి రూపాన్ని ప్రత్యక్షంగా పరిశీలించారు. అత్యంత భక్తిశ్రద్ధలతో స్వామివారిని రెండు రకాలుగా చిత్రీకరించారు. ఒకటి నిండు ఆభరణాలు, పట్టుపీతాంబరాలతో అలంకరించబడిన రూపం కాగా, మరొకటి ఎలాంటి ఆభరణాలు లేకుండా ఉండే స్వామివారి నిజరూపం. టీటీడీ అధికారికంగా ఆమోదించిన ఈ చిత్రాలు ఆ తర్వాత కాలంలో క్యాలెండర్లు, ఫోటో ఫ్రేమ్‌ల రూపంలో ప్రపంచవ్యాప్తంగా ఉన్న భక్తుల ఇళ్లకు చేరాయి.
1970ల కాలంలో ఆధునిక డిజిటల్ టెక్నాలజీ ఏమీ లేదు. గర్భగుడిలో ఉండేది కేవలం నేతి దీపాల వెలుగు మాత్రమే. ఆ మసక వెలుతురులో స్వామివారి దివ్య తేజస్సును ఒడిసిపట్టడం అంత సులభం కాదు. ముందుగా గర్భగుడిలో స్వామివారి ఎదురుగా కూర్చుని, ముఖ కవళికలు, తిరునామం, శంఖుచక్రాలు, కటిహస్తం, వరదహస్తం కొలతలను పెన్సిల్ మరియు చార్‌కోల్ సహాయంతో కాగితంపై ఖచ్చితమైన స్కెచ్‌లుగా గీసుకున్నారు. ఆ తర్వాత బయటకు వచ్చి, మందపాటి కాన్వాస్ క్లాత్ లేదా ప్రత్యేకమైన ఆర్ట్ బోర్డులపై ఆ చిత్రాన్ని విస్తరించారు.అప్పట్లో ప్రసిద్ధి చెందిన కోవిల్పట్టి శివకాశి శైలి లితోగ్రాఫ్ పెయింటింగ్ పద్ధతులను ఆయన ఉపయోగించారు. సహజమైన ఆయిల్ పెయింట్స్ , జంతువుల వెంట్రుకలతో తయారైన అత్యంత సన్నని సేబుల్ హెయిర్ బ్రష్‌లను వాడి స్వామివారి కళ్లలోని కరుణను, ఆభరణాల మెరుపును అద్భుతంగా తీర్చిదిద్దారు.
1970 నాటికి కెమెరాలు అందుబాటులో ఉన్నప్పటికీ, టీటీడీ ప్రత్యేకంగా చిత్రకారుడితో పెయింటింగ్ ఎందుకు వేయించిందనే సందేహం చాలామందికి కలుగుతుంది. దీని వెనుక బలమైన కారణాలు ఉన్నాయి. ఆగమ శాస్త్ర నియమాల ప్రకారం గర్భగుడిలో కెమెరా ఫ్లాష్‌లు వాడటం నిషేధం. గర్భగుడిలో ఉండే కేవలం దీపాల వెలుతురులో అప్పటి బ్లాక్ అండ్ వైట్ లేదా ప్రాథమిక దశలో ఉన్న కలర్ కెమెరాలతో స్పష్టమైన ఫోటో తీయడం సాధ్యం కాదు.స్వామివారి నల్లని శిలా విగ్రహంపై ఉండే సున్నితమైన చెక్కుడు, తిరునామం, ఆభరణాల డిజైన్లు కెమెరా లెన్స్ కంటే ఒక చిత్రకారుడి కంటికే మరింత స్పష్టంగా కనిపిస్తాయి. ఆ వివరాలన్నింటినీ రంగుల్లో చూపించడానికి పెయింటింగ్ ఒక్కటే మార్గమైంది.
ఫోటో కేవలం ఉన్నది ఉన్నట్లుగా చూపిస్తుంది. కానీ, ఒక భక్తుడైన చిత్రకారుడు గీసిన చిత్రంలో స్వామివారి కళ్లలోని ప్రశాంతత, చిరునవ్వు, దివ్య తేజస్సు జీవం పోసుకుంటాయి. భక్తులు చూసిన వెంటనే భక్తిభావంతో పులకించిపోయేలా ఆ రూపాన్ని తీర్చిదిద్దాలనే ఉద్దేశంతోనే టీటీడీ ఈ బృహత్తర బాధ్యతను శ్రీనివాసన్‌కు అప్పగించింది. శ్రీనివాసన్ భౌతికంగా మన మధ్య లేకపోయినా, ఆయన గీసిన ఆ దివ్య మంగళ రూపం ద్వారా ప్రతి భక్తుడి హృదయంలో చిరస్థాయిగా నిలిచిపోతారు.
