follow us:
మనిషికి వచ్చే అత్యంత భయంకరమైన జబ్బులు ఏవి అని అడిగితే.. ముందుగా గుర్తొచ్చేవి క్యాన్సర్, అల్జీమర్స్, గుండె జబ్బులు. వీటి పేరు వింటేనే సామాన్యుడి గుండెల్లో రైళ్లు పరిగెడతాయి. కానీ, మరో పదేళ్లలో ఈ వ్యాధులన్నీ కేవలం చరిత్ర పుస్తకాల్లో మాత్రమే మిగిలిపోతాయంటే మీరు నమ్ముతారా? అవును, మీరు విన్నది నిజమే! ఆర్టిఫిషియల్ ఇంటెలిజెన్స్.. అంటే కృత్రిమ మేధస్సు వైద్య రంగంలో అలాంటి పెను విప్లవాన్నే తీసుకురాబోతోందని ప్రపంచ టెక్ దిగ్గజాలు బల్లగుద్ది మరీ చెబుతున్నారు. నిజంగానే ఏఐ వైద్య రంగాన్ని సమూలంగా మార్చేస్తుందా? రానున్న రోజుల్లో ఏఐ ద్వారా ఎలాంటి అద్భుతాలు జరగబోతున్నాయో ఇప్పుడు చూద్దాం.
ప్రపంచవ్యాప్తంగా ఇప్పుడు ఎక్కడ చూసినా ఏఐ గురించే చర్చ. తాజాగా ప్రముఖ ఏఐ సంస్థ ‘ఆంథ్రోపిక్’ సీఈఓ డారియో అమోడెయ్ చేసిన వ్యాఖ్యలు వైద్య, సాంకేతిక రంగాల్లో ప్రకంపనలు సృష్టిస్తున్నాయి. రానున్న పదేళ్లలో క్యాన్సర్, అల్జీమర్స్, గుండె జబ్బులు, మానసిక అనారోగ్యాలకు శాశ్వత పరిష్కారం లభిస్తుందని ఆయన సంచలన అంచనా వేశారు. వేల ఏళ్లుగా మానవాళిని వేధిస్తున్న వ్యాధులకు ఏఐ ద్వారా అద్భుతమైన పరిష్కారాలు దొరుకుతాయని ఆయన ఆశాభావం వ్యక్తం చేశారు. కేవలం అమోడెయ్ మాత్రమే కాదు.. గూగుల్ ఏఐ విభాగం అధిపతి డెమిస్ హసాబిస్, టెక్ బిలియనీర్ ఎలాన్ మస్క్ కూడా ఇదే అభిప్రాయాన్ని వ్యక్తం చేస్తున్నారు. సాధారణంగా ఒక కొత్త మందు తయారు చేయడానికి పదేళ్ల సమయం పడితే, ఏఐ ఆ సమయాన్ని కేవలం కొన్ని వారాలకు కుదించగలదని హసాబిస్ చెబుతున్నారు.
అసలు ఏఐ వైద్య రంగంలో ఎలాంటి అద్భుతాలు చేయబోతోంది? దీనికి ప్రధాన ఉదాహరణ గూగుల్ రూపొందించిన ‘ఆల్ఫాఫోల్డ్’ టూల్. మానవ శరీరంలోని 20 కోట్లకు పైగా ప్రొటీన్ల నిర్మాణాలను ఏఐ అత్యంత కచ్చితత్వంతో అంచనా వేసి శాస్త్రవేత్తలను ఆశ్చర్యపరిచింది. దీనివల్ల వ్యాధి మూలాలను గుర్తించడం చాలా సులభమైంది.జబ్బు లక్షణాలు బయటపడకముందే, మన రక్త నమూనాలు, స్కానింగ్ రిపోర్టులను విశ్లేషించి, భవిష్యత్తులో రాబోయే క్యాన్సర్ లేదా గుండెపోటును ఏఐ ముందే పసిగడుతుంది. అందరికీ ఒకే మందు కాకుండా, ఒక వ్యక్తి డీఎన్ఏ ఆధారంగా కేవలం ఆ వ్యక్తికి మాత్రమే పనిచేసే ప్రత్యేక మందులను ఏఐ డిజైన్ చేస్తుంది. ఏఐ ఆధారిత రోబోలు మనిషి చేతికి సాధ్యం కాని అత్యంత సూక్ష్మమైన ఆపరేషన్లను కూడా ఎలాంటి పొరపాట్లు లేకుండా పూర్తి చేస్తాయి.
పదేళ్లలో పెద్ద జబ్బులు మాయమైపోతాయంటే అంతకంటే కావాల్సింది ఏముంది? కానీ, ఇక్కడే అసలు ట్విస్ట్ ఉంది. కంప్యూటర్ స్క్రీన్ మీద కనిపించే అద్భుతాలకు, మనిషి శరీరంలో జరిగే మార్పులకు మధ్య చాలా పెద్ద అగాధం ఉందని ఔషధ రంగ నిపుణులు గట్టిగా వాదిస్తున్నారు. అయితే ఏఐ దిగ్గజాల అంచనాలపై… ప్రముఖ ఫార్మా సంస్థ ‘వెర్టెక్స్ ఫార్మాస్యూటికల్స్’ ఎగ్జిక్యూటివ్ ఛైర్మన్ జెఫ్ లీడెన్ తీవ్ర సందేహాలు వ్యక్తం చేశారు. సుమారు 10 వేల ఔషధ సమ్మేళనాలను పరిశీలించడానికి తాము 50 ఏఐ సంస్థల సాంకేతికతను పరీక్షించామని, కానీ వాటిలో ఏ ఒక్కటీ స్వతంత్రంగా పనిచేసే పూర్తిస్థాయి ఔషధాన్ని తయారు చేయలేకపోయిందని ఆయన స్పష్టం చేశారు. కంప్యూటర్ నమూనాలో ఒక మందు బాగా పనిచేస్తుందని తేలడం కేవలం మొదటి అడుగు మాత్రమే. ఆ తర్వాత ఆ మందును ప్రయోగశాలల్లో, జంతువులపై, ఆపై వేలాది మంది మనుషులపై ‘క్లినికల్ ట్రయల్స్’ నిర్వహించాలి. ఆ మందు సురక్షితమా? దానివల్ల సైడ్ ఎఫెక్ట్స్ ఏమైనా ఉన్నాయా? అని తేలడానికి ఏళ్ల తరబడి సమయం పడుతుందని తెలిపారు. నియంత్రణ సంస్థల అనుమతులు రావాలని… అందుకే ఒక కొత్త మందు మార్కెట్లోకి రావడానికి కనీసం 10 నుండి 12 ఏళ్లు పడుతుందని శాస్త్రవేత్తలు గుర్తుచేస్తున్నారు.
