follow us:
22 ఏళ్ల కసి.. కమల్ హాసన్ రివెంజ్
ఒక్క టైటిల్.. తమిళనాడులో రచ్చ
మళ్లీ చుట్టుకున్న సండియర్ వివాదం
కమల్ హాసన్ vs కృష్ణసామి వార్
కమల్ హాసన్ కొత్త సినిమా టైటిల్ సండియర్ చుట్టూ ప్రస్తుతం తమిళనాడులో తీవ్రమైన రాజకీయ, కుల వివాదం నడుస్తోంది. రెండు దశాబ్దాల క్రితం నాటి పాత గొడవ మళ్లీ తెరపైకి రావడంతో ఈ ప్రాజెక్ట్ వివాదాల్లో చిక్కుకుంది. సినిమాల్లో కనిపించే పగలు, ప్రతీకారాల తరహాలోనే ఉలగనాయగన్ కమల్ హాసన్ నిజజీవితంలో కూడా ఒకే టైటిల్ కారణంగా ఇరవై ఏళ్ల తర్వాత మళ్లీ అదే తరహా వివాదం ఎదురవుతోంది. ఇటీవల రాజ్యసభ సభ్యుడిగా బాధ్యతలు చేపట్టిన కమల్ హాసన్, వరుస సినిమాలతో బిజీగా ఉన్న తరుణంలో ఆయనపై తాజాగా పోలీస్ స్టేషన్‌లో కేసు నమోదైంది.
నవంబర్ 7న కమల్ హాసన్ తన 72వ జన్మదినం సందర్భంగా దర్శకుడు ఎస్‌యు అరుణ్ కుమార్ కాంబినేషన్‌లో కొత్త చిత్రాన్ని ప్రకటిస్తూ దానికి సండియర్ అనే పేరు ఖరారు చేశారు. ఈ పేరు బయటకు రాగానే ‘పుదియ తమిళగం’ పార్టీ అధినేత డాక్టర్ కృష్ణసామి రంగంలోకి దిగి తీవ్ర నిరసన వ్యక్తం చేశారు. ‘సండియర్’ అనే పదం తమిళ సమాజంలో ఒక వర్గం యొక్క రౌడీయిజానికి, ఆధిపత్య ధోరణికి ప్రతీకగా నిలుస్తుందని, ఇది కులాల మధ్య చిచ్చు పెడుతుందని ఆయన ఆరోపించారు.
సరిగ్గా 2003లో కమల్ హాసన్ ఒక భారీ మాస్ సినిమాకు ఇదే టైటిల్ పెట్టగా, అప్పట్లో కూడా ఇదే కృష్ణసామి షూటింగ్‌ను అడ్డుకుంటామని హెచ్చరించారు.ఆ సమయంలో రక్షణ కల్పించాలంటూ కమల్ హాసన్ అప్పటి ముఖ్యమంత్రి జయలలితను ఆశ్రయించగా, సినిమాలు వినోదం కోసమే కానీ వివాదాల కోసం కాదంటూ ఆమె సున్నితంగా తిరస్కరించారు. దాంతో కమల్ హాసన్ వెనక్కి తగ్గి ఆ చిత్రానికి ‘విరుమాండి’ అని పేరు మార్చగా, ఆ సినిమా బాక్సాఫీస్ వద్ద ఇండస్ట్రీ హిట్‌గా నిలిచింది.
కట్ చేస్తే.. ప్రస్తుతం కమల్ కేవలం నటుడే కాకుండా ఒక రాజకీయ పార్టీ నేతగా, పార్లమెంట్ సభ్యుడిగా ఉండటంతో నాటి పాత టైటిల్‌ను పట్టుదలతో తిరిగి వాడాలని నిర్ణయించుకున్నారు. కమల్ హాసన్‌కు అహంకారం పెరిగిందని, ఈ టైటిల్‌ను ఉపయోగిస్తే ఆయన తమిళనాడు విడిచి వెళ్లాల్సి వస్తుందని కృష్ణసామి గట్టిగా హెచ్చరిస్తున్నారు. సినిమా ఇంకా చిత్రీకరణ దశకు వెళ్లకుండానే లీగల్ చిక్కుల్లో పడటంతో, ఈసారి కూడా కమల్ హాసన్ లొంగిపోయి పేరు మారుస్తారా లేదా ఎంపీ హోదాలో తగ్గేదేలే అని ముందుకెళ్తారా అనేది ఆసక్తికరంగా మారింది.
