వాహనం నడుపుతున్న ప్రతి ఒక్కరూ ఈ వార్తను తెలుసుకోవాల్సిందే. ఎందుకంటే, ఇప్పటివరకు టోల్ గేట్ అనగానే కేవలం ఫాస్టాగ్ బ్యాలెన్స్ లేదా టోల్ ట్యాక్స్ కట్ అవ్వడం మాత్రమే మనకు తెలుసు. కానీ, ఇక నుంచి మీ వెహికల్కు ఇన్సూరెన్స్ ఉందా లేదా అనేది కూడా టోల్ గేట్ దగ్గరే ఇట్టే తెలిసిపోతుంది. ఇన్సూరెన్స్ రెన్యూవల్ చేసుకోకుండా రోడ్డెక్కే వాహనదారులకు నేషనల్ హైవే అథారిటీ ఆఫ్ ఇండియా ఒక గట్టి షాక్ ఇచ్చేందుకు సిద్ధమైంది. ఇంతకు అసలు మ్యాటరేంటి అనేది ఓ సారి చూద్దాం.
కొత్తగా వెహికల్ కొనుగోలు చేసినప్పుడు మొదటి ఏడాది డీలరే ఇన్సూరెన్స్ అందిస్తాడు. అయితే చాలా మంది ఆ గడువు ముగిసిన తర్వాత ఏళ్ల తరబడి రెన్యూవల్ చేసుకోకుండానే వాహనాలను రోడ్లపై నడుపుతుంటారు. ఇలాంటి వారి ఆటకట్టించేందుకే NHAI ఒక కీలక నిర్ణయం తీసుకుంది. టోల్ గేట్ల వద్ద వెహికల్స్ ఇన్సూరెన్స్ స్టేటస్ను ఆటోమేటిక్గా గుర్తించేందుకు ఒక సరికొత్త టెక్నాలజీని రూపొందించింది. ప్రస్తుతం ఈ అత్యాధునిక ఆటోమేటెడ్ వ్యవస్థను ఢిల్లీలోని అర్బన్ ఎక్స్టెన్షన్ రోడ్ పై ముండ్కా టోల్ ప్లాజా వద్ద తొలిసారిగా ‘పైలట్ ప్రాజెక్ట్’ కింద విజయవంతంగా ప్రారంభించారు. రాబోయే రోజుల్లో దీన్ని దేశవ్యాప్తంగా అన్ని టోల్ గేట్ల వద్ద అమల్లోకి తెచ్చేందుకు సన్నాహాలు చేస్తున్నారు.
ఈ వ్యవస్థ వెనుక ప్రభుత్వానికి చెందిన పటిష్టమైన డేటాబేస్ అనుసంధానం ఉంది. ఇప్పటివరకు ఉన్న వాహనాల సమాచారాన్ని, కేంద్ర ప్రభుత్వ ‘వాహన్’ డేటా బేస్తో లింక్ చేసి ఈ టెక్నాలజీని డెవలప్ చేశారు. ఏ వాహనమైనా సరే టోల్ గేట్ గుండా వెళ్లగానే, ఆ వెహికల్ రిజిస్ట్రేషన్ నెంబర్ ఆటోమేటిగ్గా ‘వాహన్’ డేటా బేస్కు చేరుకుంటుంది. ఆ క్షణంలో ఆ వాహనానికి థర్డ్ పార్టీ యాక్టివ్ ఇన్సూరెన్స్ ఉందా లేదా అనే విషయాన్ని సిస్టమ్ క్షణాల వ్యవధిలో వెదికి పట్టుకుంటుంది. ఒకవేళ పాలసీ గడువు ముగిసిందని తేలితే, ఆ వెంటనే అసలు ప్రక్రియ మొదలవుతుంది.
మీ వాహనానికి ఇన్సూరెన్స్ లేదని తేలితే.. టోల్ గేట్ దాటిన కొన్ని నిమిషాల వ్యవధిలోనే మీ రిజిస్ట్రేషన్ నెంబర్కు లింక్ అయి ఉన్న మొబైల్ నెంబర్కు ఒక హెచ్చరిక సందేశం వస్తుంది. ఆ ఎస్ఎంఎస్లో మీ వెహికల్ రిజిస్ట్రేషన్ నెంబర్, టోల్ దాటిన సమయం, ఇన్సూరెన్స్ పాలసీ గడువు ముగిసిన వివరాలు స్పష్టంగా ఉంటాయి. వెంటనే పాలసీని రెన్యూవల్ చేసుకోవాలని ఆ మెసేజ్ ద్వారా మిమ్మల్ని అప్రమత్తం చేస్తారు. ఒకవేళ నిర్లక్ష్యం చేస్తే భారీగా జరిమానాలు చెల్లించాల్సి ఉంటుందని హెచ్చరిస్తున్నారు.
ఇక్కడ వాహనదారులు ఒక ముఖ్యమైన విషయాన్ని గమనించాలి. ఇన్సూరెన్స్ లేదనే కారణంతో టోల్ గేట్ వద్ద మీ వాహనాన్ని ఎక్కడా ఆపడం జరగదు. అలాగే మీ ఫాస్టాగ్ ఖాతా నుంచి అప్పటికప్పుడే జరిమానా డబ్బులు కట్ అయ్యే విధానం కూడా ప్రస్తుతానికి లేదు. కేవలం వాహనదారుల్లో అవగాహన కల్పించడానికి, సకాలంలో ఇన్సూరెన్స్ రెన్యూవల్ చేసుకునేలా ప్రోత్సహించడానికి మాత్రమే ఈ రూల్ తీసుకొచ్చారు. కాబట్టి, మీ వాహన ఇన్సూరెన్స్ గడువు తీరిపోతే వెంటనే రెన్యూవల్ చేసుకొని భారీ పెనాల్టీల బారి నుంచి తప్పించుకోండి.
