follow us:
వైఎస్ అనిల్ రెడ్డి కుమార్తె వివాహ వేడుక వేదికగా అరుదైన కలయిక ఆవిష్కృతమైంది. తమిళనాడు సీఎం, టీవీకే అధినేత విజయ్, ఏపీ మాజీ సీఎం వైఎస్ జగన్ మోహన్ రెడ్డి, తెలంగాణ మాజీ మంత్రి కేటీఆర్.. వీరంతా ఒకే వేదికపై పక్కపక్కనే కనిపించి ముచ్చటించారు. వీరే కాకుండా ప్రముఖ పారిశ్రామికవేత్త గౌతమ్ అదానీ, అందాల నటి త్రిష కూడా ఈ వేడుకలో మెరవడంతో సోషల్ మీడియా మొత్తం ఈ ఫొటోలతో ట్రెండింగ్ గా మారుతున్నాయి.
చెన్నైలోని ‘ది లీలా ప్యాలెస్ లో గ్రాండ్ గా వైఎస్ జగన్ మోహన్ రెడ్డి సోదరుడు వైఎస్ అనిల్ రెడ్డి కుమార్తె శ్రేయా రెడ్డి వివాహం గ్రాండ్ గా జరిగింది. ఈ శుభకార్యానికి రెండు తెలుగు రాష్ట్రాల నుంచి మాత్రమే కాకుండా, పొరుగున ఉన్న తమిళనాడు రాజకీయ రంగానికి చెందిన ప్రముఖులు పెద్ద సంఖ్యలో హాజరయ్యారు. ఏపీ మాజీ సీఎం వైఎస్ జగన్ మోహన్ రెడ్డి తన సతీమణి భారతి రెడ్డితో కలిసి హాజరై నూతన వధూవరులను ఆశీర్వదించారు. అలాగే తెలంగాణ నుంచి బీఆర్‌ఎస్ వర్కింగ్ ప్రెసిడెంట్ KTR కూడా తన సతీమణితో కలిసి వివాహ వేడుకకు విచ్చేశారు.
ఈ వేడుకలో ప్రత్యేక ఆకర్షణగా నిలిచారు టీవీకే అధినేత విజయ్, సినీ నటి త్రిష. విజయ్, త్రిష ఈ వేడుకకు హాజరై నూతన దంపతులకు శుభాకాంక్షలు తెలిపారు. అంతేకాకుండా, అంతర్జాతీయ స్థాయిలో ప్రముఖ పారిశ్రామికవేత్తగా పేరుగాంచిన గౌతమ్ అదానీ కూడా ఈ శుభకార్యానికి ప్రత్యేక అతిథిగా హాజరై అందరినీ ఆశ్చర్యపరిచారు. రాజకీయం, వ్యాపారం, సినిమా రంగాలకు చెందిన దిగ్గజాలు ఒకే వేదికపై కలవడం వేడుకకు సరికొత్త శోభను ఇచ్చింది.
పెళ్లి వేదికపై వైఎస్ జగన్, దళపతి విజయ్, కేటీఆర్‌లు ఒకరినొకరు ఆప్యాయంగా పలకరించుకుని కొద్దిసేపు ముచ్చటించారు. పక్కపక్కనే కూర్చుని నవ్వుతూ మాట్లాడుకుంటున్న దృశ్యాలు, అలాగే కేటీఆర్ తమ సతీమణితో కలిసి జగన్ దంపతులతో దిగిన ఫొటోలు సోషల్ మీడియా వేదికగా విపరీతంగా ట్రెండ్ అవుతున్నాయి. వివిధ రాజకీయ సిద్ధాంతాలు కలిగిన నాయకులు ఎలాంటి విభేదాలు లేకుండా చాలా ఆప్యాయంగా గడపడం నెటిజన్లను విశేషంగా ఆకట్టుకుంటోంది.
రాజకీయాల్లో ప్రత్యర్థులుగా, వివిధ పార్టీల అగ్రనేతలుగా ఉన్నప్పటికీ ఇలాంటి వ్యక్తిగత, కుటుంబ వేడుకల్లో ఒకే చోట కలిసి కనిపించడం ప్రజాస్వామ్యంలో మంచి పరిణామమని విశ్లేషకులు భావిస్తున్నారు. చెన్నై వేదికగా జరిగిన ఈ వెడ్డింగ్ పిక్స్ ఇప్పుడు నెట్టింట ట్రెండ్ అవుతున్నాయి. అయితే పులివెందులలో జన్మించిన వైఎస్ జగన్ సోదరుడు అనిల్ రెడ్డి ప్రస్తుతం చెన్నై కేంద్రంగా నివసిస్తున్నారు. వైఎస్సార్ కుటుంబంలో ఆయనకు అత్యంత సన్నిహితుడిగా గుర్తింపు ఉంది. ఆయనకు ఆఫ్రికా వంటి దేశాల్లో)మద్యం వ్యాపారాలు, అలాగే దేశీయంగా పలు కంపెనీలు ఉన్నాయి. గత వైఎస్సార్సీపీ ప్రభుత్వ హయాంలో తెరవెనుక ఉండి పార్టీకి సంబంధించిన పలు ఆర్థిక వ్యవహారాలను, ఎన్నికల సర్వేలను ఈయన పర్యవేక్షించారని రాజకీయ వర్గాల్లో ప్రచారం ఉంది.
