follow us:
ఏపీలో పెండింగ్ పట్టణ స్థానిక సంస్థల ఎన్నికలకు రాష్ట్ర ఎన్నికల సంఘం ఎట్టకేలకు గ్రీన్ సిగ్నల్ ఇచ్చేసింది. రాష్ట్ర ఎన్నికల కమిషనర్ అనిల్ చంద్ర పునేఠా తాజాగా ఈ ఎన్నికల నోటిఫికేషన్‌ను విడుదల చేయడంతో, ఆయా ప్రాంతాల్లో ఒక్కసారిగా పొలిటికల్ హీట్ మొదలైంది. ఇంతకీ ఏయే ప్రాంతాల్లో ఈ ఎన్నికలు జరగబోతున్నాయి? ఓటింగ్ ఎప్పుడు..? కౌంటింగ్ ఎప్పుడు..?
ఈ మొత్తం ప్రక్రియను చాలా వేగంగా పూర్తి చేయడానికి సన్నాహాలు చేస్తున్నారు. ఈ నోటిఫికేషన్ వెలువడిన తక్షణమే సంబంధిత పురపాలక సంఘాల పరిధిలో ఎన్నికల కోడ్ అమల్లోకి వచ్చేసింది. ఇకపై ఆయా ప్రాంతాల్లో ఎలాంటి కొత్త ప్రభుత్వ పథకాల ప్రకటనలు గానీ, శంకుస్థాపనలు గానీ చేయడానికి వీలుండదు. అధికార యంత్రాంగం మొత్తం పూర్తిగా ఎన్నికల సంఘం పర్యవేక్షణలోకి వెళ్ళిపోయింది. దీనివల్ల క్షేత్రస్థాయిలో రాజకీయ సమీకరణాలు ఒక్కసారిగా మారిపోయాయి.
ఇక ఈ ఎన్నికల ప్రక్రియకు సంబంధించిన తేదీల విషయానికి వస్తే.. అభ్యర్థులకు ప్రచారం చేసుకోవడానికి సమయం చాలా తక్కువగా ఉందని చెప్పాలి. ఈ నెల 14వ తేదీ నుంచి 16వ తేదీ వరకు నామినేషన్లను స్వీకరిస్తారు. ఆ తర్వాత 17వ తేదీన నామినేషన్ల పరిశీలన ఉంటుంది. పోటీ నుంచి తప్పుకోవాలనుకునే అభ్యర్థుల ఉపసంహరణకు నవంబర్ 19వ తేదీ వరకు గడువు ఇచ్చారు. అసలైన ఘట్టం నవంబర్ 26వ తేదీన జరగనుంది. ఆ రోజు ఉదయం 7 గంటల నుంచి సాయంత్రం 5 గంటల వరకు పోలింగ్ నిర్వహిస్తారు. ఇక అభ్యర్థుల భవితవ్యాన్ని తేల్చే ఓట్ల లెక్కింపు ప్రక్రియను నవంబర్ 30వ తేదీన చేపట్టి, అదే రోజు ఫలితాలను అధికారికంగా వెల్లడిస్తారు.
ఇకపోతే.. గతంలో తలెత్తిన పలు న్యాయపరమైన వివాదాలు, అలాగే వార్డుల పునర్విభజన అంశాల కారణంగా ఈ ప్రక్రియకు బ్రేక్ పడింది. పలువురు కోర్టులను ఆశ్రయించడంతో ఎన్నికల నిర్వహణ వాయిదా పడుతూ వచ్చింది. అయితే, ఇటీవల రాష్ట్ర హైకోర్టులో ఈ కేసులు కొలిక్కి రావడం, న్యాయపరమైన అడ్డంకులన్నీ తొలగిపోవడంతో ఎన్నికల నిర్వహణకు లైన్ క్లియర్ అయింది. దీనికి తోడు రిజర్వేషన్ల ఖరారు ప్రక్రియ కూడా పూర్తి కావడంతో, ఏమాత్రం ఆలస్యం చేయకుండా ఎలక్షన్ కమిషన్ రంగంలోకి దిగింది.
ఈ మినీ సమరం రాష్ట్రంలోని అత్యంత కీలకమైన ప్రాంతాల్లో జరగబోతోంది. ముఖ్యంగా నాలుగు ప్రధాన నగరపాలక సంస్థలైన శ్రీకాకుళం, కాకినాడ, రాజమండ్రితో పాటు మంగళగిరి-తాడేపల్లి కార్పొరేషన్ల పరిధిలోని మొత్తం 260 డివిజన్లకు ఓటింగ్ జరగనుంది. వీటితో పాటు రాష్ట్రవ్యాప్తంగా ఉన్న 19 మున్సిపాలిటీలు, నగర పంచాయతీల పరిధిలోని 749 వార్డులకు ప్రజాప్రతినిధులను ఎన్నుకోనున్నారు. అంటే మొత్తంగా వెయ్యికి పైగా స్థానాల్లో ఈ ఎన్నికల పోరు జరగబోతోందన్నమాట.
