follow us:
హైదరాబాద్ నగరం కేంద్రంగా సాగుతున్న ఒక భయంకరమైన, చీకటి దందా వైద్య ఆరోగ్య శాఖ దాడుల్లో బట్టబయలైంది. అమాయక, నిరుపేద మహిళల జీవితాలతో చెలగాటమాడుతూ, చట్టవిరుద్ధంగా అండాలను సేకరిస్తున్న ఒక అంతర్రాష్ట్ర ముఠా వ్యవహారం బయటకు రావడంతో ప్రభుత్వం తీవ్రంగా పరిగణించింది. ఇతర రాష్ట్రాల నుంచి మహిళలను ఇక్కడికి రప్పించి, భారీగా డబ్బులు ఆశచూపి వారి ఆరోగ్యాన్ని పణంగా పెడుతున్నIVF, ART కేంద్రాలపై ప్రభుత్వం ఇప్పుడు ఉక్కుపాదం మోపుతోంది. ఈ దందా వెనుక ఉన్న బడా బాబులు ఎవరు? ప్రభుత్వం తీసుకున్న సంచలన నిర్ణయాలు ఏంటి..?
ఈ ముసుగులో జరుగుతున్న అక్రమాలను లోతుగా విచారించడానికి, నిందితులను పట్టుకోవడానికి వైద్య ఆరోగ్య శాఖ ఏకంగా 10 ప్రత్యేక టాస్క్‌ఫోర్స్ టీమ్ లను రంగంలోకి దించింది. గత నాలుగైదు రోజులుగా ఈ టీమ్స్ రాష్ట్ర వ్యాప్తంగా ఉన్న అసిస్టెడ్ రీప్రొడక్టివ్ టెక్నాలజీ కేంద్రాల్లో అత్యంత ముమ్మరంగా తనిఖీలు నిర్వహిస్తున్నాయి. రాష్ట్రవ్యాప్తంగా మొత్తం 44 ఏఆర్‌టీ కేంద్రాలు ఉండగా, ఇప్పటివరకు 27 కేంద్రాల్లో దాడులు పూర్తి చేశారు. అందులో షాకింగ్ విషయమేమిటంటే.. ఏకంగా 7 కేంద్రాల్లో నిబంధనలను ఉల్లంఘించినట్లు ఎవిడెన్స్ తో సహా బయటపడింది. ఈ తనిఖీల సమయంలో అండాలు దానం చేస్తున్న 31 మంది మహిళలను అధికారులు గుర్తించి వారిని వ్యక్తిగతంగా విచారిస్తున్నారు.
పోలీసుల దర్యాప్తులో ఈ దందాకు సంబంధించి మైండ్ బ్లోయింగ్ విషయాలు వెలుగులోకి వచ్చాయి. నిరుపేద మహిళలకు పెద్ద మొత్తంలో డబ్బులు ఆశచూపడమే కాకుండా, చట్టపరమైన నిబంధనలను తప్పించుకోవడానికి నకిలీ ఆధార్ కార్డులను సృష్టించి ఈ దందాను నడిపిస్తున్నట్లు తేలింది. హైదరాబాద్‌లోని కొన్ని కేంద్రాలు ఒకే మహిళ నుంచి నిబంధనలకు విరుద్ధంగా పలుమార్లు అండాలు సేకరిస్తున్నట్లు అధికారులు కనుగొన్నారు. ఈ అక్రమ నెట్‌వర్క్ నడుపుతున్న ప్రధాన సూత్రధారిని పోలీసులు ఇప్పటికే అదుపులోకి తీసుకున్నట్లు సమాచారం. ఆయా ఐవీఎఫ్ కేంద్రాలకు నోటీసులు జారీ చేసి, ల్యాబ్‌ల్లోని ఆధార్ కార్డులు, అంగీకార పత్రాలను స్వాధీనం చేసుకుని ఫోరెన్సిక్ పరిశీలన చేస్తున్నారు.
ఈ అక్రమ దందాపై రాష్ట్ర వైద్య ఆరోగ్య శాఖ మంత్రి దామోదర్ రాజనర్సింహ అత్యంత కఠినంగా వ్యవహరించాలని అధికారులకు స్పష్టమైన ఆదేశాలు జారీ చేశారు. అండాల సేకరణలో డాక్టర్లు, ఐవీఎఫ్ సెంటర్లు, మధ్యవర్తుల పాత్రపై సమగ్ర విచారణ జరుపుతున్నారు. ఇందులో భాగంగా ఈ నెల 6న వైద్యాధికారుల బృందం ఢిల్లీకి వెళ్లి ‘నేషనల్ ఏఆర్‌టీ అండ్ సరోగసీ రిజిస్ట్రీ’ని సందర్శించింది. రాష్ట్రంలో రిజిస్టర్ అయిన ఏఆర్‌టీ కేంద్రాలు, అండాల బ్యాంకుల పూర్తి డేటాను సేకరిస్తున్నారు. ఈ సమాచారాన్ని నేషనల్ ఇన్ఫర్మాటిక్స్ సెంటర్ ద్వారా త్వరలోనే నివేదిక రూపంలో పొందనున్నారు.
మధ్యవర్తుల మాయమాటలు, ఆర్థిక ప్రలోభాలకు లోనై అమాయక మహిళలు తమ ఆరోగ్యాలను బలి చేసుకోవద్దని వైద్య ఆరోగ్య శాఖ తీవ్రంగా హెచ్చరించింది. అక్రమాలకు పాల్పడే ఏ ఒక్క ఆస్పత్రిని లేదా ఏఆర్‌టీ కేంద్రాన్ని విడిచిపెట్టేదే లేదని ప్రభుత్వం తేల్చిచెప్పింది. మెడికల్ రంగానికి కలంకం తెచ్చే ఇలాంటి దందాలపై ప్రభుత్వం తీసుకుంటున్న కఠిన చర్యల వల్ల త్వరలోనే పూర్తి నిజాలు బయటకు రానున్నాయి.
