ప్రపంచాన్ని వణికిస్తున్న కొత్త కరోనా వేరియంట్.. PJ.2.1 లక్షణాలు ఇవే.. జాగ్రత్త!

ప్రపంచాన్ని గడగడలాడించిన కరోనా వైరస్ మళ్లీ తన రూపాన్ని మార్చుకుని కొత్త అవతారంలో వార్తల్లోకి వచ్చింది. కోవిడ్ భయం నుంచి కోలుకుంటున్న ప్రపంచానికి ‘PJ.2.1’ అనే సరికొత్త సబ్ వేరియంట్ కలవరాన్ని రేపుతోంది. పలు అభివృద్ధి చెందిన దేశాల్లో ఈ వేరియంట్ కేసులు వేగంగా వెలుగుచూస్తుండటంతో అంతర్జాతీయ వైద్య నిపుణులు, ప్రపంచ ఆరోగ్య సంస్థ రంగంలోకి దిగాయి. అసలు ఈ కొత్త వేరియంట్ ఎంత వేగంగా వ్యాపిస్తుంది? దీని వల్ల మళ్లీ పాత రోజులు గుర్తొచ్చే ముప్పు ఉందా? ఈ వేరియంట్ లక్షణాలు ఎలా ఉన్నాయి..?

ఈ PJ.2.1 వేరియంట్ తొలి కేసు అక్టోబర్ 2026 ప్రిప్రింట్ అధ్యయనం ప్రకారం 2026 మే 2న కెనడాలోని అంటారియోలో నమోదైంది. ఆ తర్వాత న్యూయార్క్, స్పెయిన్, ఫ్రాన్స్, ఇజ్రాయెల్, సింగపూర్, ఆస్ట్రేలియా దేశాలకు ఇది వేగంగా వ్యాపించింది. ఈ వేరియంట్ స్పైక్ ప్రొటీన్‌లో జరిగిన మ్యుటేషన్ల వల్ల మానవ కణాల్లోని ‘ACE2 రిసెప్టర్’తో ఇది చాలా బలంగా అతుక్కునే లక్షణాన్ని పొందిందని, దీనివల్ల ఒకరి నుంచి ఒకరికి వేగంగా సంక్రమించే అవకాశం ఎక్కువగా ఉందని శాస్త్రవేత్తలు ల్యాబ్ పరీక్షల్లో తేల్చారు.

ఇక ఈ కొత్త వేరియంట్ లక్షణాల విషయానికి వస్తే.. ఇవి సాధారణ జలుబు, ఫ్లూ మాదిరిగానే ఉంటున్నాయని నిపుణులు చెప్తున్నారు. జ్వరం, తగ్గని పొడిదగ్గు, ముక్కు దిబ్బడ, తీవ్రమైన తలనొప్పితో పాటు ఒళ్లు నొప్పులు ప్రధానంగా కనిపిస్తున్నాయి. రష్యన్ వైరాలజిస్ట్ ఎలెనా మాలీన్నికోవా పరిశోధన ప్రకారం.. ఈ వేరియంట్ సోకిన వారిలో గొంతు నొప్పి అత్యంత తీవ్రంగా ఉంటోందని, ఇన్ఫెక్షన్ తగ్గాక కూడా సుదీర్ఘకాలం పాటు తీవ్రమైన నీరసం, అలసట వేధిస్తున్నాయని తెలిపారు. కేవలం లక్షణాల ద్వారా దీనిని పసిగట్టడం కష్టం కాబట్టి మెడికల్ టెస్టులు మాత్రమే కచ్చితమైన సమాధానం ఇస్తాయని నిపుణులు స్పష్టం చేస్తున్నారు.

అయితే ఇక్కడ ఊరట కలిగించే అంశం ఏంటంటే.. ఈ వేరియంట్ వేగంగా సోకినప్పటికీ పాత వేరియంట్ల కంటే ప్రమాదకరమైనదనడానికి ఎలాంటి ఆధారాలూ లేవని ‘జర్నల్ ఆఫ్ ఇన్‌ఫెక్షన్’ ప్రచురించిన నివేదిక స్పష్టం చేసింది. ఇప్పటికే అందుబాటులో ఉన్న వ్యాక్సిన్ల రోగనిరోధక శక్తిని ఇది తప్పించుకోలేకపోతోందని, దీనివల్ల ఆస్పత్రుల్లో చేరే వారి సంఖ్య గానీ లేదా మరణాల ప్రమాదం గానీ పెరగలేదని స్పష్టమైంది. అయినప్పటికీ వృద్ధులు, డయాబెటిస్, గుండె జబ్బులు, ఆస్తమా ఉన్నవారు, రోగనిరోధక శక్తి తక్కువగా ఉన్నవారు ఈ వేరియంట్ పట్ల చాలా అప్రమత్తంగా ఉండాలని వైద్యులు హెచ్చరిస్తున్నారు.

ముందస్తు జాగ్రత్తగా రద్దీగా ఉండే ప్రాంతాల్లో ప్రతి ఒక్కరూ సరైన మాస్క్ ధరించడం, చేతులను శుభ్రంగా కడుక్కోవడం, గాలి వెలుతురు ధారాళంగా ఆడే ప్రదేశాల్లో ఉండటం శ్రేయస్కరమని నిపుణులు సూచిస్తున్నారు. ఏమాత్రం అనారోగ్య లక్షణాలు కనిపించినా ఇతరులకు దూరంగా ఉండటం మంచిదని వైద్య నిపుణులు సూచిస్తున్నారు.