follow us:
మన దేశంలో ఆడపిల్ల పుట్టిందంటే సాక్షాత్తు మహాలక్ష్మి ఇంట్లోకి అడుగుపెట్టిందని చాలామంది సంబరాలు చేసుకుంటారు. కానీ, ఇప్పటికీ కొంతమంది మగబిడ్డే కావాలని పట్టుబడుతూ, ఆడపిల్ల పుడితే భారంగా భావించి చీదరించుకునే పరిస్థితులు ఉన్నాయి. సరిగ్గా ఇలాంటి ఒక ఆలోచన ఉన్న కుటుంబంలో జరిగిన ఒక రియల్ లైఫ్ మిరాకిల్ ఇప్పుడు దేశవ్యాప్తంగా సోషల్ మీడియాలో హాట్ టాపిక్‌గా మారింది. ఆడపిల్ల పుట్టిందని ముఖం తిప్పుకున్న బంధువుల ముందే, ఆ పసిబిడ్డ తండ్రి కేవలం 24 గంటల్లోనే కోటీశ్వరుడైపోయాడు. ఇంతకీ ఈ ఆసక్తికర ఘటన ఎక్కడ జరిగింది? రూ. 200 ఖర్చు పెట్టిన ఆ తండ్రికి ఏకంగా కోటీ 50 లక్షలు ఎలా వచ్చాయి?
ఈ ఆసక్తికరమైన ఘటన పంజాబ్ రాష్ట్రంలోని మన్సా జిల్లా, బరేటా టౌన్‌లో చోటుచేసుకుంది. ఇక్కడ నివసించే 24 ఏళ్ల యుధ్ వీర్ సింగ్ వృత్తిరీత్యా ఒక సాధారణ కార్పెంటర్. రోజువారీ పనులు చేసుకుంటూ కుటుంబాన్ని పోషించుకునే ఆయన తీవ్ర ఆర్థిక ఇబ్బందుల్లో ఉన్నాడు. అయితే, ఇటీవల ఆయన భార్య పండంటి ఆడబిడ్డకు జన్మనిచ్చింది. కానీ, ఆ కుటుంబం మగబిడ్డ కావాలని కోరుకోవడంతో, ఆస్పత్రిలో తల్లీబిడ్డను చూడటానికి వచ్చిన బంధువులు ఆడపిల్ల పుట్టిందని చీదరించుకున్నారు. అయితే, ఆ చిన్నారి తమ ఇంటికి ఎంతటి అదృష్టాన్ని తీసుకొచ్చిందో ఆ క్షణంలో ఎవరూ ఊహించలేకపోయారు.
అసలు ఈ అదృష్టం ఎలా తలుపు తట్టిందనే విషయాన్ని యుధ్ వీర్ సింగ్ స్వయంగా వివరించారు. నవంబర్ 4వ తేదీన తన భార్యను కాన్పు కోసం ఆస్పత్రికి తీసుకెళ్తున్న సమయంలో, మొబైల్ సిమ్ కార్డును పోర్ట్ చేయించుకోవడానికి ఒక షాపు వద్ద ఆగాడు. అక్కడే ‘పంజాబ్ స్టేట్ డియర్ 200 మంత్లీ లాటరీ’ షాపు కనిపించడంతో, లైఫ్‌లో ఫస్ట్ టైమ్ తన అదృష్టాన్ని పరీక్షించుకుందామని రూ. 200 పెట్టి ఒక టికెట్ కొనుగోలు చేశాడు. నిజానికి అప్పుడు ఆయన భార్య కూడా వారించింది.. “మనం ఇప్పటికే అప్పుల్లో ఉన్నాం, మెడికల్ టెస్టులకు కూడా డబ్బులు లేవు, ఇప్పుడు ఈ లాటరీలు ఎందుకు?” అని చెప్పింది. అయినప్పటికీ, ఏదో తెలియని నమ్మకంతో యుధ్ వీర్ ఆ టికెట్ తీసుకున్నాడు.
విధి రాత ఎలా ఉంటుందో చూడండి.. సరిగ్గా నవంబర్ 6, 7 తేదీల మధ్య తన భార్య ఆడబిడ్డకు జన్మనిచ్చిన రోజే లాటరీని తీశారు. ఆ ఫలితాలను చూసిన యుధ్ వీర్ సింగ్ ఒక్కసారిగా షాక్ అయ్యాడు. తాను మొదటిసారి కొన్న రూ. 200 టికెట్‌కు ఏకంగా కోటీ 50 లక్షల రూపాయల బంపర్ ప్రైజ్ తగిలింది. ఆడబిడ్డ పుట్టిన 24 గంటల్లోనే ఆ సాధారణ కార్పెంటర్ కోటీశ్వరుడిగా మారిపోయాడు. నిన్నటి వరకు ఆడపిల్ల అని చీదరించుకున్న బంధువులందరూ ఇప్పుడు నోరెళ్లబెట్టారు. తమ ఇంట్లో నిజంగానే లక్ష్మీదేవి అడుగుపెట్టిందని ఆ కుటుంబం ఇప్పుడు ఘనంగా సంబరాలు చేసుకుంటోంది.
తనకు వచ్చిన ఈ కోటీ 50 లక్షల రూపాయలను ఎంతో బాధ్యతగా ఖర్చు చేస్తానని యుధ్ వీర్ సింగ్ స్పష్టం చేశాడు. ఆర్థిక సమస్యలతో కొట్టుమిట్టాడుతున్న తమ కుటుంబం కోసం ఒక మంచి ఇల్లు నిర్మించుకోవడంతో పాటు, తనకు ఇంతటి అదృష్టాన్ని తెచ్చిపెట్టిన తన చిన్నారి చదువు, భవిష్యత్తు కోసమే ఈ డబ్బును ఉపయోగిస్తానని ఆనందంగా తెలిపాడు. చూశారు కదా.. ఆడపిల్లలు ఎప్పటికీ భారం కాదు, వారు ఇంటికి దీపం లాంటివారని ఈ ఘటన మరోసారి నిరూపించింది అంటూ నెటిజన్స్ కామెంట్స్ చేస్తున్నారు.
