follow us:
బాలీవుడ్ మెగాస్టార్ అమితాబ్ బచ్చన్ ఇంటి వద్ద మరోసారి హైటెన్షన్ వాతావరణం నెలకొంది. ఎప్పుడూ అభిమానుల కేరింతలతో, సందడిగా కనిపించే ముంబై జుహులోని ఆయన నివాసం ‘జల్సా’ పరిసరాల్లో ఒక్కసారిగా పోలీసుల బూట్ల చప్పుడు, బాంబ్ స్క్వాడ్ హడావుడి మొదలైంది. బిగ్ బి నివాసంతో పాటు ముంబై నగరంలోని పలు అత్యంత కీలకమైన ప్రాంతాలను బాంబులతో పేల్చేస్తామంటూ గుర్తుతెలియని వ్యక్తులు పంపిన ఒక బెదిరింపు ఈమెయిల్ ఇప్పుడు కలకలం రేపుతోంది.
ముంబై పోలీసులకు, సంబంధిత అధికారులకు అందిన ఈ బెదిరింపు మెయిల్ ఇప్పుడు సెక్యూరిటీ ఏజెన్సీలను ఉరుకులు పరుగులు పెట్టిస్తోంది. గుర్తుతెలియని దుండగులు పంపిన ఈ మెయిల్‌లో కేవలం అమితాబ్ బచ్చన్ నివాసం జల్సా మాత్రమే కాకుండా, ముంబైలోని అత్యంత రద్దీగా ఉండే ప్రదేశాలను కూడా టార్గెట్ చేస్తున్నట్లు తెలిపారు. మేయర్ కార్యాలయం, ఒక ప్రముఖ బ్యాంకు, కోర్టు ప్రాంగణం, రేస్‌కోర్స్, ముంబై విమానాశ్రయాన్ని బాంబులతో పేల్చేస్తామంటూ హెచ్చరికలు జారీ చేశారు. ఒకేసారి ఇన్ని కీలక ప్రాంతాలకు త్రెట్ రావడంతో ముంబై నగరంలో హైఅలర్ట్ ప్రకటించారు.
ఈ బెదిరింపు సమాచారం అందిన వెంటనే ముంబై పోలీసులు ఏమాత్రం ఆలస్యం చేయకుండా రంగంలోకి దిగారు. బాంబ్ డిస్పోజల్ స్క్వాడ్, డాగ్ స్క్వాడ్ బృందాలు అమితాబ్ బచ్చన్ నివాసం వద్దకు చేరుకుని అణువణువూ క్షుణ్ణంగా తనిఖీలు చేపట్టాయి. ఇంటి లోపల, బయట, చుట్టుపక్కల ప్రాంతాల్లో మెటల్ డిటెక్టర్లతో సెర్చ్ ఆపరేషన్ నిర్వహించారు. అదే సమయంలో మెయిల్‌లో పేర్కొన్న విమానాశ్రయం, కోర్టు, మేయర్ ఆఫీస్ వద్ద కూడా భద్రతను కట్టుదిట్టం చేసి, ముమ్మరంగా తనిఖీలు జరిపారు.
ఒకవైపు బాంబ్ స్క్వాడ్ బృందాలు క్షేత్రస్థాయిలో తనిఖీలు జరుపుతుండగానే, మరోవైపు ఈ బెదిరింపు ఈమెయిల్ మూలాలను కనిపెట్టే పనిలో ముంబై సైబర్ క్రైమ్ నిపుణులు నిమగ్నమయ్యారు. ఆ మెయిల్ ఏ ఐపీ అడ్రస్ నుంచి జనరేట్ అయింది? విదేశీ సర్వర్లను ఏమైనా ఉపయోగించారా? లేక స్థానికంగా ఉన్న ఆకతాయిల పనా? అనే కోణంలో టెక్నికల్ ఎవిడెన్స్ సేకరిస్తున్నారు. నిందితుల ఆచూకీని త్వరలోనే పట్టుకుంటామని పోలీస్ ఉన్నతాధికారులు ధీమా వ్యక్తం చేస్తున్నారు.
అయితే అమితాబ్ బచ్చన్‌కు ఇలాంటి బాంబు బెదిరింపులు రావడం ఇదే మొదటిసారి కాదు. గతంలో కూడా పలుమార్లు ఆయన నివాసానికి, అలాగే ముంబైలోని ఇతర సెలబ్రిటీల ఇళ్లకు, రైల్వే స్టేషన్లకు ఇలాంటి ఫేక్ కాల్స్, బెదిరింపు మెయిల్స్ వచ్చాయి. అప్పట్లో పోలీసులు దర్యాప్తు చేసి కొందరు ఆకతాయిలను అరెస్ట్ కూడా చేశారు. తాజా ఘటన కూడా అలాంటి ఆకతాయిల పనేనా లేక దీని వెనుక ఏదైనా కుట్ర కోణం దాగి ఉందా అన్నది పోలీసుల విచారణలో తేలాల్సి ఉంది.
