సామాన్యులు ఊహించడానికి కూడా సాహసించలేని ఒక అసాధారణ భక్తి యాత్ర అది. పశ్చిమ బెంగాల్ నుంచి కేరళలోని శబరిమల వరకు.. సుమారు 2,000 కిలోమీటర్ల దూరాన్ని కేవలం సాష్టాంగ నమస్కార యాత్ర ద్వారా పూర్తి చేయడానికి సంకల్పించాడు ఓ భక్తుడు. నడుస్తూనో, వాహనంపైనో కాకుండా కేవలం ‘సాష్టాంగ నమస్కారాలు’ చేసుకుంటూ పూర్తి చేయాలని ముందుకు సాగుతున్నాడు. అచంచలమైన అయ్యప్ప భక్తి, గో సంరక్షణ అనే ఆశయంతో ఆరు నెలల క్రితం మొదలైన ఈ కఠోర యాత్ర.. ప్రస్తుతం నెల్లూరు జిల్లా ఉలవపాళ్ల సమీపంలోని జాతీయ రహదారిపై కొనసాగుతోంది.
పశ్చిమ బెంగాల్కు చెందిన తరుణ్ బెహరా అనే యువకుడు ఎలాంటి సహాయకులు లేకుండా ఒంటరిగానే ఈ మహా యాత్రకు శ్రీకారం చుట్టాడు. యాత్ర సాగే విధానం చూస్తే ఎవరికైనా ఒళ్లు గగుర్పొడవాల్సిందే. తన వెంట ఉన్న సైకిల్పై వంట చేసుకోవడానికి అవసరమైన చిన్న స్టవ్, నిత్యావసర దినుసులను పెట్టుకున్నాడు. ముందుగా తన సైకిల్ను కొంత దూరం తీసుకెళ్లి రోడ్డు పక్కన నిలబెడతాడు. మళ్లీ వెనక్కి నడిచి వచ్చి, ఎక్కడైతే సాష్టాంగ నమస్కారం ఆపాడో సరిగ్గా అక్కడి నుంచే మళ్లీ నేలపై పడుకుని దండాలు పెట్టుకుంటూ సైకిల్ వద్దకు చేరుకుంటాడు. ఇలా రోజుకు కొంత దూరం చొప్పున ఆరు నెలలుగా ఎండకు ఎండుతూ, వానకు తడుస్తూ ముందుకు సాగుతున్నాడు. శబరిమల చేరుకోవడానికి మరో ఆరు నెలల సమయం పట్టే అవకాశం ఉంది.
హైవేపై ప్రాణాలకు తెగించి ఈ యువకుడు చేస్తున్న అకుంఠిత దీక్షను చూసి దారిన పోయేవారు ఆశ్చర్యపోతున్నారు. మార్గమధ్యలో అక్కడక్కడా స్థానిక యువకులు అతనికి అండగా నిలుస్తున్నారు. అతని సైకిల్ను ముందుకు తీసుకెళ్లడంతో పాటు, జాతీయ రహదారిపై వాహనాల రద్దీ వల్ల అతనికి ఎలాంటి ప్రమాదం జరగకుండా ట్రాఫిక్ను క్రమబద్ధీకరిస్తూ భక్తిభావాన్ని చాటుకుంటున్నారు. భగవంతుడిపై నమ్మకం, గోమాతను రక్షించాలనే దృఢ
సంకల్పమే ఈ యువకుడి చేత ఈ అసమాన యాత్ర చేయిస్తున్నాయని స్థానికులు కొనియాడుతున్నారు.
