follow us:
తన పర్సనల్ లైఫ్‌లో ఎదుర్కొన్న తీవ్రమైన మానసిక వేదన గురించి టీమిండియా వెటరన్ స్పిన్నర్ యుజ్వేంద్ర చాహల్ తాజాగా చేసిన వ్యాఖ్యలు క్రికెట్ ప్రపంచాన్ని ఒక్కసారిగా దిగ్భ్రాంతికి గురిచేస్తున్నాయి. విడాకుల అనంతరం సమాజం నుంచి వచ్చిన ఒత్తిడితో మద్యానికి బానసయ్యానని చాహల్ తెలిపాడు. అసలు చాహల్ తన జీవితంలో ఎదుర్కొన్న ఆ కష్టకాలం ఎలాంటిది? ఆయన ఎందుకు ఆ వ్యసనానికి బానిసయ్యారు?
భారత క్రికెట్ జట్టులో తనకంటూ ఒక ప్రత్యేక గుర్తింపు తెచ్చుకున్న యుజ్వేంద్ర చాహల్ ఇటీవల మాజీ క్రికెటర్ ఆకాశ్ చోప్రాకు ఇచ్చిన ఒక ప్రత్యేక ఇంటర్వ్యూలో తన వ్యక్తిగత జీవితం గురించిన చేదు నిజాలను బట్టబయలు చేశారు. విడాకులు, సమాజం నుంచి ఎదురైన ఒత్తిడి తనను ఎంతగా కుంగదీశాయో ఆయన కన్నీటి పర్యంతమవుతూ పంచుకున్న విషయాలు ఇప్పుడు నెట్టింట తీవ్ర చర్చనీయాంశంగా మారాయి.
ఆ ఇంటర్వ్యూలో చాహల్ మాట్లాడుతూ.. తన భార్యతో విడాకులు తీసుకున్న తర్వాత తన జీవితం ఒక్కసారిగా అదుపుతప్పిందని తెలిపారు. వ్యక్తిగత జీవితంలో ఎదురైన ఆ పెద్ద కుదుపు తనను మానసికంగా పూర్తిగా కుంగదీసిందని ఆయన చెప్పుకొచ్చారు. దీనికి తోడు సమాజం నుంచి తనపై విపరీతమైన ఒత్తిడి పెరిగిపోయిందని, తాను ఎదుర్కొన్న ఆ పరిణామాలు తనను డిప్రెషన్‌లోకి నెట్టేశాయని చాహల్ ఆవేదన వ్యక్తం చేశారు. చాలా చిన్న వయసులోనే తనకు లిక్కర్ అలవాటు అయిందని, ఆ తర్వాత విడాకుల కారణంగా ఆ పరిస్థితి మరింత దిగజారిందని ఆయన స్పష్టం చేశారు. ఎవరూ ఊహించని రీతిలో తన పర్సనల్ లైఫ్ ఇబ్బందుల్లో పడటంతో, ఆ బాధను తట్టుకోలేక తాను మానసికంగా తీవ్రంగా నలిగిపోయానని చాహల్ తెలిపారు.
మానసిక వేదనను భరించలేక తాను పూర్తిగా మద్యానికి బానిసైనట్లు చాహల్ ఎలాంటి మొహమాటం లేకుండా బహిరంగంగా ఒప్పుకున్నారు. ప్రతిరోజూ ఆ వ్యసనంలో కూరుకుపోవడం వల్ల తన ఆరోగ్యం, మనసు పూర్తిగా దెబ్బతిన్నాయని తెలిపారు. బయటకు ఎంతో ఆనందంగా కనిపించే ఒక స్టార్ క్రికెటర్ లోపల ఎంతటి నరకాన్ని అనుభవించాడో ఈ ఇంటర్వ్యూ చూస్తే అర్థమవుతుంది. సమాజం ఏమనుకుంటుందనే భయం, కుటుంబ జీవితం విచ్ఛిన్నం కావడంతో కలిగిన వేదన ఆయనను మరింత ఒంటరిని చేశాయి. ఆ సమయంలో ఆ వ్యసనం నుంచి బయటపడలేక తాను పడిన మానసిక సంఘర్షణ చాలా భయంకరంగా ఉండేదని చాహల్ గుర్తుచేసుకున్నారు.
అయితే ఈ వ్యసనం తన జీవితాన్ని, ముఖ్యంగా తనకు ప్రాణమైన క్రికెట్‌ను దూరం చేస్తుందని గ్రహించిన క్షణంలోనే తాను మేల్కొన్నట్లు చాహల్ వెల్లడించారు. “తాగుడు వల్ల నాకెంతో ఇష్టమైన క్రికెట్ నాకు దూరమవుతుందని గ్రహించా. వెంటనే రిహాబ్ సెంటర్‌ను ఆశ్రయించడంతో ఈ వ్యసనం నుంచి బయటపడగలిగా” అని ఆయన ఎమోషనల్ అయ్యారు.క్రికెట్ మీద ఉన్న అంతులేని ప్రేమ, దేశం తరఫున ఆడాలనే కసితోనే తాను ఆ వ్యసన కూపం నుంచి బయటపడటానికి ధైర్యం చేశానని తెలిపారు. రిహాబ్ సెంటర్‌లో తీసుకున్న చికిత్స, పడిన కఠినమైన శ్రమ తనను తిరిగి సాధారణ స్థితికి తీసుకువచ్చాయని, తన జీవితాన్ని కాపాడుకోవడానికి ఆ నిర్ణయమే కీలకమైందని ఆయన వివరించారు.
వ్యక్తిగత జీవితంలో ఇన్ని కష్టాలు, వ్యసనాలను ఎదుర్కొని తిరిగి తన ఫామ్‌ను నిలబెట్టుకోవడానికి చాహల్ పడిన తపన నిజంగా ప్రశంసనీయం. తన తప్పులను బహిరంగంగా ఒప్పుకోవడానికి చాలా ధైర్యం కావాలని, చాహల్ చూపిన ఈ నిజాయితీ ఎంతోమందికి స్ఫూర్తిదాయకమని క్రికెట్ అభిమానులు అభిప్రాయపడుతున్నారు.
