follow us:
అంతర్జాతీయ రాజకీయాల్లో మరో సంచలన పరిణామం చోటుచేసుకుంది. ఇరాన్ అణు రహస్యాలను చేధించేందుకు అమెరికా అత్యంత వ్యూహాత్మక అడుగు వేసింది. ఇరాన్ అణు కార్యక్రమంపై కీలక సమాచారం అందించిన వారికి ఏకంగా 20 మిలియన్ డాలర్ల భారీ రివార్డును ప్రకటించింది అమెరికా. అంటే మన ఇండియన్ కరెన్సీలో దాదాపు 166 కోట్ల రూపాయలు. యూఎస్ సెంట్రల్ కమాండ్ ఈ సంచలన ప్రకటనను విడుదల చేసింది. సమాచారం అందించిన వారికి భారీ రివార్డుతో పాటు, ప్రాణ రక్షణ కోసం అవసరమైతే పునరావాసం కూడా కల్పిస్తామని స్పష్టం చేసింది అమెరికా.
అమెరికా విదేశాంగ శాఖకు చెందిన ‘రివార్డ్స్ ఫర్ జస్టిస్’ కార్యక్రమం కింద ఈ భారీ ఆఫర్‌ను అధికారికంగా ప్రకటించారు. ఇరాన్ అణు సామర్థ్యాన్ని పూర్తిగా అణచివేయడమే లక్ష్యంగా అమెరికా ఈ నిర్ణయం తీసుకున్నట్లు తెలుస్తోంది. ముఖ్యంగా ఇరాన్ అణు కేంద్రాలు ఎక్కడ ఉన్నాయి? వాటిలో ఉపయోగిస్తున్న అత్యాధునిక పరికరాల వివరాలు ఏమిటి? ఈ ప్రాజెక్టుల్లో పాలుపంచుకుంటున్న అగ్రశ్రేణి శాస్త్రవేత్తలు, ఇతర సిబ్బందికి సంబంధించిన పూర్తి వివరాలను అందించాలని అమెరికా కోరింది. సమాచారం అందించే వారి ప్రాణాలకు ఎలాంటి ముప్పు రాకుండా ఉండేందుకు కట్టుదిట్టమైన భద్రతా చర్యలు తీసుకుంది.
అత్యంత సురక్షితమైన, ఎన్‌క్రిప్టెడ్ ‘సిగ్నల్’ యాప్ లేదా ‘టోర్’ ఆధారిత చానెల్స్ ద్వారా మాత్రమే ఈ సమాచారాన్ని రహస్యంగా పంపవచ్చని అమెరికా నిఘా వర్గాలు సూచించాయి. అంతర్జాతీయ అణు ఇంధన సంస్థ నిబంధనలను ఇరాన్ తీవ్రంగా ఉల్లంఘిస్తోందని, సెంట్రిఫ్యూజ్‌ల వంటి కీలక పరికరాల ఉత్పత్తి, నిల్వలపై పర్యవేక్షణ లేకుండా పోయిందని అమెరికా విదేశాంగ శాఖ ఆందోళన వ్యక్తం చేసింది. ఈ భారీ రివార్డు ప్రకటనకు కొద్దిసేపటి ముందే, ఫ్లోరిడాలోని వెస్ట్ పామ్ బీచ్‌లో జరిగిన ఒక కార్యక్రమంలో అమెరికా అధ్యక్షుడు డొనాల్డ్ ట్రంప్ ఇరాన్‌పై తీవ్ర స్థాయిలో విరుచుకుపడ్డారు. ఇరాన్ విషయంలో తాము తీసుకున్న దూకుడు నిర్ణయాలను ఆయన సమర్థించుకున్నారు.
తాము గనుక ఇరాన్‌పై దాడి చేయకపోయి ఉంటే, ఈ రోజు ప్రపంచ పటంలో ఇజ్రాయెల్ అనే దేశమే ఉండేది కాదన్నారు. ఇరాన్‌కు గనుక అణ్వాయుధాలు చిక్కి ఉంటే, వారు వాటిని ఇజ్రాయెల్‌పై తప్పకుండా వాడేవారని అన్నారు ట్రంప్. గత ఎనిమిది నెలలుగా సాగుతున్న ఘర్షణల వల్ల ఇరాన్ ఆర్థికంగా, సైనికంగా పూర్తిగా దెబ్బతింది. ఇప్పుడు ఆ దేశం తీవ్ర సంక్షోభంలో ఉంది. అందుకే ఇప్పుడు చర్చలు, ఒప్పందం కోసం ఇరాన్ ఆరాటపడుతోంది. ట్రంప్ అంతటితో ఆగలేదు. మధ్య ఇరాన్‌లోని ‘పికాక్స్ మౌంటెన్’ వంటి ఒకటి రెండు రహస్య ప్రాంతాలపై తాము ఇంకా నిఘా పెట్టాల్సి ఉందని, అక్కడ అనుమానాస్పద కార్యకలాపాలు జరుగుతున్నాయని సంచలన వ్యాఖ్యలు చేశారు.
అయితే, అమెరికా అధ్యక్షుడు డొనాల్డ్ ట్రంప్ చేసిన ఈ ఆరోపణలను ఇరాన్ అధికారులు తీవ్రంగా ఖండించారు. ట్రంప్ ప్రస్తావించిన ‘పికాక్స్ మౌంటెన్’ ప్రాంతానికి ఇరాన్ అణు కార్యక్రమాలతో ఎలాంటి సంబంధం లేదని వారు స్పష్టం చేశారు. అమెరికా కేవలం ఇరాన్‌ను బద్నాం చేయడానికి, ప్రపంచ దేశాలను తప్పుదోవ పట్టించడానికి ఇలాంటి అబద్ధాలు ప్రచారం చేస్తోందని మండిపడ్డారు.మరోవైపు, ఉద్రిక్తతలను పెంచడం తమకు ఇష్టం లేదని ఇరాన్ సంకేతాలు పంపింది. ఈ అంతర్జాతీయ సంక్షోభాన్ని కేవలం చర్చల ద్వారా మాత్రమే పరిష్కరించుకోవడానికి తాము సిద్ధంగా ఉన్నామని ఇరాన్ అధ్యక్షుడు మసూద్ పెజేష్కియాన్ ఇటీవలే స్పష్టం చేయడం ఇక్కడ గమనార్హం. తాము అంతర్జాతీయ నిబంధనలకు కట్టుబడే ఉన్నామని టెహ్రాన్ వాదిస్తోంది.
మొత్తానికి ఇరాన్‌ను ఆర్థికంగా దెబ్బతీయడంతో పాటు, ఇప్పుడు అణు రహస్యాలను కొనుగోలు చేసేందుకు అమెరికా రూ. 166 కోట్ల భారీ వ్యూహాన్ని తెరపైకి తెచ్చింది. మరి అమెరికా వేసిన ఈ రివార్డు ఎరపై ఇరాన్ లోపల ఎలాంటి పరిణామాలు ఎదురవుతాయి? ఇరాన్ అణు రహస్యాలు బయటపడతాయా లేదా అనేది రాబోయే రోజుల్లో చూడాలి.
