వాయుగుండం ఎఫెక్ట్,, ఈ జిల్లాల్లో అతి భారీ వర్షాలు, మరో మూడు గంటల్లో అలర్ట్

తెలంగాణకు బిగ్ అలర్ట్ జారీ చేసింది వాతావరణ శాఖ. బంగాళాఖాతంలో ఏర్పడనున్న వాయుగుండం ప్రభావంతో రెండ్రోజులు అతి భారీ వర్షాలు పడనున్నాయి. ఏయే ప్రాంతాల్లో ప్రభావం అధికంగా ఉంటుందో తెలుసుకుందాం.

బంగాళాఖాతంలో ఈ నెల 25వ తేదీన అల్పపీడనం ఏర్పడనుంది. ఇది కాస్తా 26 నాటికి వాయుగుండంగా బలపడి దక్షిణ ఒడిశా, ఉత్తరాంధ్ర కోస్తా తీరాన తీరం దాటనుందని ఐఎండీ వెల్లడించింది. ఫలితంగా రానున్న రోజుల్లో ముఖ్యంగా ఈ నెల 26, 27 తేదీల్లో భారీ నుంచి అతి భారీ వర్షాలు పడనున్నాయి. ఈ నెల 25న ఏర్పడే అల్పపీడనం వాయుగుండంగా మారి ఈ నెల 27న తీరం దాటవచ్చని అంచనా ఉంది. వాయుగుండం ప్రభావంతో ఈ నెల 26వ తేదీన అదిలాబాద్, నిర్మల్, నిజామాబాద్, ములుగు, వరంగల్, జయశంకర్ భూపాలపల్లి, హనుమకొండ, సిద్దిపేట, జనగామ, యాదాద్రి భువనగిరి, వికారాబాద్, సంగారెడ్డి, మెదక్, కామారెడ్డి జిల్లాల్లో 10-20 సెంటీమీటర్ల మేర వర్షపాతం కురిసే అవకాశాలున్నాయని ఐఎండీ తెలిపింది.

ఇక ఈ నెల 27వ తేదీన నిజామాబాద్, వికారాబాద్, ఆసిఫాబాద్, అదిలాబాద్, సంగారెడ్డి, మెదక్, కామారెడ్డి జిల్లాల్లో సైతం మోస్తరు నుంచి భారీ వర్షాలు పడవచ్చు. మరోవైపు తెలంగాణలోని కొన్ని జిల్లాల్లో రానున్న 3 గంటల్లో భారీ వర్షం పడవచ్చు. ముఖ్యంగా వరంగల్, భూపాలపల్లి, కరీంనగర్, సిద్దిపేట, రంగారెడ్డి, కామారెడ్డి జిల్లాల్లో ఉరుములు, మెరుపులతో కూడిన వర్షాలు పడనున్నాయి. భారీ వర్షాల నేపధ్యంలో అత్యవసరమైతే తప్ప ప్రయాణాలు చేయవద్దని అధికారులు సూచిస్తున్నారు.