follow us:
హైదరాబాద్ మహానగరంలో లంచగొండి అధికారుల గుట్టురట్టు చేసే పనిలో ఏసీబీ అధికారులు మరో భారీ వికెట్ పడగొట్టారు. GHMC టౌన్ ప్లానింగ్ విభాగంలో జరుగుతున్న అక్రమాలను బట్టబయలు చేస్తూ.. ఏకంగా నాలుగు లక్షల రూపాయల లంచం తీసుకుంటున్న ఒక లేడీ అధికారిణిని అవినీతి నిరోధక శాఖ అధికారులు రెడ్‌ హ్యాండెడ్‌గా పట్టుకున్నారు. మెహదీపట్నం GHMC కార్యాలయంలో టౌన్ ప్లానింగ్ సూపర్‌ వైజర్‌గా విధులు నిర్వహిస్తున్న తులసీరామ్‌ సునీత.. ఇప్పుడు ఏసీబీ వలలో చిక్కిన అడ్డగోలు అవినీతి తిమింగలంగా మారారు.
ఒక భవన నిర్మాణానికి అనుమతి ఇచ్చేందుకు డిప్యూటీ కమిషనర్‌ ఆదేశాలు జారీ చేసినప్పటికీ.. ఆ ఆదేశాలను ఏమాత్రం పట్టించుకోకుండా, సదరు నిర్మాణదారుడిని సునీత తీవ్ర ఇబ్బందులకు గురిచేసింది. పర్మిషన్ కావాలంటే ఏకంగా 8 లక్షల రూపాయల మామూళ్లు ఇచ్చుకోవాలంటూ డిమాండ్ చేసింది. అంతేకాదు, ఇప్పుడు డబ్బులిస్తే భవిష్యత్‌లోనూ మీ నిర్మాణానికి ఎలాంటి డోకా లేకుండా సహకరిస్తానంటూ ఆ బిల్డర్‌కు గట్టి భరోసా కూడా ఇచ్చింది. అయితే సదరు బాధితుడు ఈ అక్రమ వసూళ్లపై నిశ్శబ్దంగా ఏసీబీ అధికారులను ఆశ్రయించడంతో.. అధికారులు ఒక పక్కా స్కెచ్ వేశారు.
ఖైరతాబాద్‌ జోన్‌ కార్యాలయం బయట సునీత తన కారులో కూర్చుని..బాధితుడి నుంచి తొలి విడతగా నాలుగు లక్షల రూపాయల లంచం డబ్బులు తీసుకుని, తన కారులో పెట్టించుకుంటుండగా ఏసీబీ అధికారులు ఒక్కసారిగా ఎటాక్ చేసి ఆమెను అదుపులోకి తీసుకున్నారు. అక్కడితో ఆగని అధికారులు ఆమె కారును తనిఖీ చేయగా.. ఈ లంచం సొమ్ము కాకుండా, లెక్కల్లో చూపని మరో రెండున్నర లక్షల రూపాయల అదనపు నగదు కూడా లభ్యమవడంతో అధికారులు షాక్‌కు గురయ్యారు. మొత్తంగా సునీత వద్ద నుంచి ఆరున్నర లక్షల రూపాయల నగదును స్వాధీనం చేసుకున్న అధికారులు.. ఆమెను వెంటనే అరెస్టు చేశారు. ప్రస్తుతం ఏసీబీ డీఎస్పీ మాజిద్‌ అలీఖాన్‌ ఆధ్వర్యంలో సునీత నివాసంలో అధికారులు ముమ్మరంగా సోదాలు నిర్వహిస్తున్నారు.
ఈ లేడీ ఆఫీసర్ లంచం భాగోతం కేవలం నాలుగు లక్షలతోనే ఆగిపోలేదని, దీని వెనుక ఒక పెద్ద అవినీతి తిమింగలాల నెట్‌వర్క్ ఉందనే అనుమానాలు ఇప్పుడు బలంగా వ్యక్తమవుతున్నాయి. సునీత ఇంట్లో ఏసీబీ అధికారులు జరుపుతున్న సోదాల్లో.. బినామీ ఆస్తులకు సంబంధించిన కీలక పత్రాలు, విలువైన బంగారు ఆభరణాలు పలు బ్యాంక్ లాకర్ల తాళాలను ఇప్పటికే స్వాధీనం చేసుకున్నట్లు సమాచారం లీకైంది. మెహదీపట్నం పరిధిలో గత కొన్ని నెలలుగా ఆమె క్లియర్ చేసిన టౌన్ ప్లానింగ్ ఫైళ్లన్నింటినీ అధికారులు ఇప్పుడు రీ-వెరిఫికేషన్ కోసం ప్రత్యేకంగా సీజ్ చేస్తున్నారు.
అంతేకాదు, ఈ అక్రమ వసూళ్ల వెనుక జీహెచ్‌ఎంసీ కి చెందిన మరికొందరు ఉన్నతాధికారుల హస్తం కూడా ఉందనే కోణంలో ఏసీబీ ఇంటరాగేషన్ ముమ్మరంగా సాగుతోంది.
తులసీరామ్‌ సునీతను ఏసీబీ ప్రత్యేక కోర్టు ముందు హాజరుపరిచి, తదుపరి విచారణ కోసం కస్టడీకి కోరనున్నారు అధికారులు. ఒక పక్కా బిల్డింగ్ పర్మిషన్ కోసం ఒక సాధారణ సిటిజన్ నుంచి ఇంత భారీ మొత్తంలో లంచం డిమాండ్ చేయడంపై నగరవ్యాప్తంగా ఉన్న బిల్డర్లు, ప్రజలు తీవ్ర ఆగ్రహం వ్యక్తం చేస్తున్నారు.నగరంలో టౌన్ ప్లానింగ్ అధికారుల వేధింపులు ఎదుర్కొంటున్న బాధితులు ఎవరైనా ఉంటే.. భయపడకుండా ఏసీబీ టోల్ ఫ్రీ నెంబర్‌కు ఫిర్యాదు చేయాలని ఉన్నతాధికారులు ప్రకటన విడుదల చేశారు. మరి ఈ సోదాల్లో ఇంకా ఎన్ని కోట్ల అక్రమ ఆస్తులు బయటపడతాయో, ఈ అవినీతి చేతుల్లో ఇంకెంతమంది పెద్దల పేర్లు బయటకు వస్తాయో చూడాలి!
