వన్డే కెప్టెన్‌గా విరాట్‌ కోహ్లీని తప్పించడానికి కారణం ఇదే!

విరాట్‌ కోహ్లీని టీమిండియా వన్డే జట్టు కెప్టెన్‌గా బీసీసీఐ తొలగించింది. అతని స్థానంలో రోహిత్‌ శర్మను సారథిగా నియమించింది. ఈ నిర్ణయంతో క్రికెట్‌ ప్రపంచం ఒక్కసారిగా షాక్‌ అయింది. విరాట్‌ కోహ్లీని ఎందుకు కెప్టెన్‌గా తొలగించారు అని అతని ఫ్యాన్స్‌ ఆందోళన చెందారు. బీసీసీఐ ఈ షాకింగ్‌ నిర్ణయం తీసుకోవడం వెనుక రెండు బలమైన కారణాలు ఉన్నట్లు తెలుస్తుంది. టీ20 వరల్డ్‌ కప్‌ 2021 తర్వాత టీ20 జట్టు కెప్టెన్‌గా తప్పుకుంటానని కోహ్లీ టోర్నీ ప్రారంభానికి ముందే ప్రకటించాడు. అలాగే వన్డే, టెస్ట్‌ జట్లకు కెప్టెన్‌గా ఉంటానని పేర్కొన్నాడు. ఈ నిర్ణయంపై బీసీసీఐ సంతృత్తి వ్యక్తం చేయలేదు. రెండు పరిమిత ఓవర్ల ఫార్మెట్లకు వేరువేరు కెప్టెన్లు ఉండడం కరెక్ట్‌ కాదని బీసీసీఐ పెద్దలు భావించినట్లు సమాచారం.

టీ20, వన్డే జట్లకు వేర్వురు కెప్టెన్లు ఉంటే ఆటగాళ్లు ఇబ్బంది పడే అవకాశం ఉందని బీసీసీఐ గ్రహించింది. అందుకే వన్డే కెప్టెన్సీ నుంచి కూడా కోహ్లీని తప్పించి టీ20 కెప్టెన్‌గా ఉన్న రోహిత్‌ శర్మకు బాధ్యతలు అప్పగించినట్లు సమాచారం. ఇక రెండో కారణం.. 2023 వన్డే ప్రపంచ కప్‌. ఈ మెగా ఐసీసీ ఈవెంట్‌ను దృష్టిలో ఉంచుకుని వన్డే కెప్టెన్‌ను బీసీసీఐ మార్చినట్లు తెలుస్తుంది. కోహ్లీ 2023 వరకు వన్డే కెప్టెన్‌గా ఉండాలని భావించాడు. కానీ బీసీసీఐ మాత్రం టీ20 కెప్టెనే వన్డేలకు ఉంటే మంచిదని భావించింది. అందుకు కారణం.. టీ20 జట్టులోని ఆటగాళ్లు వన్డే జట్టులో ఉంటారు. వారితో సమన్వయం దెబ్బతిన కుండా.. 2023 వన్డే వరల్డ్‌ కప్‌ వరకు మంచి జట్టును తయారు చేసుకునేందుకు కెప్టెన్‌గా రోహిత్‌కు అవకాశం ఉంటుందని బీసీసీఐ భావించి కోహ్లీని తొలగించినట్లు సమాచారం.

The All-India Senior Selection Committee also decided to name Mr Rohit Sharma as the Captain of the ODI & T20I teams going forward.#TeamIndia | @ImRo45 pic.twitter.com/hcg92sPtCa

— BCCI (@BCCI) December 8, 2021

ఈ రెండు ప్రధాన అంశాలు కారణంగా కోహ్లీని కెప్టెన్‌గా తప్పించినట్లు తెలుస్తుంది. ఇక వీటికి తోడు విరాట్‌ కోహ్లీ స్వయంకృత అపరాధం కూడా ఉందని క్రికెట్‌ నిపుణులు అంటున్నారు. విరాట్‌ అనవసరంగా టీ20 కెప్టెన్సీని వదులుకున్నాడని.. టీ20 కెప్టెన్సీ వదులుకోవడం వల్లే ఇప్పుడు వన్డే కెప్టెన్సీ పోయిందని అంటున్నారు. పరిమిత ఓవర్లకు ఒకే కెప్టెన్‌ ఉండడం అనేది మంచి నిర్ణయమే.. కోహ్లీ టీ20 కెప్టెన్‌గా ఉండిఉంటే వన్డే కెప్టెన్‌గా కూడా కొనసాగేవాడని వారి అభిప్రాయం. మరి కోహ్లీని వన్డే కెప్టెన్‌గా తొలగించడంపై మీ అభిప్రాయాలను కామెంట్ల రూపంలో తెలియజేయండి.