follow us:
హైదరాబాద్ శివారు మీర్‌పేట్ పోలీస్ స్టేషన్ పరిధిలో దారుణం చోటుచేసుకుంది. పట్టపగలే ఒక వివాహిత అత్యంత దారుణంగా హత్యకు గురైంది. జిల్లెలగూడ దత్తునగర్‌లోని ఒక అపార్ట్‌మెంట్‌లో ఈ ఘటన కలకలం రేపింది. ఇంట్లో ఎవరూ లేని సమయంలో దుండగులు ఈ ఘాతుకానికి పాల్పడినట్లు తెలుస్తోంది. స్కూల్ నుంచి ఇంటికి వచ్చిన పిల్లలు తల్లిని రక్తపు మడుగులో చూసి షాక్‌కు గురయ్యారు.
హైదరాబాద్‌లోని మీర్‌పేట్ పరిధిలో గల జిల్లెలగూడ దత్తునగర్‌లో విషాదకర ఘటన జరిగింది. స్థానికంగా ఉన్న శ్రీ లక్ష్మీ రెసిడెన్సీ బ్లాక్-A లోని మూడో అంతస్తులో తమిళనాడుకు చెందిన అరుణ్ కుమార్ తన కుటుంబంతో కలిసి నివాసం ఉంటున్నారు. అరుణ్ కుమార్ కేంద్ర ప్రభుత్వ సంస్థ అయిన మిధానిలో ఉద్యోగిగా పనిచేస్తున్నారు. గత నాలుగు సంవత్సరాలుగా వీరు ఇదే అపార్ట్‌మెంట్‌లో అద్దెకు ఉంటున్నారు. అరుణ్ కుమార్ భార్య పేరు అనిత, వయసు 35 సంవత్సరాలు. వీరికి పిల్లలు కూడా ఉన్నారు.రోజువారీ లాగే అరుణ్ కుమార్ డ్యూటీకి వెళ్లగా, పిల్లలు పాఠశాలకు వెళ్లారు. ఇంట్లో అనిత ఒక్కరే ఉన్న సమయంలో గుర్తు తెలియని వ్యక్తులు లోపలికి ప్రవేశించి ఆమెను అత్యంత దారుణంగా హత్య చేశారు.
సాయంత్రం పాఠశాల ముగిసిన తర్వాత పిల్లలు ఇంటికి తిరిగి వచ్చారు. ఇంట్లోకి అడుగుపెట్టగానే తల్లి అనిత రక్తపు మడుగులో విగతజీవిగా పడి ఉండటాన్ని చూసి వారు తీవ్ర భయాందోళనకు గురయ్యారు.వెంటనే తేరుకున్న పిల్లలు, డ్యూటీలో ఉన్న తమ తండ్రి అరుణ్ కుమార్‌కు ఫోన్ చేసి విషయాన్ని తెలియజేశారు. హుటాహుటిన ఇంటికి చేరుకున్న అరుణ్ కుమార్, కుటుంబ సభ్యుల సహాయంతో అనితను సమీపంలోని ఆసుపత్రికి తరలించారు.అయితే, అప్పటికే ఆమె మృతి చెందినట్లు వైద్యులు ధృవీకరించారు. దీంతో కుటుంబ సభ్యులు కన్నీరుమున్నీరుగా విలపిస్తున్నారు. ప్రశాంతంగా ఉండే అపార్ట్‌మెంట్‌లో ఈ ఘటన జరగడంతో స్థానికులు భయాందోళనకు గురవుతున్నారు.
