తాత ఆస్తిలో మనవడికి వాటా లేదా? తండ్రి బతికుంటే హక్కు ఉండదన్న సుప్రీంకోర్టు!

మన దేశంలో పిత్రార్జిత ఆస్తులు, తాత ముత్తాతల ఆస్తి పంపకాలకు సంబంధించి దేశ అత్యున్నత న్యాయస్థానం సుప్రీంకోర్టు ఒక సంచలన తీర్పును వెలువరించింది. తాత నుంచి తండ్రికి సంక్రమించిన ఆస్తిపై మనవడికి స్వతంత్ర హక్కులు లేదా జన్మతః వాటా లభిస్తుందా లేదా అనే అంశంపై సుప్రీంకోర్టు తీవ్రమైన స్పష్టతనిచ్చింది. “తండ్రి జీవించి ఉన్నంతవరకు ఆస్తిపై మనవడికి ఎలాంటి క్లెయిమ్ చేసే హక్కు ఉండదు” అని జస్టిస్ ఆగస్టిన్ జార్జ్ మసీహ్, జస్టిస్ సునితా అగర్వాల్‌లతో కూడిన ద్విసభ్య ధర్మాసనం తేల్చిచెప్పింది. అసలు ఈ కేసు వెనుక ఉన్న పూర్తి వివరాలు, చట్టపరమైన అంశాలు ఏంటో ఇప్పుడు డీటెయిల్డ్‌గా చూద్దాం.

ఈ వివాదం తమిళనాడు రాష్ట్రంలో ప్రారంభమైంది. చెన్నైకి చెందిన ఒక వ్యక్తి, 1997లో తన తండ్రికి తన తాత నుంచి వచ్చిన ఆస్తిలో తనకు చట్టబద్ధమైన వాటా కావాలని కోరుతూ కోర్టులో పిటిషన్ దాఖలు చేశాడు. తండ్రి తన అనుమతి లేకుండా ఆ ఆస్తిని విక్రయించడాన్ని ఆ వ్యక్తి సవాలు చేశాడు. ఈ కేసులో గతంలో మద్రాస్ హైకోర్టు సదరు పిటిషన్‌ను కొట్టివేసింది. హైకోర్టు ఇచ్చిన తీర్పును సవాలు చేస్తూ బాధితుడు సుప్రీంకోర్టులో అప్పీల్ చేయగా, సుప్రీంకోర్టు కూడా మద్రాస్ హైకోర్టు తీర్పును సమర్థిస్తూ ఆ అప్పీల్‌ను పూర్తిగా డిస్మిస్ చేసింది.

ఈ తీర్పులో న్యాయమూర్తులు 1956 హిందూ వారసత్వ చట్టంలోని 1956 ‘సెక్షన్ 8’ నిబంధనలను ప్రధానంగా ప్రస్తావించారు. తాత మరణించిన తర్వాత ఆయన ఆస్తి నేరుగా చట్టబద్ధమైన క్లాస్-1 వారసులకు మాత్రమే చేరుతుందని స్పష్టం చేశారు. క్లాస్-1 వారసుల జాబితాలో తండ్రి నేరుగా ఉంటాడు తప్పా, మనవడికి అందులో డైరెక్ట్ రైట్ ఉండదు. సాంప్రదాయక పద్ధతుల కంటే 1956 చట్టంలోని ప్రావిజన్స్ మాత్రమే ప్రాథమికమైనవని, విభజన తర్వాత తండ్రి పొందిన ఆస్తి ఆయన యొక్క సొంత ఆస్తిగా మారిపోతుందని కోర్టు వివరించింది.

సుప్రీంకోర్టు తన తీర్పులో మరొక కీలకమైన అంశాన్ని వెల్లడించింది. తాత నుంచి తనకు లభించిన ఆస్తిపై తండ్రికి సంపూర్ణమైన, వ్యక్తిగత హక్కులు ఉంటాయి. తండ్రి ఆ ఆస్తిని అమ్మడం, మరొకరికి బదిలీ చేయడం లేదా తన ఇష్టానుసారంగా ఉపయోగించుకోవడం అనేది పూర్తిగా ఆయన పర్సనల్ డెసిషన్ పై ఆధారపడి ఉంటుంది. తండ్రి తీసుకునే ఆస్తి విక్రయ నిర్ణయాలను లేదా లావాదేవీలను కోర్టుల్లో సవాలు చేసే అధికారం మనవడికి ఎంతమాత్రం ఉండదని ధర్మాసనం క్లారిటీ ఇచ్చింది.

మొత్తానికి చూస్తే, ఈ తీర్పు దేశవ్యాప్తంగా వివిధ కోర్టుల్లో పెండింగ్‌లో ఉన్న వేలాది ఆస్తి వివాదాలకు, పిత్రార్జిత ఆస్తులకు మార్గదర్శిగా నిలవబోతోందని.. తాతల కాలం నాటి ఆస్తుల పెంపకంలో కుటుంబ సభ్యుల మధ్య వచ్చే అనవసరపు చట్టపరమైన చిక్కులకు ఈ తీర్పుతో ఒక చెక్ పడినట్లయిందని న్యాయ నిపుణులు అభిప్రాయపడుతున్నారు.