బిగ్ బ్రేకింగ్: రాష్ట్ర వ్యాప్తంగా స్కూళ్ళు, కాలేజీలకు రెండు రోజులు సెలవులు..

తెలంగాణ రాష్ట్రంలో వర్షం దంచి కొడుతోంది. పలు జిల్లాలలో రెడ్ అలర్ట్ ప్రకటించారు. వాతావరణ శాఖ హెచ్చరికలు కూడా జారీ చేసింది. మూడు రోజులుగా ఎడతెరిపి లేకుండా వర్షం కురుస్తుంది. ఈ క్రమంలో తెలంగాణ రాష్ట్ర ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా అన్ని విద్యాసంస్థలకు రెండు రోజులు సెలవులు ప్రకటించింది. ఈ మేరకు విద్యాశాఖ మంత్రి సబితా ఇంద్రారెడ్డి ఒక ప్రకటన చేశారు. ‘రాష్ట్రంలో భారీ వర్షాల కారణంగా సీఎం కేసీఆర్ సూచనల మేరకు రాష్ట్రంలో ఉన్న అన్ని విద్యాసంస్థలకు ప్రభుత్వం రెండు రోజుల పాటు సెలవులు ఇవ్వాలని నిర్ణయించింది. గురువారం, శుక్రవారం రెండు రోజులు సెలవు’ అని సబితా ఇంద్రారెడ్డి ట్వీట్ చేశారు.

అల్పపీడన ప్రభావంతో తెలంగాణ రాష్ట్ర వ్యాప్తంగా రెండు రోజులుగా ఎడతెరిపి లేకుండా వర్షాలు కురుస్తున్నాయి. 48 గంటలుగా కురుస్తున్న వానల కారణంగా అనేక ప్రాంతాల్లో జనజీవనం స్తంభించింది. జనగామ జిల్లా జాఫర్ గఢ్ లో 18.5 సెంటీమీటర్ల వర్షపాతం నమోదవ్వగా.. యాదాద్రి జిల్లా రాజాపేట్ లో 17.1 సెంటీమీటర్లు, మెదక్ జిల్లా ఎల్దుర్తిలో 14.6 సెంటీమీటర్ల వర్షపాతం నమోదైంది. యాదాద్రి కొమురం భీం జిల్లా బెజ్జూర్ లో 14.1 సెంటీమీటర్లు, వరంగల్ జిల్లాలోని పర్వతగిరిలో 13.9 సెంటీమీటర్లు, సిద్ధిపేట జిల్లా తొగులలో 13 సెంటీమీటర్ల వర్షపాతం నమోదైంది. భద్రాద్రి జిల్లా ఆళ్ళపల్లిలో 11.8, కామారెడ్డి జిల్లా గాంధారిలో 11.5, సంగారెడ్డి జిల్లా ఆందోలులో 11.4, నిజామాబాద్ జిల్లా ఇందల్వాయిలో 9.4 సెంటీమీటర్ల వర్షపాతం నమోదైంది.

హైదరాబాద్ లోని షేక్ పేట్ లో 6.6, ఖైరతాబాద్ లో 4.7, మేడ్చల్ మల్కాజ్ గిరి జిల్లా కూకట్ పల్లిలో 5.6, కుత్బుల్లాపూర్ లో 4.7, సంగారెడ్డి జిల్లా పటాన్ చెరులో 4.5 సెంటీమీటర్ల వర్షపాతం నమోదైంది. వచ్చే నాలుగు రోజుల పాటు భారీ నుంచి అతి భారీ వర్షాలు కురుస్తాయని వాతావరణ శాఖ హెచ్చరించింది. ఈ క్రమంలో 5 జిల్లాలకు రెడ్ అలర్ట్, 7 జిల్లాలకు ఆరెంజ్ అలర్ట్, మిగతా జిల్లాలకు ఎల్లో అలర్ట్ జారీ చేసింది. ఆగస్టు నెల మొదటి వారం వరకూ తేలికపాటి వర్షాలు కురిసే అవకాశాలు ఉన్నాయని వాతావరణ శాఖ అధికారులు వెల్లడించారు.

Keeping in view of the heavy rainfall in the state and under the instructions of the Honourable CM, KCR garu, the Govt has decided to declare holidays for two days to all education institutions in the state. That is Thursday and Friday.

— SabithaReddy (@SabithaindraTRS) July 20, 2023