follow us:
పండగపూట హైదరాబాద్ లో దారుణం చోటు చేసుకుంది. అత్తాపూర్ లోని ఓ వైన్స్ షాపు వద్ద మద్యం సేవించేందుకు వెళ్లిన ఓ వ్యక్తిపై వైన్ షాప్ సిబ్బంది దాడికి దిగారు. ఈ దాడిలో తీవ్రంగా గాయపడ్డ నాగరాజు అనే వ్యక్తి స్పాట్ లో ప్రాణాలు కోల్పోయారు. ఈ ఘటనపై మృతుడి కుటుంబ సభ్యులు స్థానిక పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేస్తున్నారు.
రాజేంద్రనగర్ నియోజకవర్గ పరిధిలోని అత్తాపూర్ పిల్లర్ నంబర్ 140 సమీపంలో ఉన్న ‘బల్కంపేట ఎల్లమ్మ వైన్స్’ వద్ద ఈ దారుణం చోటు చేసుకుంది. పండుగ పూట కాస్త రిలాక్స్ అవుదామని మద్యం సేవించేందుకు నాగరాజు అనే 43 ఏళ్ల వ్యక్తి ఈ వైన్స్‌కు వచ్చాడు. అక్కడ మద్యం కొనుగోలు చేసే సమయంలో వైన్స్ సిబ్బందికి, నాగరాజుకు మధ్య ఏదో విషయంలో చిన్నగా మాటమాట పెరిగింది. సాధారణంగా సర్దుబాటు చేసుకోవాల్సిన కస్టమర్ గొడవను వైన్స్ యజమానులు, అక్కడి వర్కర్లు పెద్దది చేసి నాగరాజుపై తీవ్ర ఆగ్రహంతో విరుచుకుపడ్డారు.”
“గొడవ తీవ్రమవ్వడంతో వైన్స్ యజమానులు, అక్కడ పనిచేసే సిబ్బంది గుంపుగా చేరి నాగరాజుపై ఏకపక్షంగా దాడికి తెగబడినట్లుగా తెలుస్తోంది. రోడ్డుపై కింద పడేసి విచక్షణారహితంగా తొక్కేశారు. దాడి సమయంలో నాగరాజు గుండె భాగంలో, రొమ్ముపై చాలా బలంగా దెబ్బలు తగలడంతో లోపలి అవయవాలు తీవ్రంగా గాయపడ్డాయి. దెబ్బల తీవ్రతకు నాగరాజు స్పృహతప్పి పడిపోయాడు. గమనించిన స్థానికులు ఆయనను వెంటనే ఆసుపత్రికి తరలించారు. పరిక్షించిన వైద్యులు అతడు అప్పటికే మృతి చెందినట్లు తెలిపారు.
“పండుగ పూట ఇంటి పెద్దదిక్కుగా ఉన్న నాగరాజు హత్యకు గురవ్వడంతో మృతుడి కుటుంబంలో తీవ్ర విషాద ఛాయలు అలుముకున్నాయి. ఉదయం వరకు తమతో సంతోషంగా గడిపిన నాగరాజు.. వైన్స్ సిబ్బంది రాక్షసత్వానికి బలై శవమై పడి ఉండటంతో ఆయన భార్యాపిల్లలు, బంధువుల రోదనలు మిన్నంటాయి. ఈ ఘటనపై తీవ్ర ఆగ్రహం వ్యక్తం చేసిన మృతుడి కుటుంబ సభ్యులు వెంటనే అత్తాపూర్ పోలీస్ స్టేషన్‌కు వెళ్లి వైన్స్ యాజమాన్యంపై, దాడి చేసిన సిబ్బందిపై రాతపూర్వకంగా ఫిర్యాదు చేశారు. తమకు ఎలాగైనా న్యాయం చేయాలని, నాగరాజును పొట్టనబెట్టుకున్న ఆ వైన్స్ సిబ్బందిని వెంటనే అరెస్ట్ చేసి కఠినంగా శిక్షించాలని డిమాండ్ చేస్తున్నారు.”
“మృతుడి కుటుంబ సభ్యులు ఇచ్చిన ఫిర్యాదు ఆధారంగా అత్తాపూర్ పోలీసులు కేసు నమోదు చేసి దర్యాప్తు ముమ్మరం చేశారు. మృతదేహాన్ని పోస్ట్‌మార్టం నిమిత్తం ఉస్మానియా జనరల్ హాస్పిటల్‌కు తరలించారు. ఘటన జరిగిన బల్కంపేట ఎల్లమ్మ వైన్స్ పరిసర ప్రాంతాల్లో ఉన్న సీసీటీవీ కెమెరా ఫుటేజ్‌లను పోలీసులు స్వాధీనం చేసుకుని పరిశీలిస్తున్నారు. చిన్న చిన్న గొడవలకు నిండు ప్రాణాలు తీసే స్థాయికి వెళ్లడం పట్ల నగర ప్రజలు తీవ్ర దిగ్భ్రాంతి వ్యక్తం చేస్తున్నారు.
