follow us:
RRR: సాధారణంగా సినిమాలలో గ్రాఫిక్స్ అనేవి సర్వసాధారణం. ఇప్పుడున్న పరిస్థితిలో చిన్న సినిమాల నుండి పెద్ద సినిమాల వరకూ అన్నింట్లో గ్రాఫిక్స్ అవసరం ఎంతో కొంత ఉండనే ఉంటుంది. ముఖ్యంగా భారీ యాక్షన్ సీన్స్, పీరియాడిక్ ఎపిసోడ్స్, ఛేజింగ్ సీక్వెన్సులు ఉండే సినిమాలలో మనం గ్రాఫిక్స్ ఎక్కువగా చూస్తుంటాం. కానీ.. మనకు ఎక్కడకూడా గ్రాఫిక్స్ శృతిమించాయని అనిపించకుండా డిజైన్ చేస్తుంటారు టెక్నీషియన్స్.
ఈ మధ్యకాలంలో ప్రేక్షకులు క్లాస్ సినిమాలకంటే.. ఒరిజినల్, భారీ యాక్షన్ సినిమాలనే ఇష్టపడుతున్నారు. ఒకటి సినిమాలో నేటివిటీ, ట్విస్టులతో కూడిన కథైనా ఉండాలి.. లేదా కళ్లుచెదిరే రీతిలో యాక్షన్, ఒళ్ళుగగ్గుర్పొడిచే స్థాయి విజువల్స్ తో మ్యాజిక్ చేసేయాలి. అయితే.. వీటిలో నేటివిటీ ట్విస్టులనేవి చిన్న సినిమాలలో అయినా చూసేయొచ్చు. కానీ.. అద్భుతమైన విజువల్స్ కావాలంటే మాత్రం పాన్ ఇండియా సినిమాలలో ఎక్కువగా చూడగలం.
అలాంటి అద్భుతమైన విజువల్ ఫీస్ట్ కలిగించిన సినిమాలలో ‘ఆర్ఆర్ఆర్‘ ఒకటి. దర్శకధీరుడు రాజమౌళి ఈ సినిమాను ఎంతో ప్రతిష్టాత్మకంగా అద్భుతమైన విజువల్స్, గూస్ బంప్స్ తెప్పించే యాక్షన్ ఎపిసోడ్స్ తో తెరకెక్కించి బ్లాక్ బస్టర్ అందుకున్నాడు. పీరియాడిక్ మల్టీస్టారర్ గా రూపొందిన ఈ సినిమాలో స్టార్ హీరోలు జూనియర్ ఎన్టీఆర్, రామ్ చరణ్ ప్రధాన పాత్రలలో నటించారు. ఇక ఈ ఏడాది మార్చిలో విడుదలైన ట్రిపుల్ ఆర్.. ఇండియన్ బాక్సాఫీస్ వద్ద రికార్డు స్థాయి కలెక్షన్స్ రాబట్టింది.
ఇదిలా ఉండగా.. ఈ సినిమా ట్రైలర్ తోనే అందరికీ గూస్ బంప్స్ తెప్పించిన రాజమౌళి.. రిలీజ్ కు ముందు సినిమాలో కొన్ని అద్భుతమైన బ్లాక్స్ ఉన్నాయని.. అవి ఖచ్చితంగా మీకు గూస్ బంప్స్ తెప్పిస్తాయని చెప్పి అంచనాలు పెంచేశాడు. అదేవిధంగా సినిమా విడుదలయ్యాక రామ్ చరణ్, ఎన్టీఆర్ ల ఇంట్రడక్షన్ సీన్స్ తో పాటు ఇంటర్వెల్ బ్యాంగ్, క్లైమాక్స్ ఎపిసోడ్ విశేషంగా ప్రేక్షకులను ఆకట్టుకున్నాయి.
ఈ క్రమంలో ట్రిపుల్ ఆర్ ఇంటర్వెల్ ఎపిసోడ్ ని అసలు ఎవరూ ఊహించని రేంజిలో తెరకెక్కించి, పులులు, సింహాలు, జింకలు ఇలా అడవి మృగాలన్నింటినీ ఫైట్ లో ఏకం చేశాడు రాజమౌళి. ఆ సీన్స్ చూసి.. మధ్యలో రామ్ చరణ్ పులిని కొట్టే షాట్, ఎన్టీఆర్ పులిని చేతులతో విసిరే షాట్స్ చూసి ఫ్యాన్స్ కేకలతో థియేటర్లు దద్దరిల్లిపోయాయి. ఇండియన్ బాక్సాఫీస్ వద్ద ట్రిపుల్ ఆర్ రూ. 620 కోట్లకు పైగా షేర్ రాబట్టి బిగ్గెస్ట్ బ్లాక్ బస్టర్ గా నిలిచింది.
ఇక తాజాగా ట్రిపుల్ ఆర్ ఇంటర్వెల్ ఎపిసోడ్ కి సంబంధించి మేకింగ్ వీడియోని యూట్యూబ్ లో రిలీజ్ చేశారు విఎఫ్ఎక్స్ సూపర్వైజర్ శ్రీనివాస మోహన్. ఈ పవర్ ఫుల్ యాక్షన్ బ్లాక్ లో.. విఎఫ్ఎక్స్(VFX)తో చిరుత పులులను ఎలా క్రియేట్ చేశారో చూపించారు. ఈ వీడియోలో ఎన్టీఆర్ పులిని గాల్లో విసిరే షాట్ హైలైట్ అవుతోంది. సినిమాలో అంటే.. ఎన్టీఆర్ పై పులి దూకగానే దాన్ని విసిరేయడం చూసి ఆనందించాం. కానీ.. రియల్ గా ఎన్టీఆర్ విసిరింది బాల్ కావడం గమనార్హం.
విఎఫ్ఎక్స్ లో పులిని క్రియేట్ చేశారంటే.. తెరవెనుక పులి సైజు బొమ్మనో లేకపోతే ఏదోటి పెద్ద సైజు వస్తువునే ఉపయోగించి ఉంటారని అనుకుంటాం. కానీ.. కేవలం బాల్ ని విసిరి ఏకంగా పులినే సృష్టించారంటే మామూలు పనితనం కాదని ప్రశంసలు కురిపిస్తున్నారు నెటిజన్స్. ప్రస్తుతం ఎన్టీఆర్ పులిని విసిరే షాట్ వెనుక కష్టం వీడియోలో చూడవచ్చు. మరి ఆర్ఆర్ఆర్ లో మీ ఫేవరేట్ సీన్ ఏది? కామెంట్స్ లో తెలియజేయండి.
