కరీంనగర్ జిల్లాలో అర్థరాత్రి ఓ షాకింగ్ ఘటన చోటు చేసుకుంది. హుజూరాబాద్ లోని ఓ గ్రామంలో అర్ధరాత్రి భారీ కొండచిలువ ఏకంగా ఇంట్లోకే దూరింది. కుటుంబ సభ్యులంతా గాఢ నిద్రలో ఉండగా, వంటగది నుంచి వింత శబ్దాలు వినిపించాయి. తొలుత పిల్లి వచ్చిందని భావించినా, శబ్దాలు పదేపదే రావడంతో నిద్రలేచి చూడగా కిటికీ దగ్గర భారీ కొండచిలువ కనిపించింది. ఆ సీన్ చూసిన ఇంటిల్లిపాది భయంతో పరుగులు తీశారు. ఈ ఘటనతో గ్రామస్థులు షాక్ గురయ్యారు.
ఈ ఒళ్లు గగుర్పొడిచే ఘటన కరీంనగర్ జిల్లా హుజూరాబాద్ మండలంలోని సిరిసపల్లి గ్రామంలో జరిగింది. రోజువారీ పనులన్నీ ముగించుకున్న ఆ కుటుంబ సభ్యులు రాత్రి భోజనాలు చేసి నిద్రలోకి జారుకున్నారు. అయితే అర్ధరాత్రి దాటిన తర్వాత ఇంటి పరిసరాలన్నీ పూర్తిగా నిశ్శబ్దంగా మారిపోయాయి. అందరూ గాఢ నిద్రలో ఉన్న సమయంలో, అకస్మాత్తుగా ఇంటి వంటగది వైపు నుంచి ఏవో వింత శబ్దాలు రావడం మొదలయ్యాయి. వంటగదిలోని సామాన్లు కదులుతున్నట్లు, ఏదో భారీ జీవి పాకుతున్నట్లు వినిపించిన ఆ అలికిడికి కుటుంబ సభ్యుల్లో ఒకరికి మెలకువ వచ్చింది. చీకట్లో ఏం జరుగుతుందో అర్థం కాక, మొదట ఏదైనా పిల్లి ఇంట్లోకి దూరి సామాన్లు కదిలిస్తోందని వారు అనుకున్నారు.
పిల్లి అయితే వెళ్లిపోతుందిలే అనుకున్నా, వంటగది నుంచి ఆ శబ్దాలు ఆగకుండా పదేపదే రావడంతో వారిలో అనుమానం మొదలైంది. ఏం జరుగుతుందో చూద్దామని నిద్రలేచన ఆ ఇంటి యజమాని.., ధైర్యం చేసి వంటగది వైపు వెళ్లారు. లైట్ వేసి కిటికీ వైపు చూడగానే ఒక్కసారిగా దిగ్భ్రాంతికి గురయ్యారు. అక్కడ కిటికీ దగ్గర చుట్టుకుని ఉన్న ఒక భారీ కొండచిలువ వారికి కనిపించింది. దాని ఆకారాన్ని చూసిన వెంటనే వారి నోట మాట రాలేదు. పిల్లి అనుకుని దగ్గరికి వెళ్లిన వారికి, అంత పెద్ద కొండచిలువ కళ్లముందే కనిపించడంతో ప్రాణాలు అరచేతిలో పెట్టుకుని వెనక్కి పరుగులు తీశారు.
ఇంట్లోకి ఏకంగా భారీ కొండచిలువ చొరబడిందని తెలియడంతో ఆ కుటుంబ సభ్యులంతా తీవ్ర భయాందోళనకు లోనయ్యారు. ఇంట్లో చిన్నపిల్లలు, పెద్దవాళ్లు ఉండటంతో ఏ క్షణాన ఏం జరుగుతుందోనని వణికిపోయారు. ఒకవేళ ఆ శబ్దాలకు మెలకువ రాకుండా గాఢ నిద్రలోనే ఉండిపోయి ఉంటే పరిస్థితి ఎలా ఉండేదో తలుచుకుంటూ వారు గజగజ వణికిపోయారు. అర్ధరాత్రి వేళ కుటుంబ సభ్యుల కేకలు, ఆందోళన గమనించిన చుట్టుపక్కల వారు కూడా అక్కడికి చేరుకున్నారు. ఇంట్లో భారీ కొండచిలువ ఉన్న విషయాన్ని తెలుసుకుని గ్రామస్థులు సైతం ఒక్కసారిగా ఉలిక్కిపడ్డారు. జనావాసాల మధ్యకు, అదీ కూడా నేరుగా వంటగదిలోకి కొండచిలువ రావడంతో స్థానికుల్లో భయం నెలకొంది.
ప్రస్తుతం వాతావరణ మార్పులు, పరిసరాల్లో పొదలు పెరిగిపోవడం వల్ల పాములు, కొండచిలువలు ఆహారం కోసం, వెచ్చదనం కోసం ఇలా నివాస గృహాల్లోకి చొరబడుతున్నాయి. ముఖ్యంగా రాత్రి వేళల్లో కిటికీలు, తలుపుల విషయంలో ప్రజలు అత్యంత అప్రమత్తంగా ఉండాల్సిన అవసరం ఉంది. సిరిసపల్లి గ్రామంలో జరిగిన ఈ ఘటనలో అదృష్టవశాత్తూ ఎవరికీ ఎలాంటి హాని జరగకపోవడంతో అందరూ ఊపిరి పీల్చుకున్నారు.
