ఏపీలో ఆటో, ట్యాక్సీ డ్రైవర్లందరికీ రాష్ట్ర ప్రభుత్వం ఒక అదిరిపోయే శుభవార్త అందించింది. మీ బ్యాంకు ఖాతాల్లోకి నేరుగా ఏకంగా రూ.15,000 జమ చేసేందుకు ప్రభుత్వం గ్రీన్ సిగ్నల్ ఇచ్చేసింది. అంతేకాకుండా, పాత వాహనాలపై భారీగా ఉండే గ్రీన్ ట్యాక్స్ భారాన్ని కూడా తగ్గిస్తూ డ్రైవర్లకు డబుల్ ధమాకా అందించింది. అసలు ఈ నిధులు ఎప్పుడు ఖాతాల్లో జమ అవుతాయి? ఈ పథకానికి అర్హతలు ఏంటి? ఒకవేళ అర్హత ఉండి జాబితాలో పేరు లేకపోతే ఏం చేయాలి?
2026-27 ఆర్థిక సంవత్సరానికి గాను ‘ఆటో డ్రైవర్ల సేవలో’ పథకం కింద ఆర్థిక సాయం అందించేందుకు ఆంధ్రప్రదేశ్ ప్రభుత్వం నిధుల విడుదలకు అధికారికంగా ఆమోదం తెలిపింది. ఈ మేరకు వెనుకబడిన తరగతులకు చెందిన లబ్ధిదారుల కోసం ఏకంగా రూ.231.13 కోట్లను విడుదల చేస్తూ బీసీ సంక్షేమ శాఖ తాజాగా ఉత్తర్వులు జారీ చేసింది. నిధుల విడుదలకు మార్గం సుగమం కావడంతో, త్వరలోనే అర్హులైన డ్రైవర్ల బ్యాంకు ఖాతాల్లోకి నేరుగా రూ.15 వేల చొప్పున జమ చేయనున్నారు. సొంతంగా ఆటో, మోటార్ క్యాబ్, మ్యాక్సీ క్యాబ్ కలిగి ఉండి, స్వయంగా దానిని నడుపుతూ జీవనం సాగించే యజమానులకు ఈ పథకం కింద ప్రభుత్వం ఏటా రూ.15,000 ఆర్థిక సాయం అందిస్తోంది.
రాష్ట్రంలో మహిళల కోసం ‘స్త్రీ శక్తి’ పేరుతో ఉచిత బస్సు ప్రయాణ పథకాన్ని ప్రభుత్వం ప్రారంభించిన సంగతి తెలిసిందే. అయితే ఈ ఉచిత బస్సు పథకం వల్ల తమ రోజువారీ ఆదాయం గణనీయంగా తగ్గిపోయిందని ఆటో, ట్యాక్సీ డ్రైవర్లు ఆవేదన వ్యక్తం చేశారు. కష్టాల్లో ఉన్న డ్రైవర్లను ఆదుకునేందుకు, వారికి ఆర్థికంగా అండగా నిలిచేందుకు ప్రభుత్వం ఈ ప్రత్యేక పథకాన్ని ప్రతిష్ఠాత్మకంగా అమలు చేస్తోంది. నిజానికి ఎన్నికల మేనిఫెస్టోలో ఈ హామీ ఇవ్వకపోయినప్పటికీ, డ్రైవర్ల కుటుంబాలకు మద్దతుగా నిలవాలనే మంచి ఉద్దేశంతో ప్రభుత్వం ఈ రూ.15 వేల సాయాన్ని అందిస్తుండటం విశేషం.
ఈ పథకం ద్వారా లబ్ధి పొందాలంటే డ్రైవర్లు కొన్ని కీలక నిబంధనలను తప్పనిసరిగా కలిగి ఉండాలి. లబ్ధిదారులకు తప్పనిసరిగా ఏపీలో జారీ చేసిన చెల్లుబాటు అయ్యే డ్రైవింగ్ లైసెన్స్ , అలాగే వాహన రిజిస్ట్రేషన్ పత్రాలు ఉండాలి. ఒకవేళ అన్ని అర్హతలు ఉన్నప్పటికీ, సాంకేతిక కారణాల వల్ల లబ్ధిదారుల జాబితాలో పేరు లేనివారు ఆందోళన చెందాల్సిన అవసరం లేదు. అలాంటి వారు తమ సమస్యపై ఫిర్యాదు చేసేందుకు ప్రభుత్వం ఒక ప్రత్యేక ఫిర్యాదుల వ్యవస్థను కూడా ఏర్పాటు చేసింది. దీని ద్వారా దరఖాస్తు చేసుకుని అర్హులు తమ సాయాన్ని పొందవచ్చు.
ఇదే సమయంలో వాహనదారులకు మరో భారీ ఉపశమనం కలిగించే నిర్ణయాన్ని కూడా ప్రభుత్వం అమలు చేస్తోంది. గతంలో పాత వాహనాలపై భారంగా ఉన్న గ్రీన్ ట్యాక్స్ను ఏకంగా రూ.20 వేల నుంచి కేవలం రూ.3 వేలకు తగ్గిస్తూ ప్రభుత్వం తీసుకున్న నిర్ణయం ఆటో, ట్యాక్సీ యజమానులకు ఎంతో ఊరటనిస్తోంది. ఒకవైపు రూ.15 వేల ఆర్థిక సాయం, మరోవైపు గ్రీన్ ట్యాక్స్ తగ్గింపుతో డ్రైవర్ల కుటుంబాల్లో సంతోషం వ్యక్తమవుతోంది.
