బంగాళాఖాతంలో ఏర్పడిన ‘అక్వాన్’ తుపాను ఇప్పుడు రెండు తెలుగు రాష్ట్రాలకు, ముఖ్యంగా ఆంధ్రప్రదేశ్ తీర ప్రాంతాలకు కంటిమీద కునుకు లేకుండా చేస్తోంది. గంటకు ఏకంగా 145 కిలోమీటర్ల వేగంతో వీచే పెనుగాలులు, అత్యంత భారీ వర్షాలతో ఈ తుపాను విరుచుకుపడే ప్రమాదం పొంచి ఉందని వాతావరణ శాఖ, విపత్తుల నిర్వహణ సంస్థలు హెచ్చరిస్తున్నాయి. అసలు ఈ అక్వాన్ తుపాను ప్రస్తుతం ఎక్కడ కేంద్రీకృతమై ఉంది? ఏ రోజున, ఎక్కడ తీరం దాటబోతోంది? దీని ప్రభావం ఏయే జిల్లాలపై ఎక్కువగా ఉండబోతోంది?
బంగాళాఖాతంలో కేంద్రీకృతమైన అక్వాన్ తుపాను ప్రస్తుతం చాలా నెమ్మదిగా కదులుతూ మరింత శక్తిని పుంజుకుంటోంది. గడిచిన ఆరు గంటల్లో ఇది గంటకు కేవలం 3 కిలోమీటర్ల వేగంతో మాత్రమే ముందుకు కదిలినట్లు రాష్ట్ర విపత్తుల నిర్వహణ సంస్థ ఎండీ, ఆర్టీజీఎస్ సీఈవో ప్రఖర్ జైన్ వెల్లడించారు. ప్రస్తుత సమాచారం ప్రకారం ఈ తుపాను చెన్నైకి 590 కిలోమీటర్లు, మచిలీపట్నానికి 620 కిలోమీటర్లు, విశాఖపట్నానికి 620 కిలోమీటర్లు, అలాగే ఒడిశాలోని గోపాల్పూర్కు 750 కిలోమీటర్ల దూరంలో కేంద్రీకృతమై ఉంది. ఇవాళ ఉదయానికే ఇది తీవ్ర తుపానుగా మారే అవకాశం ఉందని అధికారులు స్పష్టం చేశారు.
వాతావరణ నిపుణుల అంచనాల ప్రకారం, ఈ తుపాను పశ్చిమ-వాయవ్య దిశగా ప్రయాణిస్తూ రేపు సాయంత్రానికి మరింత బలపడి ‘అతి తీవ్ర తుపాను’గా రూపొందే అవకాశం ఉంది. ఆ తర్వాత ఇది నేరుగా ఆంధ్రప్రదేశ్ తీరం వైపు దూసుకొచ్చి, శుక్రవారం మధ్యాహ్నానికి నెల్లూరు – విశాఖపట్నం మధ్య తీరం దాటే అవకాశం ఉందని విపత్తుల నిర్వహణ సంస్థ పేర్కొంది. తుపాను తీరం దాటే సమయంలో పరిస్థితి అత్యంత భయానకంగా ఉండే సూచనలు కనిపిస్తున్నాయి. ఆ సమయంలో గంటకు 120 నుంచి 130 కిలోమీటర్ల వేగంతో, గరిష్ఠంగా 145 కిలోమీటర్ల వేగంతో బలమైన ఈదురుగాలులు వీస్తాయని హెచ్చరికలు జారీ అయ్యాయి.
అక్వాన్ తుపాను ప్రభావంతో రేపు, ఎల్లుండి రాష్ట్రవ్యాప్తంగా పలు ప్రాంతాల్లో, ముఖ్యంగా కోస్తా జిల్లాల్లో అత్యంత భారీ వర్షాలు కురిసే అవకాశం ఉందని ప్రఖర్ జైన్ తెలిపారు. 145 కిలోమీటర్ల వేగంతో గాలులు వీచే అవకాశం ఉన్నందున చెట్లు, విద్యుత్ స్తంభాలు నేలకూలే ప్రమాదం ఉంది. కాబట్టి కోస్తా తీరప్రాంత ప్రజలందరూ అత్యంత అప్రమత్తంగా ఉండాలని అధికారులు విజ్ఞప్తి చేస్తున్నారు. మత్స్యకారులు ఎవరూ వేటకు వెళ్లొద్దని, లోతట్టు ప్రాంతాల ప్రజలు సురక్షిత ప్రాంతాలకు తరలివెళ్లేందుకు సిద్ధంగా ఉండాలని సూచించారు.
ఈ తుపాను ప్రభావం వ్యవసాయ రంగంపై తీవ్రంగా పడే అవకాశం ఉన్నందున రైతులకు అధికారులు కీలక సూచనలు చేశారు. రేపు, ఎల్లుండి కురవబోయే అత్యంత భారీ వర్షాలను దృష్టిలో ఉంచుకుని, రైతులు తమ వ్యవసాయ పనుల్లో ముందస్తు జాగ్రత్తలు తీసుకోవాలని ప్రఖర్ జైన్ కోరారు. కోతకు వచ్చిన పంటలను సురక్షిత ప్రాంతాలకు తరలించడం, ధాన్యం తడవకుండా తగిన ఏర్పాట్లు చేసుకోవడం చాలా ముఖ్యం. ప్రకృతి విపత్తుల సమయంలో ప్రభుత్వ హెచ్చరికలను ఎప్పటికప్పుడు గమనిస్తూ సురక్షితంగా ఉండాలంటూ అధికారులు సూచిస్తున్నారు.
