follow us:
ప్రముఖ నటుడు, రాజ్యసభ ఎంపీ కమల హాసన్ ఎలక్షన్ కమిషన్ పనితీరుపై సంచలన కామెంట్స్ చేస్తూ చీఫ్ ఎలక్షన్ కమిషనర్ జ్ఞానేష్ కుమార్‌కు ఒక ఘాటైన లేఖ రాశారు. ఎన్నికల నిర్వహణలో ఈసీ తీరు అనుమానాస్పదంగా ఉందంటూ, ఆ సందేహాలను నివృత్తి చేసేందుకు వెంటనే ప్రతిపక్ష ఎంపీలతో ఒక ముఖాముఖి భేటీ ఏర్పాటు చేయాలని ఆయన డిమాండ్ చేశారు. సోషల్ మీడియా వేదికగా ఆయన పంచుకున్న ఈ లేఖ ఇప్పుడు దేశవ్యాప్తంగా తీవ్ర చర్చనీయాంశంగా మారింది.
దేశవ్యాప్తంగా ఓటర్ల జాబితా సవరణ ప్రక్రియను అత్యంత హడావుడిగా నిర్వహించడం పట్ల కమల్ హాసన్ తీవ్ర అభ్యంతరం వ్యక్తం చేశారు. సరైన సమయం ఇవ్వకుండా వేగంగా జాబితాలను రీ-వెరిఫై చేయడం వల్ల ముఖ్యంగా పేద వర్గాలకు చెందిన నిరుపేద పౌరుల ఓట్లు తొలగిపోయే ప్రమాదం ఉందని ఆయన ఆందోళన వ్యక్తం చేశారు. అసలు ఓటర్ల నమోదు ఫారాల్లో ఊహించని మార్పులు చేయడం, ఎన్నికల ప్రవర్తనా నియమావళి అమలులో పక్షపాత ధోరణి ప్రదర్శించడం వంటి చర్యలు ఈసీ నిష్పాక్షికతపై ప్రజల్లో ఉన్న నమ్మకాన్ని సడలిస్తున్నాయని, వ్యవస్థపై తీవ్ర సందేహాలకు తావిస్తోందని ఆయన స్పష్టం చేశారు
కేవలం ఆరోపణలతోనే ఆగకుండా, గతంలో జరిగిన కొన్ని కీలక పరిణామాలను కూడా కమల్ హాసన్ ఈ సందర్భంగా గుర్తుచేశారు. ఈసీ తీరును నిరసిస్తూ లేదా తమ వినతులను అందజేసేందుకు ఎలక్షన్ కమిషనర్లను కలిసేందుకు ప్రయత్నించిన ప్రతిపక్ష నేతలను అడ్డుకోవడంతో పాటు, వారిని నిర్బంధించిన ఘటనలను ఆయన తీవ్రంగా తప్పుపట్టారు. ప్రజాస్వామ్య వ్యవస్థలో గళాన్ని నొక్కేయడం సరైంది కాదని, ఆరోగ్యకరమైన చర్చల ద్వారానే ఏ సమస్యనైనా పరిష్కరించుకోవచ్చని ఆయన అభిప్రాయపడ్డారు. అందుకోసమే పార్లమెంటు ప్రాంగణంలోని ‘సంవిధాన్ భవన్‌’లో అన్ని పక్షాల ఎంపీలతో ఒక అధికారిక సమావేశాన్ని తక్షణమే నిర్వహించాలని సిఇసి జ్ఞానేష్ కుమార్‌కు విజ్ఞప్తి చేశారు.
ప్రజాస్వామ్య దేశంలో అత్యున్నతమైన రాజ్యాంగ వ్యవస్థల పట్ల ప్రజలకు విశ్వాసం ఉండటం ఎంతో ముఖ్యమని కమల్ హాసన్ వ్యాఖ్యానించారు. భారత పౌరుడికి రాజ్యాంగం ప్రసాదించిన ప్రాథమిక ఓటు హక్కును కాపాడటం ప్రతి స్వతంత్ర వ్యవస్థ బాధ్యత అని గుర్తుచేశారు. ఒకవేళ ప్రజాస్వామ్య వ్యవస్థలపైనే ప్రజల్లో అపనమ్మకం ఏర్పడితే అది దేశ భవిష్యత్తుకే ముప్పుగా పరిణమిస్తుందని ఆయన హెచ్చరించారు. సుప్రీంకోర్టు, ఎన్నికల కమిషన్ లాంటి స్వతంత్ర సంస్థలు నిష్పాక్షికంగా వ్యవహరించినప్పుడే ప్రజాస్వామ్య మూలాలు బలంగా ఉంటాయని రాజకీయ విశ్లేషకులు కూడా భావిస్తున్నారు.
మొత్తానికి ఎన్నికల కమిషన్ స్వయంప్రతిపత్తిపై ప్రతిపక్ష నేతలతో పాటు ఇప్పుడు కమల్ హాసన్ వంటి ప్రముఖ ఎంపీలు గళం విప్పడం పొలిటికల్ సర్కిల్స్‌లో పెను సంచలనం సృష్టిస్తోంది. మరి ఈ లేఖపై చీఫ్ ఎలక్షన్ కమిషనర్ జ్ఞానేష్ కుమార్ ఎలా స్పందిస్తారు? ప్రతిపక్షాలతో సమావేశానికి ఆమోదం తెలుపుతారా లేదా అన్నది ఆసక్తికరంగా మారింది
